ຊຸກຍູ້ການຮ່ວມມືດ້ານພາສີຫວຽດນາມ-ລາວ

ທ່ານ ຫງວຽນກົງບິ່ງ ຮອງຫົວໜ້າກົມໃຫຍ່ພາສີຫວຽດນາມ ແລະທ່ານ ບຸນປະເສີດ ສີຄຸນລະບຸດ ຜູ້ຮັກສາການຫົວໜ້າກົມພາສີລາວ ລົງນາມໃນບົດບັນທຶກການເຮັດວຽກ. (ພາບ: ກົມຮ່ວມມືສາກົນ-ກົມໃຫຍ່ພາສີ)

ກ່າວຄໍາເຫັນທີ່ກອງປະຊຸມ, ທ່ານ ຫງວຽນກົງບິ່ງ ໃຫ້ຮູ້ວ່າ, ກອງປະຊຸມຫົວໜ້າກົມໃຫຍ່ພາສີປະຈໍາປີແມ່ນໂອກາດເພື່ອໃຫ້ສອງອົງການຕີລາຄາການເຄື່ອນໄຫວປະຕິບັດໄດ້ໃນປີຜ່ານມາ ແລະວາງອອກແຜນການຮ່ວມມືໃນປີຕໍ່ໄປ.

ທີ່ກອງປະຊຸມ, ສອງຝ່າຍໄດ້ພ້ອມກັນຕີລາຄາການປະຕິບັດແຜນການຮ່ວມມືປີ 2018 ແລະຮັບຮອງເອົາແຜນການຮ່ວມມືປີ 2019. ໃນປີ 2018, ອົງການພາສີຫວຽດນາມ-ລາວ ໄດ້ປະຕິບັດສຳເລັດການຮ່ວມມືຈຸດສຸມສີ່ຢ່າງໃນແຜນການຖືກຕາມກຳນົດເວລາ ແລະບັນລຸໄດ້ຜົນງານສູງ. ພິເສດ, ປີ 2018, ສອງຝ່າຍໄດ້ຜັນຂະຫຍາຍການເຄື່ອນໄຫວດ້ວຍຮູບການໃໝ່ທີ່ສຸດ, ນັ້ນແມ່ນພາສີຫວຽດນາມ ຮັບເອົາພະນັກງານພາສີລາວ ມາຝຶກງານໄລຍະສັ້ນຢູ່ຫວຽດນາມ. ຮູບການຮ່ວມມືນີ້ໄດ້ຮັບການຕີລາຄາສູງໃນການຍົກສູງກໍາລັງຄວາມສາມາດໃຫ້ພາສີລາວ ແລະເພີ່ມທະວີຄວາມສາມັກຄີ, ຄວາມເຂົ້າໃຈເຊິ່ງກັນ ແລະກັນລະຫວ່າງສອງອົງການພາສີ.

ກ່ຽວກັບທິດທາງຮ່ວມມືໃນໄລຍະຈະມາເຖິງ, ສອງຝ່າຍໄດ້ເຫັນດີເປັນເອກະພາບຮັບຮອງເອົາແຜນການຮ່ວມມືດ້ານພາສີຫວຽດນາມ-ລາວ ປີ 2019. ຕາມນັ້ນແລ້ວ, ຄາດຄະເນວ່າປີ 2019, ພາສີສອງປະເທດຈະດໍາເນີນການເຄື່ອນໄຫວ 5 ຢ່າງ. ບັນດາການເຄື່ອນໄຫວນີ້ຈະນໍາເຂົ້າແຜນການຮ່ວມມືລະຫວ່າງສອງກະຊວງການເງິນຫວຽດນາມ-ລາວ. ບັນດາການເຄື່ອນໄຫວສືບຕໍ່ສຸມໃສ່ເຂົ້າໃນການຍົກສູງກໍາລັງຄວາມສາມາດຕາມຄວາມຮຽກຮ້ອງຕ້ອງການຂອງພາສີລາວ.

（ແຫຼ່ງ​ຂໍ້​ມູນ​： ຫງວຽນກຸກ/ກປ.ອອນໄລ）