ພິທີໄວ້ອາໄລ ແລະ ປົງອັດຖິທະຫານອາສາສະໝັກຫວຽດນາມ ທີ່ເສຍສະຫຼະຊີວິດຢູ່ ລາວ ແລະ ກໍາປູເຈຍ

ພິທີໄວ້ອາໄລ ແລະ ປົງອັດຖິທະຫານອາສາສະໝັກຫວຽດນາມ ທີ່ເສຍສະຫຼະຊີວິດຢູ່ລາວ ແລະ ກໍາປູເຈຍ. (ພາບ: tienphong.vn)

ໃນວັນທີ 25 ພຶດສະພາ 2019, ທີ່ສຸສານນັກຮົບເສຍສະຫຼະຊີວິດເພື່ອຊາດງອັກໂຮ່ຍ, ຄະນະພັກ, ສະພາປະຊາຊົນ, ຄະນະກໍາມະການປະຊາຊົນ, ຄະນະກໍາມະການແນວໂຮມປະເທດຊາດແຂວງກອນຕູມ, ຫວຽດນາມ ຈັດຕັ້ງພິທີໄວ້ອາໄລ ແລະ ປົງອັດຖິທະຫານອາສາສະໝັກ ແລະ ນັກຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວ ແລະ ກໍາປູເຈຍ 13 ອັດຖິ ເຊິ່ງໄດ້ທ້ອນໂຮມໃນລະດູແລ້ງ 2018-2019 ແລະ ອັດຖິນັກຮົບເສຍສະຫຼະຊີວິດເພື່ອຊາດ 1 ອັດຖິທີ່ບໍລິເວນເມືອງ ງອກໂຮ່ຍ, ແຂວງກອນຕູມ ສສ ຫວຽດນາມ.

ເຂົ້າຮ່ວມພິທີໄວ້ອາໄລດັ່ງກ່າວມີການນໍາແຂວງ, ພະແນກ, ຄະນະ, ຂະແໜງຂອງແຂວງກອນຕູມ, ຜູ້ຕາງໜ້າຄະນະປະຕິບັດງານພິເສດຄະນະກໍາມະການສະເພາະກິດລັດຖະບານ; ຜູ້ຕາງໜ້າທະຫານເຂດ 5; ຫົວໜ້າຄະນະສະເພາະກິດແຂວງ Ratanakiri (ກໍາປູເຈຍ); ຫົວໜ້າຄະນະປະຕິບັດງານພິເສດ 3 ແຂວງພາກໃຕ້ຂອງລາວ ຄື: ອັດຕະປື, ຈໍາປາສັກ, ເຊກອງ.

ໂດຍປະຕິບັດຕາມແຜນການຊອກຫາ, ຂຸດຄົ້ນ, ທ້ອນໂຮມ ແລະ ສົ່ງອັດຖິທະຫານອາສາສະໝັກຫວຽດນາມ ທີ່ເສຍສະຫຼະຊີວິດເພື່ອຊາດກັບເມືອບ້ານເກີດເມືອງນອນ, ດ້ວຍຄວາມຮັບຜິດຊອບສູງສຸດ, ພ້ອມກັບຄວາມເອົາໃຈໃສ່ສົມທົບກັນ ແລະ ສ້າງເງື່ອນໄຂສະດວກຈາກການນໍາອໍານາດການປົກຄອງ ແລະ ປະຊາຊົນບັນດາແຂວງອັດຕະປື, ເຊກອງ, ຈໍາປາສັກ, ປະເທດລາວ ແລະ ແຂວງ Ratanakiri, ລາຊະອານາຈັກກໍາປູເຈຍ, ໃນ 6 ເດືອນລະດູແລ້ງ 2018-2019, ກອງປະຕິບັດງານ K53 ຂອງຄະນະສະເພາະກິດແຂວງກອນຕູມ ໄດ້ຊອກຫາ, ຂຸດຄົ້ນ, ສົ່ງອັດຖິທະຫານອາສາສະໝັກ ແລະ ນັກຊ່ຽວຊານຫວຽດນາມ 13 ອັດຖິກັບເມືອປະເທດ (ນັບຮົບເສຍສະຫຼະຊີວິດຢູ່ ລາວ 4 ອັດຖິ ແລະ ນັກຮົບເສຍສະຫຼະຊີວິດຢູ່ກໍາປູເຈຍ 9 ອັດຖິ).

（ໄຊພອນ）