ຫ້ອງວ່າການປົກຄອງນະຄອນຫຼວງວຽງຈັນ ສະເຫຼີມສະຫຼອງ 2 ວັນປະຫວັດສາດ

ທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ກ່າວວ່າ ວັນທີ 23 ສິງຫາ ແມ່ນວັນທີ່ມີຄວາມໝາຍສຳຄັນທາງປະຫວັດສາດຂອງປວງຊົນລາວທັງຊາດ ເວົ້າສະເພາະຊາວ ນວ ແມ່ນໝາກຜົນການຕໍ່ສູ້ຍືດເຍື້ອຍາວນານຂອງປະຊາຊົນລາວບັນດາເຜົ່າ ພາຍໃຕ້ການນຳພາອັນປີຊາສາມາດຂອງບັນພະບຸລຸດ ຫຼື ຂອງພັກປະຊາຊົນ ປະຕິວັດລາວ 23 ສິງຫາ 1975 ແມ່ນວັນທີ່ຊາວ ນວ ຫຼາຍໝື່ນຄົນ ໂຮມຊຸມນຸມໃຫຍ່ປະກາດສ້າງຕັ້ງອຳນາດການປົກຄອງປະຕິວັດ ໃນຂອບເຂດທົ່ວປະເທດ ແມ່ນຄວາມອົງອາດກ້າຫານຂອງຄົນ ນວ ແມ່ນການຍາດເອົາອຳນາດການປົກຄອງ ມາສູ່ກຳມືຂອງປະຊາຊົນລາວບັນດາເຜົ່າທົ່ວທັງຊາດ ເມື່ອຍາດໄດ້ເອກະລາດມາສູ່ກຳມືແລ້ວຕະຫຼອດໄລຍະ 44 ປີ ຄະນະບໍລິຫານພັກ ນວ ແຕ່ລະສະໄໝ ຊາວ ນວ ກໍໄດ້ຢືນຄຽງຂ້າງພັກໃນການພັດທະນາ ນວ ເຮັດໃຫ້ ນວ ໄດ້ຮັບການພັດທະນາຫຼາຍດ້ານ ກາຍເປັນໃຈກາງດ້ານການເມືອງ ເສດຖະກິດ ວັດທະນະທຳ-ສັງຄົມ ປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ ຊີວິດການເປັນຢູ່ຂອງປະຊາຊົນດີຂຶ້ນລື່ນເມື່ອກ່ອນຫຼາຍເທົ່າ.

ຫ້ອງວ່າການປົກຄອງນະຄອນຫຼວງວຽງຈັນ ສະເຫຼີມສະຫຼອງ 2 ວັນປະຫວັດສາດ. (ພາບ: vientianemai.net)

ສະນັ້ນ ຈຶ່ງຮຽກຮ້ອງໃຫ້ຊາວ ນວ ທຸກຖ້ວນໜ້າ ຈົ່ງເສີມຂະຫຍາຍມູນເຊື້ອ 23 ສິງຫາ ວັນຢຶດອຳນາດຂອງຊາວ ນວ ໃຫ້ແຂງແຮງ ແລະ ສູງຂຶ້ນ ບົນພື້ນຖານຍົກສູງຄວາມເຊື່ອໝັ້ນຕໍ່ການນຳພາຂອງພັກ ເພີ່ມທະວີຄວາມສາມັກຄີເປັນເອກະພາບ ນ້ຳໃຈພິລາດອາດຫານ ເດັດດ່ຽວໜຽວແໜ້ນ ໂດຍເສີມຂະຫຍາຍ 4 ມູນເຊື້ອຂອງ ນວ ຄື: ມູນເຊື້ອພິລາດອາດຫານ ມູນເຊື້ອສາມັກຄີປອງດອງ ມູນເຊື້ອຮັກຊາດ ຮັກ ນວ ມູນເຊື້ອຄວາມສີວິໄລ ແລະ ຄວາມກ້າວໜ້າ.

（ແຫຼ່ງຂໍ້ມູນ： vientianemai）