ສຶກສາຄວາມເປັນໄປໄດ້ໂຄງການສາຍສົ່ງ 500 KV ລາວ-ຫວຽດນາມ
 |
ພິທີລົງນາມບົດບັນທຶກຄວາມເຂົ້າໃຈ. ພາບ: vientianemai.net
ພິທີລົງນາມບົດບັນທຶກຄວາມເຂົ້າໃຈເພື່ອສຶກສາຄວາມເປັນໄປໄດ້ດ້ານເຕັກນິກ-ເສດຖະກິດ ແລະ ຜົນກະທົບເບື້ອງຕົ້ນດ້ານສິ່ງແວດລ້ອມ ແລະ ສັງຄົມຂອງໂຄງການສາຍສົ່ງ 500 KV ເສັ້ນໜຶ່ງ ທີ່ຈະນຳໃຊ້ໃນການສົ່ງພະລັງງານໄຟຟ້າຈາກ ສປປ ລາວ ໄປຫາ ສສ ຫວຽດນາມ ໄດ້ຈັດຂຶ້ນໃນອິາທິດແລ້ວຢູ່ກະຊວງພະລັງງານ ແລະ ບໍ່ແຮ່ (ພບ) ລະຫວ່າງທ່ານ ທອງພັດ ອິນທະວົງ ຮອງລັດຖະມົນຕີກະຊວງ ພບ ແລະ ທ່ານ ລູໂບມຽກ ວາບານອບ ຜູ້ຈັດການຝ່າຍລົງທຶນໃນໂຄງການຊັບພະຍາກອນທຳມະຊາດ ແລະ ພື້ນຖານໂຄງລ່າງ ປະຈຳພາກພື້ນອາຊີ ແລະ ປາຊີຟິກ ອົງການ-ການເງິນສາກົນ (IFC) ໂດຍມີພາກສ່ວນກ່ຽວຂ້ອງເຂົ້າຮ່ວມ.
ເພື່ອລະດົມການລົງທຶນຈາກເອກະຊົນທີ່ມີຄຸນນະພາບ ເຂົ້າໃນພາລະກິດສ້າງຄວາມເຂັ້ມແຂງໃຫ້ຂະແໜງສາຍສົ່ງ ພະລັງງານໄຟຟ້າຂອງ ສປປ ລາວ ເພື່ອເສີມຂະຫຍາຍຕາໜ່າງແຈກຢາຍພາຍໃນ ແລະ ສົ່ງເສີມການສົ່ງອອກນອກ ປະກອບສ່ວນໃຫ້ການຂະຫຍາຍຕົວຂອງເສດຖະກິດ ແລະ ສົ່ງເສີມຄວາມສົມບູນພູນສຸກຮ່ວມກັນຢູ່ ສປປ ລາວ.
ໄລຍະ 6 ເດືອນພາຍຫຼັງການລົງນາມຄັ້ງນີ້ ອົງການ IFC ຈະຮ່ວມກັບລັດວິສາຫະກິດໄຟຟ້າລາວ ດຳເນີນການສຶກສາຄວາມເປັນໄປໄດ້ເບື້ອງຕົ້ນໂຄງການສາຍສົ່ງ 500 KV ເສັ້ນໜຶ່ງ ທີ່ຈະນຳໃຊ້ໃນການສົ່ງພະລັງງານໄຟຟ້າຈາກ ສປປ ລາວ ໄປສູ່ປະເທດຫວຽດນາມ ຖ້າບໍ່ມີຄວາມແທດເໜາະ ອົງການ IFC ກໍຈະສຶບຕໍ່ຊ່ວຍກະຊວງ ພບ ໃນການກຳນົດ ແລະ ປະເມີນໂຄງການສາຍສົ່ງເສັ້ນອື່ນ ທີ່ເໝາະສົມສຳລັບການລົງທຶນຂອງພາກເອກະຊົນ.
（ແຫຼ່ງຂໍ້ມູນ： www.vientianemai.net）