 |
ພາບປະກອບ
ປັດຈຸບັນ ພະຍາດພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ກໍາລັງລະ ບາດຢູ່ຫຼາຍປະເທດໃນໂລກ ຂ້າຊີວິດມະນຸດໄປແລ້ວຫຼາຍພັນຄົນ ຫຼາຍປະເທດຈຶ່ງໄດ້ມີມາດຕະການຄວບຄຸມ ແລະ ປ້ອງກັນດ້ວຍຫຼາຍວິທີ ສະເພາະ ສປປ ລາວ ເຖິງວ່າຍັງບໍ່ມີກໍລະນີຕິດເຊື້ອພະຍາດດັ່ງກ່າວ ແຕ່ໄດ້ເອົາໃຈໃສ່ຢ່າງຈິງຈັງ ໃນການປ້ອງກັນ ແລະ ຄວບຄຸມຢ່າງເຄັ່ງຄັດ ການລະບາດຂອງພະຍາດດັ່ງກ່າວໃນບັນດາປະເທດໃກ້ຄຽງ ໄດ້ສົ່ງຜົນກະທົບໂດຍກົງຕໍ່ຜູ້ປະກອບການຂະແໜງຕ່າງໆຂອງລາວເປັນຈໍານວນບໍ່ໜ້ອຍ. ທ່ານນາງ ເກດ ແສງດາລາ ແມ່ຄ້າຂາຍຜັກຕະຫຼາດໜອງບົວທອງ ກໍໄດ້ວ່າ: ພາຍຫຼັງທີ່ມີການລະບາດຂອງພະຍາດ COVID-19 ຢູ່ ສປ ຈີນ ເປັນຕົ້ນມາ ໄດ້ສົ່ງຜົນກະທົບຕໍ່ການຄ້າຂາຍຂອງຕົນຢ່າງຊັດເຈນ ເຊິ່ງນອກຈາກຈະເຮັດໃຫ້ການຄ້າຂາຍພົບຄວາມຫຍຸ້ງຍາກແລ້ວ ໄລຍະ 2-3 ອາທິດຜ່ານມານີ້ ລູກຄ້າທີ່ມີໜ້ອຍຢູ່ແລ້ວ ຍິ່ງຫຼຸດລົງຫຼາຍເທົ່າ ສ່ວນລາຄາຂອງພືດຜັກຍັງຄືເກົ່າ ເຊິ່ງບັນຫາດັ່ງກ່າວໄດ້ສົ່ງຜົນກະທົບຕໍ່ເສດຖະກິດຂອງຄອບຄົວຕົນຫຼາຍສົມຄວນ.
ສະຖານະການ ແຜ່ລະບາດ ເຊື້ອພະຍາດ ໂຄໂຣນາ ສາຍພັນໃໝ່ ຫລື ໂຄວິດ-19 ໃນອາຊີ ພວມເພີ່ມທະວີ ຄວາມຮຸນແຮງຂຶ້ນ ຢ່າງຕໍ່ເນື່ອງ ເຖິງແມ່ນວ່າ ຈີນ ຈະມີລາຍງານ ຜູ້ຕິດເຊື້ອລາຍໃໝ່ຫລຸດລົງ ຫລັງຈາກ ບໍ່ພົບຜູ້ຕິດເຊື້ອເພີ່ມຂຶ້ນ ເປັນຄັ້ງທຳອິດ ໃນເມືອງອູຮັນ ເປັນສູນກາງ ແຜ່ລະບາດ ແຕ່ຢ່າງໃດກໍ່ດີ ສະຖານະການ ແຜ່ລະບາດ ໃນຈີນ ຍັງບໍ່ສາມາດ ໄວ້ວາງໃຈໄດ້ ເນື່ອງຈາກ ຈຳນວນ ຜູ້ຕິດເຊື້ອ ທີ່ເດີນທາງມາຈາກ ຕ່າງປະເທດ ຍັງເພີ່ມຂຶ້ນ ຕໍ່ເນື່ອງ ຫລ້າສຸດ ມີຜູ້ຕິດເຊື້ອ ທີ່ເດີນທາງ ມາຈາກ ຕ່າງປະເທດ ເພີ່ມອີກ 34 ຄົນ ຫລາຍທີ່ສຸດ ໃນຮອບ 2 ອາທິດ ຜ່ານມາ ສົ່ງຜົນໃຫ້ ຈົນເຖິງ ຂະນະນີ້ ມີຜູ້ຕິດເຊື້ອ ທີ່ເດີນທາງມາຈາກຕ່າງປະເທດ ໃນຈີນ ຈຳນວນ 189 ຄົນ.
ສ່ວນ ທ່ານ ມູນແຈ ອິນ, ປະທານາທິບໍດີ ສ.ເກົາຫລີ ໃຫ້ຄຳໝັ້ນສັນຍາ ຈະຈັດສັນເງິນ ຊ່ວຍເຫລືອ ສຸກເສີນ ຈຳນວນ 3.900 ລ້ານໂດລາ ສະຫະລັດ ໃຫ້ແກ່ ທຸລະກິດ ຂະໜາດນ້ອຍ ທີ່ໄດ້ຮັບ ຜົນກະທົບ. ນອກນີ້ ຍັງຫລຸດຜ່ອນ ໄລຍະເວລາ ການຈ່າຍເງິນກູ້ ລວມທັງ ໃຫ້ເງິນກູ້ຢືມ ດອກເບ້ຍຕ່ຳ ໃຫ້ແກ່ທຸລະກິດ ຂະໜາດນ້ອຍ ທີ່ໄດ້ຮັບ ຜົນກະທົບ. ຂະນະທີ່ ໃນບັງກລາເທດ ຫລາຍພາກສ່ວນ ວິຈານ ການລວມຕົວກັນ ຂອງ ຊາວມຸດສະລິມ ທີ່ຮ່ວມກັນ ເຮັດພິທີ ທາງສາສະໜາ ໃນເມືອງໄຮປຸຣະ ທາງພາກໃຕ້ ຂອງປະເທດ ເຖິງວ່າ ລັດຖະບານ ສັ່ງຫ້າມ ຊຸມນຸມ ໂດຍທາງ ຜູ້ຈັດງານ ຍັງອ້າງ ວ່າ ມີຜູ້ເຂົ້າຮ່ວມງານ ເຖິງ 25.000 ຄົນ. ກ່ອນໜ້ານີ້ ລັດຖະບານ ບັງກລາເທດ ໄດ້ສັ່ງປິດ ໂຮງຮຽນ ແຕ່ມີລາຍງານ ວ່າ ຫລາຍຄົນ ກັບມາ ໃຊ້ເວລາຫວ່າງ ເດີນທາງໄປທ່ອງທ່ຽວ ຈົນເຖິງ ຂະນະນີ້ ບັງກລາເທດ ມີຜູ້ຕິດເຊື້ອໂຄວິດ-19 14 ຄົນ ແລະ ເສຊີວິດ 1 ຄົນແລ້ວ.
ໃນວັນທີ 18 ມີນາ 2020, ທີ່ຫ້ອງວ່າການສຳນັກງານ ນາຍົກລັດຖະມົນຕີ ໃນໂອກາດເຂົ້າຮ່ວມ ກອງປະຊຸມລັດຖະບານ ເພື່ອປຶກສາຫາລື ກ່ຽວກັບການຕ້ານ ແລະ ສະກັດກັ້ນ ພະຍາດໂຄວິດ-19 ທ່ານ ດຣ.ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ແຈ້ງຕໍ່ສື່ມວນຊົນວ່າ: ເມື່ອບໍ່ດົນມານີ້ໄດ້ມີຂ່າວ ທີ່ໄດ້ມີການເຜີຍແຜ່ຢູ່ ໃນສັງຄົມອອນລາຍ ວ່າມີກໍລະນີຜູ້ຕິດເຊື້ອພະຍາດໂຄວິດ-19 ຢູ່ແຂວງຄຳມ່ວນ, ສະຫວັນນະເຂດ ແລະ ຢູ່ມະຫາວິທະຍາໄລແຫ່ງຊາດ ນະຄອນຫລວງວຽງຈັນ, ຄວາມເປັນຈິງຍັງບໍ່ພົບກໍລະນີ ຜູ້ຕິດເຊື້ອພະຍາດໂຄວິດ-9 ຢູ່ ສປປ ລາວ ເທື່ອ.
（ໄຊພອນ）
