 |
ພາບປະກອບ
ແຈ້ງການສະບັບດັ່ງກ່າວ ແມ່ນໃຫ້ທຸກຫົວໜ່ວຍວິສາຫະກິດ ຈົ່ງໃຫ້ການຮ່ວມມືໃນການປະຕິບັດມາດຕະການເພື່ອຕ້ານ ແລະ ສະກັັດກັ້ນພະຍາດນີ້ຢູ່ໃນຂອບເຂດຄວາມຮັບຜິດຊອບຂອງຕົນ ໂດຍໃຫ້ມີການຕິດຕາມຂໍ້ມູນຂ່າວສານແຈ້ງເຕືອນຈາກຄະນະສະເພາະກິດ ແລະ ພາກສ່ວນກ່ຽວຂ້ອງ ປະຕິບັດຕາມມາດຕະການປ້ອງກັນຕາມຫຼັກວິຊາການທີ່ຂະແໜງສາທາລະນະສຸກວາງອອກຢ່າງເຂັ້ມງວດ ບໍ່ໃຫ້ມີການສວຍໂອກາດຂຶ້ນລາຄາສິນຄ້າ ແລະ ຄ່າບໍລິການຕາມລຳພັງໃຈ ກັກຕຸນສິນຄ້າທີ່ເປັນການກະທຳເອົາປຽບຜູ້ບໍລິໂພກໂດຍບໍ່ຊອບທຳ ແລະ ຈຳໜ່າຍສິນຄ້າທີ່ບໍ່ມີຄວາມປອດໄພດ້ານຄຸນນະພາບຢ່າງເດັດຂາດ ພ້ອມນີ້ ກໍໃຫ້ນຳເອົາສິນຄ້າຂອງຕົນອອກຈຳໜ່າຍສູ່ສັງຄົມເປັນປົກກະຕິ ການດຳເນີນທຸລະກິດຂອງທຸກຫົວ ໜ່ວຍວິສາຫະກິດແມ່ນໃຫ້ສືບຕໍ່ເຄື່ອນໄຫວຕາມວັດຖຸປະສົງຢ່າງຕໍ່ເນື່ອງ.
ຖ້າພາກສ່ວນທຸລະກິດໃດມີຄວາມຫຍຸ້ງຍາກ ຫຼື ມີຄວາມຈໍາເປັນໃນການເຄື່ອນໄຫວດໍາເນີນທຸລະກິດ ໃນໄລຍະການເຝົ້າລະວັງເຊື້ອພະຍາດ COVID-19 ໃຫ້ສະເໜີມາຍັງພະແນກອຸດສາຫະກໍາ ແລະ ການຄ້າ ນວ ເພື່ອຄົ້ນຄວ້້າ ນຳສະເໜີ ແລະ ພິຈາລະນາແກ້ໄຂຕາມລະບຽບການ ຈຶ່ງແຈ້ງໃຫ້ທຸກພາກສ່ວນ ກ່ຽວຂ້ອງຮັບຮູ້ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ ຖ້າຫາກມີການລະເມີດຂໍ້ຫ້າມທີ່ໄດ້ກ່າວມາຂ້າງເທິງ ຈະຖືກປະຕິບັດມາດຕະການຕາມລະບຽບກົດໝາຍ ເຊິ່ງສາມາດຕິດຕໍ່ພົວພັນໄດ້ເບີໂທ 021 415877 ແລະ ເບີສາຍດ່ວນ 1510.
ກະຊວງການຕ່າງປະເທດ ຮ່ວມກັບກະຊວງສາທາລະນະສຸກ ຈັດພິທີຖະແຫຼງຂ່າວກ່ຽວກັບມາດຕະການສະກັດກັ້ນ ປ້ອງກັນ ແລະ ແກ້ໄຂການລະບາດຂອງ COVID-19 ຂອງລັດຖະບານລາວ ຕໍ່ບັນດາທູຕານຸທູດ ຜູ້ຕາງໜ້າອົງການຈັດຕັ້ງສາກົນ ປະຈຳລາວ ວັນທີ 19 ມີນາ 2020 ທີ່ສູນຮ່ວມມືສາກົນ ແລະ ການເຝິກອົບຮົມ ໂດຍການຖະແຫຼງຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແລະ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ.
ປັດຈຸບັນ ລັດຖະບານລາວໄດ້ສືບຕໍ່ປະຕິບັດມາດຕະການທີ່ໄດ້ວາງອອກແລ້ວ ແລະ ມາດຕະການເພື່ອສະກັດກັ້ນເພີ່ມ ຄື: ປິດດ່ານທ້ອງຖິ່ນ ແລະ ດ່ານປະເພນີທົ່ວປະເທດ ສ່ວນດ່ານສາກົນໃຫ້ເບິ່ງຄວາມຮັບປະກັນຮອບດ້ານຈຶ່ງອະນຸຍາດໃຫ້ເປີດໃຫ້ເຂົ້າ-ອອກປົກກະຕິ ໂຈະການອອກ VISA ກັບດ່ານທຸກປະເພດ ໃນໄລຍະເວລາ 30 ວັນ ສຳລັບຜູ້ທີ່ໄດ້ວິຊາເຂົ້າລາວແລ້ວ ຕ້ອງມີການຢັ້ງຢືນການກວດສຸຂະພາບ ແລະ ກວດປະຫວັດການເຄື່ອນໄຫວໄລຍະ 14 ວັນຜ່ານມາ ສຳລັບປະເທດທີ່ໄດ້ຮັບການຍົກເວັ້ນວິຊາ ເຫັນດີໃຫ້ຍົກເລີກການຍົກເວັ້ນວິຊາດັ່ງກ່າວຊົ່ວຄາວ ຈົນກວ່າຈະມີການພິຈາລະນາໃໝ່ຂອງລັດຖະບານ ຫຼີກລ່ຽງການເດີນທາງໄປຕ່າງປະເທດຂອງພົນລະ ເມືອງລາວໃນໄລຍະນີ້ ຜູ້ທີ່ເດີນທາງກັບຈາກປະເທດທີ່ມີການແຜ່ລະບາດຂອງພະຍາດ ໃຫ້ປະຕິບັດການແຍກປ່ຽວຢ່າງໜ້ອຍ 14 ວັນ ເພື່ອຕິດຕາມສຸຂະພາບ ຫຼີກລ່ຽງການໂຮມຊຸມນຸມໃຫຍ່ ແລະ ງານບຸນປະເພນີຕ່າງໆ ປິດກິດຈະການຮ້ານບັນເທິງ ຮ້ານຄາຣາໂອເກະ ແລະ ຮ້ານນວດ ສ່ວນກິດຈະການອື່ນໆ ສາມາດດຳເນີນໄດ້ປົກກະຕິ ແຕ່ໃຫ້ມີມາດຕະການປ້ອງກັນຂັ້ນພື້ນຖານ ເປັນຕົ້ນການກວດອຸນຫະພູມ ແລະ ສະໜອງນ້ຳຢາລ້າງມື ປິດໂຮງຮຽນ ແລະ ສະຖາບັນການສຶກສາຕ່າງໆທົ່ວປະເທດຊົ່ວຄາວ ຈົນກວ່າຈະມີການປ່ຽນແປງ ພ້ອມນີ້ກໍໃຫ້ພິຈາລະນາໃຫ້ໂຮງຮຽນມີແບບວິທີການຮຽນ-ການສອນໂດຍຜ່ານລະບົບອອນລາຍ ໂທລະພາບ ວິທະຍຸ ໜັງສືພິມ ແລະ ອື່ນໆ ກຳນົດສະຖານທີ່ໃນການກັກບໍລິເວນ 14 ວັນ ສຳລັບຜູ້ທີ່ເດິນທາງມາຈາກປະເທດທີ່ມີຄວາມສ່ຽງ (ລວມທັງແຮງງານລາວ-ນັກສຶກສາລາວ ແລະ ປະຊາຊົນລາວທີ່ອາໄສຢູ່ຕ່າງປະເທດ) ໃຫ້ເລື່ອນການເດີນທາງກັບຄືນປະເທດຈົນກວ່າສະຖານະການທົ່ວໂລກຈະມີທ່າອ່ຽງທີ່ດີຂຶ້ນ.
（ໄຊພອນ）
