ການນຳຂັ້ນສູງແຂວງ ລາວກ່າຍ ສສຫວຽດນາມ ຕ້ອນຮັບ ການເດີນທາງພົບປະຢ້ຽມຢາມຂອງການນຳຂັ້ນສູງແຂວງອຸດົມໄຊ

ບັນຍາກາດກອງປະຊຸມພົບປະ.

ໂອກາດດັ່ງກ່າວ ທ່ານ ຫງວຽນ ວັນວິງ ກໍາມະການສູນກາງພັກ,ເລຂາພັກແຂວງ,ປະ ທານສະພາປະຊາຊົນແຂວງລາວກ່າຍ ໄດ້ກ່າວສະແດງຄວາມຍິນດີຕ້ອນຮັບຄະນະນໍາຈາກແຂວງອຸດົມໄຊ ພ້ອມທັງລາຍງານສະພາບລວມກ່ຽວກັບການພັດທະນາເສດຖະກິດ ສັງຄົມ ຂອງຕົນ ເພື່ອເປັນບ່ອນອີງໃນການ ແລກປ່ຽນບົດຮຽນຮ່ວມກັນ ເຊິ່ງໂດຍລວມແລ້ວເຫັນວ່າ ແຂວງລາວກ່າວ ເປັນແຂວງໜຶ່ງທີ່ຕັ້ງຢູ່ທາງພາກເໜືອ ຂອງສສຫວຽດນາມ ມີປະຊາ ກອນ ທັງຫມົດ 7 ແສນກວ່າຄົນ,ມີທ່າແຮງຫຼາຍດ້ານ ໂດຍສະເພາະແມ່ນດ້ານການຄົມ ມະນາຄົມ,ພະລັງງານບໍ່ແຮ່,ກະສິກຳ ແລະ ການທ່ອງທ່ຽວ. ໂອກາດດຽວກັນທ່ານ ປອ ຄໍາພັນ ເຜີຍຍະວົງ ເຈົ້າແຂວງອຸດົມໄຊ ໄດ້ລາຍງານ ສະພາບໂດຍລວມຂອງແຂວງອຸດົມໄຊ ພ້ອມທັງສະເໜີບາງບັນຫາ ເພື່ອເຄື່ອນໄຫວຈັດຕັ້ງປະຕິບັດຮ່ວມກັນໃນຕໍ່ໜ້າ ເປັນຕົ້ນແມ່ນ ການພົບປະຢ້ຽມຢາມ ເຊິ່ງກັນແລະກັນ ຂອງການນຳທັງສອງຝ່າຍ ໃນຕໍ່ໜ້າ ພ້ອມທັງໃຫ້ເພີ່ມທະວີສາຍພົວພັນຮ່ວມມື,ຄວາມສາມັກຄີແບບພິເສດ ໃຫ້ນັບມືື້ນັບແໜ້ນແຟ້ນຍິ່ງຂຶ້ນ.

ຜູ້ແທນຂັ້ນສູງຂອງສອງແຂວງຖ່າຍຮູບຮ່ວມເປັນທີ່ລະນຶກ.

ຕໍ່ກັບບາງບັນຫາທີ່ທັງສອງຝ່າຍຍົກຂຶ້ນມາລາຍງານ ແລະ ປຶກສາຫາລືກັນນັ້ນ ທາງແຂວງລາວກ່າຍ ເຫັນດີໃຫ້ການຮ່ວມມື ແລະ ພ້ອມເປີດກວ້າງການພົວພັນ,ແລກປ່ຽນບົດ ຮຽນ ຮ່ວມກັນ ໂດຍຈະນຳສະເໜີຕໍ່ບັນດາຂະແໜງການທີ່ກ່ຽວຂ້ອງ ເພື່ອສຶກສາ ແລະ ຈັດຕັ້ງປະຕິບັດຕາມຂັ້ນຕອນ ໂດຍແນ່ໃສ່ເຮັດໃຫ້ສອງແຂວງມີການພົວພັນ,ຮ່ວມມື ແລະ ປະສານງານຮ່ວມກັນຢ່າງເປັນປົກກະຕິ. ຈາກນັ້ນ ການນໍາທັງສອງຝ່າຍ ໄດ້ຢ້ຽມຢາມໂຮງຮຽນການເມືອງ ແລະ ຫໍພິພິຕະພັນ ຂອງແຂວງ ລາວກ່າຍຕື່ມອີກ.

（ແຫຼ່ງ​ຂໍ້​ມູນ​： ຄານມະນີ ຮຽນດໍຈັນ/ສະຖານີວິທະຍຸ ໂທລະພາບ ແຂວງ ອຸດົມໄຊ）