ຄວາມສາມັກຄີພິເສດ ລາວ-ຫວຽດນາມ ຍືນຍົງຕະຫຼອດການ

13:50 2018/08/31

ຍສໝ - ເນື່ອງໃນໂອກາດວັນຊາດ ແຫ່ງ ສາທາລະນະລັດ ສັງຄົມນິຍົມຫວຽດນາມ ຄົບຮອບ 73 ປີ (02/09/1945–02/09/2018) ທ່ານ ຄຳເຜີຍ ແກ້ວກີນນາລີ, ຮອງປະທານຜູ້ປະຈຳການຄະນະກຳມະການຮ່ວມມື ລາວ-ຫວຽດນາມ ໄດ້ສົ່ງບົດຄວາມ ອວຍພອນວັນຊາດ ແລະ ເລົ່າເຖິງມູນເຊື້ອ ສາຍພົວພັນ ພິເສດ ລາວ-ຫວຽດນາມ.

ຄວາມສາມັກຄີພິເສດ ລາວ-ຫວຽດນາມ ຍືນຍົງຕະຫຼອດການ
ທ່ານ ຄຳເຜີຍ ແກ້ວກີນນາລີ, ຮອງປະທານຜູ້ປະຈຳການຄະນະກຳມະການຮ່ວມມື ລາວ-ຫວຽດນາມ.

ໂດຍ ທ່ານ ຄຳເຜີຍ ແກ້ວກີນນາລີ, ຮອງປະທານຜູ້ປະຈຳການຄະນະກຳມະການຮ່ວມມື ລາວ-ຫວຽດນາມ ໄດ້ຂຽນຮ້ອຍຮຽງ ເປັນບົດຄວາມວ່າ:

ລາວ ແລະ ຫວຽດນາມ ແມ່ນສອງປະເທດບ້ານໃກ້ເຮືອນຄຽງທີ່ມີຊາຍແດນຕິດຈອດກັນ ສອງພັນກວ່າກິໂລ ແມັດ, ມີມູນເຊື້ອມິດຕະພາບຕໍ່ກັນມາຢ່າງຊ້ານານ, ມີອຸດົມການ ແລະມີລະບອບການປົກຄອງເດີນຕາມເສັ້ນທາງການພັດທະນາຕາມທິດກ້າວເຂົ້າສູ່ສັງຄົມນິຍົມອັນດຽວກັນ, ນັບແຕ່ໄດ້ສ້າງຕັ້ງສາຍພົວພັນທາງການທູດຫລາຍກວ່າເຄິ່ງສະ ຕະວັດມານີ້ ເຫັນວ່າ ການພົວພັນ ລະຫວ່າງ ສອງພັກ, ສອງລັດ ໄດ້ຜ່ານການທົດສອບ ຂອງການປ່ຽນແປງແຫ່ງຍຸກສະໄໝ ເຊິ່ງມີທັງຂໍ້ສະດວກ ແລະສິ່ງທ້າທາຍນາໆປະການທັງເປັນການຍາກຕໍ່ການຄາດເດົາສະພາບການຜັນແປເຫລົ່າ ນັ້ນ. ແຕ່ອັນສຳຄັນເປັນພິເສດ ແມ່ນປະຊາຊົນສອງຊາດ ມີມູນເຊື້ອແຫ່ງການອູ້ມຊູຊ່ວຍເຫຼືອກັນໃນການປົກປັກຮັກສາ ແລະພັດທະນາປະເທດຊາດຂອງໃຜລາວ. ພາຍຫຼັງ ທີ່ມີພັກກອມມູນິດອິນດູຈີນ ເຊິ່ງແມ່ນ ປະທານ ໂຮ່ ຈີມີນຜູ້ຍຶ່ງໃຫຍ່ ເປັນຜູ້ກໍ່ສ້າງ, ປະຊາຊົນສອງຊາດພວກເຮົາ ໄດ້ສາມັກຕີເປັນຈິດໜຶ່ງໃຈດຽວກັນ ຮ່ວມກັນຕໍ່ສູ້ຍາດເອົາເອກະລາດ ມາໃຫ້ແຕ່ລະປະເທດ ແລະປະຈຸບັນ ພວມພ້ອມກັນກ້າວເດີນໄປສູ້ຄວາມຈະເລີນວັດທະນາ.

ຜ່ານຂະບວນວິວັດດັ່ງກ່າວ ການນຳຂອງສອງຊາດ ໄດ້ສ້າງວິລະກຳອັນຍິ່ງໃຫຍ່ ຈາລຶກໄວ້ໃນໜ້າຄຳປະຫວັດ ສາດຂອງສອງປະເທດໂດຍການນຳຮຸ່ນອາວຸໂສ ເຊັ່ນ: ປະທານ ໂຮ່ ຈີມີນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ແລະ ສະຫາຍການນໍາອື່ນໆໄດ້ຈົກຈິດຈົກໃຈໃສ່ກັນ ແລະຍຶດຫມັ້ນຮ່ວມກັນຢ່າງຫນຽວແຫນ້ນ ສ້າງຄວາມສາມັກຄີ ເປັນຈິດຫນຶ່ງໃຈດຽວກັນ, ໄດ້ຮ່ວມສຸກຮ່ວມທຸກ, ເຂົ້າເມັດຫັກຜັກເສັ້ນຫນື່ງກໍ່ບິແບ່ງກັນ, ຮ່ວມຂຸມຄອງອັນດຽວກັນ. ຄວາມຜູກພັນມິດຕະພາບອັນເລິກເຊິ່ງໃນການຕໍ່ສູ້ກູ້ຊາດໃນເມື່ອກ່ອນ ໄດ້ສ້າງພື້ນຖານມິດຕະ ພາບອັນເປັນມູນເຊື້ອທີ່ຫນັກແຫນ້ນ ແລະ ກ້າແກ່ນໃຫ້ສອງຊາດລາວ ແລະ ຫວຽດນາມ ຈົນເຖິງທຸກວັນນີ້; ໃນເວລາຫຼາຍທົດສະຫວັດຜ່ານມາ, ເຖິງເພື່ອນເອງຍັງມີຄວາມຫຍຸ້ງຍາກຫຼາຍດ້ານ ແຕ່ເພື່ອນກໍ່ຍັງຮັບເອົານັກຮຽນ-ນັກສຶກສາ ລາວ ໄປສຶກສາຮໍ່າຮຽນດ້ານວິຊາສະເພາະຕ່າງໆ ຢູ່ຫວຽດນາມ ເຊິ່ງໄດ້ສ້າງເປັນທຶນຮອນອັນມະຫາສານ ໃຫ້ການປະຕິວັດລາວ;  ລູກຫຼານຂອງປະຊາຊົນລາວ ຫຼາຍຮຸ່ນຫຼາຍສະໄໝ ທີ່ເຄີຍໄປຮຽນຮູ້ ຢູ່ຫວຽດນາມ ໂດຍພວກເພິ່ນໄດ້ ໃຊ້ຊີວິດໃນໄວໜຸ່ມແຫນ້ນຂອງຕົນ ຢູ່ປະເທດຫວຽດນາມ, ບຸກຄົນເຫລົ່ານີ້ ໄດ້ເຂົ້າໃຈແຈ້ງເຖິງປະຫວັດສາດ ສາຍພົວພັນອັນເປັນມູນເຊື້ອ ຂອງສອງປະເທດ ເຊິ່ງພວກເພິ່ນໄດ້ກາຍເປັນສັກຂີພິຍານ, ຫນໍ່ແຫນງຜູ້ສືບທອດ ແລະໄດ້ທຸ່ມເທເຮື່ອແຮງ, ສະຕິປັນຍາເຂົ້າຮ່ວມເຄື່ອນໄຫວ ເພື່ອຊຸກຍູ້, ຖະຫນຸຖະຫນອມ, ເພີ່ມພູນຄູນສ້າງ ແລະ ເສີມຂະຫຍາຍມິດຕະພາບອັນເປັນມູນເຊື້ອ ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງຊາດລາວ-ຫວຽດນາມ ໃຫ້ມີຄວາມຈະເລີນງອກງາມ ຄືດັ່ງທຸກວັນນີ້ ແລະໄດ້ກະຈາຍລົງສູ່ທ້ອງຖິ່ນຮາກຖານໃນທຸກຂົງເຂດວຽກງານ ໃນທົ່ວປະເທດ ເຊິ່ງຂ້າພະເຈົ້າ ກໍ່ນັບວ່າເປັນໜື່ງໃນຜູ້ທີ່ໂຊກດີ ທີ່ໄດ້ສຶກສາຮໍ່າຮຽນຈາກປະເທດຫວຽດນາມ.

ໃນສະໄໝຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ເຊິ່ງເປັນສັດຕູຕົວດຽວກັນ, ປະຊາຊົນສອງຊາດ ໄດ້ຄຽງບ່າຄຽງໄລ່ກັນ ເພື່ອຕໍ່ສູ້ກູ້ຊາດດ້ວຍຄວາມເສຍສະຫຼະສູງ ເພື່ອຜົນປະໂຫຽດລວມ ຂອງສອງຊາດ, ທະຫານ ແລະປະຊາຊົນຫວຽດນາມ ອ້າຍນ້ອງ ໄດ້ປະຕິບັດພັນທະສາກົນອັນສູງສົ່ງຂອງຕົນ, ຕັ້ງໜ້າສະໜັບສະໜູນພາລະກິດປົດປ່ອຍຊາດ ແລະ ຄວາມເປັນເອກະລາດຂອງຊາດລາວ, ປະຊາຊົນຫວຽດນາມ ໄດ້ສົ່ງລູກຮັກຫຼານແພງອັນປະເສີດຂອງຕົນ ມາຊ່ວຍເຫຼືອຕາມຄວາມຮຽກຮ້ອງຕ້ອງການຂອງການປະຕິວັດລາວ;  ບັນດານັກຮົບອາສາສະໝັກຫວຽດນາມ ໄດ້ຮ່ວມສູ້ຮົບຮ່ວມຂຸມຄອງດຽວກັນກັບທະຫານ ແລະປະຊາຊົນລາວ ພ້ອມກັນຕໍ່ສູ້ດ້ວຍຄວາມອົງອາດກ້າຫານ, ຍາດເອົາໄຊຊະນະ ແຕ່ນ້ອຍເຖິງໃຫຍ່ ຈົນໄດ້ຮັບໄຊຊະນະສົມບູນ, ຍາດເອົາເອກະລາດ ແລະຜືນແຜ່ນດີນອັນຄົບຖ້ວນມາໃຫ້ປະຊາຊາຊົນສອງຊາດ. ນັກຮົບອາສາສະໝັກດັ່ງກ່າວ ຈຳນວນບໍ່ໜ້ອຍ ໄດ້ມາເສຍສະຫຼະເລືອດເນື້ອ, ຊີວິດໃນໄວຫນຸ່ມຂອງຕົນຢູ່ຜືນແຜ່ນດິນລາວແຫ່ງນີ້; ປະຊາຊົນລາວບັນດາເຜົ່າ ຍາມໃດກໍມີຄວາມຈົດຈຳຈາລຶກຕະຫຼອດມາ ເຖິງຄຸນງາມຄວາມດີອັນໃຫຍ່ຫຼວງດັ່ງກ່າວ ແລະ ໄດ້ຮ່ວມກັນສ້າງອະນຸສາວະລີໃຫ້ແກ່ນັກຮົບນິລະນາມເຫຼົ່ານັ້ນ ທີ່ໄດ້ສະຫລະເລືອດເນື້ອ ແລະ ຊີວິດຂອງຕົນ ເຂົ້າໃນພາລະກິດອັນຍິ່ງໃຫຍ່ຂອງສອງຊາດ ລາວ ແລະ ຫວຽດນາມ.

ເມື່ອເຂົ້າສູ່ຍຸກສະໄຫມໃໝ່, ສາຍພົວພັນມິດຕະພາບອັນເປັນມູນເຊື້ອຂອງສອງປະເທດ ລາວ-ຫວຽດນາມ ຍິ່ງໄດ້ຮັບການຖະນຸຖະຫນອມ, ເພີ່ມພູນຄູນສ້າງ ແລະເສີມຂະຫຍາຍຕໍ່ເຕີມຂຶ້ນຕື່ມ ເຕັມໄປດ້ວຍຄວາມມີຊີວິດຊີວາອັນ ໃໝ່; ການພົວພັນທີ່ເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງປະເທດໄດ້ຮັບການເປີດກວ້າງ, ເຂົ້າສູ່ລ່ວງເລິກຢ່າງຮອບດ້ານ ແລະແທດຕົວຈິງກວ່າເກົ່າ; ການໄປມາຫາສູ່ກັນ ລະຫວ່າງ ການນໍາຂັ້ນສູງ ຂອງສອງພັກ, ສອງລັດນັບມື້ນັບໃກ້ຊິດສະໜິດສະໜົມກັນຂຶ້ນຕື່ມ, ໄດ້ສ້າງຄວາມເຊື່ອຫມັ້ນຢ່າງຫນັກແຫນ້ນ ແລະ ສ້າງຄວາມໄວ້ເນື້ອເຊື່ອໃຈກັນຢ່າງບໍ່ຢຸດຢັ້ງ, ການພົວພັນດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບ ແມ່ນມີຄວາມໝັ້ນທ່ຽງເຂັ້ມແຂງ ໄດ້ກາຍເປັນເສົາຄໍ້າ, ກ້ອນກຳລັງແຮງ ແລະ ປັດໄຈສຳຄັນຕົ້ນຕໍໃຫ້ແກ່ການເສີມຂະຫຍາຍສາຍພົວພັນຮ່ວມມືຮອບດ້ານ ອັນສະເຫມີຕົ້ນສະເຫມີປາຍ ລະຫວ່າງ ສອງປະເທດ ແນໃສ່ນຳເອົາຜົນປະໂຫຍດລວມຕົວຈິງ ມາສູ່ປະຊາຊົນສອງຊາດ ເຊິ່ງສາມາດເວົ້າໄດ້ວ່າ  ການພົວພັນ ລະຫວ່າງ ສອງປະເທດລາວ-ຫວຽດນາມ ຖືເປັນແບບຢ່າງທີ່ໃສແຈ້ງ ຂອງການພົວພັນ ແລະ ຮ່ວມມືຮອບດ້ານຫນື່ງບໍ່ມີສອງໃນໂລກແຫ່ງນີ້.

ສອງປະເທດ ລາວ ແລະ ຫວຽດນາມ ໄດ້ສືບຕໍ່ປະຕິບັດຕາມແຜນພັດທະນາເສດຖະກິດ-ສັງຄົມ ທີ່ຕົນວາງອອກ, ໃນນັ້ນ ຫວຽດນາມ ໄດ້ຕັ້ງຫນ້າສຸມໃສ່ຈັດຕັ້ງຜັນຂະຫຍາຍ“ແຜນພັດທະນາເສດຖະກິດ-ສັງຄົມ  5 ປີຄັ້ງທີ XII” ຂອງຫວຽດນາມ; ສ່ວນ ສປປ ລາວ ກໍໄດ້ສືບຕໍ່ຈັດຕັ້ງປະຕິບັດຍຸດທະສາດ “ຫັນຈາກປະເທດທີ່ບໍ່ມີຊາຍແດນອອກສູ່ທະເລ ກາຍເປັນປະເທດເຊື່ອມຕໍ່ໃນອະນຸພາກພື້ນ” ແລະເອົາໃຈໃສ່ສູ້ຊົນຈັດຕັ້ງປະຕິບັດ  “ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII” ຂອງຕົນ; ອັນສຳຄັນ ໃນນັ້ນ ສອງປະເທດ  ໄດ້ກຳນົດຍຸດທະສາດການພັດທະນາເຊື່ອມຕໍ່ເສັ້ນທາງຄົມມະນາຄົມ ລະຫວ່າງ ລາວ-ຫວຽດນາມ, ໂຄງການ “ກໍ່ສ້າງເສັ້ນທາງດ່ວນວຽງຈັນ (ລາວ) - ຮ່າໂນ້ຍ (ຫວຽດນາມ)”, ໂຄງການທາງລົດໄຟ ວຽງຈັນ-ທ່າແຂກ-ເຕິ່ນເອີບ-ຫວຸງອາງ ແລະໂຄງການຮ່ວມມືພັດທະນາທ່າທຽບເຮືອ 1, 2 ແລະ 3 ຂອງທ່າເຮືອຫວຸງອາງ ໃຫ້ກາຍເປັນທ່າເຮືອສາກົນ ລາວ-ຫວຽດນາມ... ເຊິ່ງກໍເປັນຫນຶ່ງໃນການສ້າງເສັ້ນທາງເຊື່ອມຕໍ່ ເຂົ້າໃນພາກພື້ນ ຕາມທິດຮ່ວມມືສົ່ງເສີມພັດທະນາແລວທາງເສດຖະກິດ ຕາວັນອອກ-ຕາວັນຕົກ ໃຫ້ເປັນຮູບປະທຳຫລາຍຂຶ້ນ ເພື່ອຊຸກຍູ້ສົ່ງເສີມການທ່ອງທ່ຽວ, ການຄ້າ, ການລົງທືນ ເຊິ່ງສອງປະເທດ ລ້ວນແຕ່ມີທ່າແຮງ.

ໃນກອງປະຊຸມຄັ້ງທີ່ 40, ປະຈຳປີ 2018, ຂອງຄະນະກໍາມະການຮ່ວມມື ທະວິພາຄີ ລະຫວ່າງ ສອງລັດຖະບານລາວ ແລະ ຫວຽດນາມທີ່ຜ່ານມາ ໄດ້ເຫັນດີເປັນເອກະພາບຕົກລົງຮ່ວມມືກັນຫຼາຍບັນຫາເຊັ່ນ: ການເຊື່ອມຈອດຕາຂ່າຍໄຟຟ້າ ແລະການຊື້ຂາຍໄຟຟ້າລະຫວ່າງສອງປະເທດໄດ້ມີບາດກ້າວຂະຫຍາຍຕົວໃໝ່, ຫຼາຍໂຄງການພະລັງງານໄຟຟ້າຂອງລາວ ໄດ້ຖືກລົງນາມເພື່ອຂາຍໄຟໄປຫວຽດນາມ. ການເຊື່ອມຈອດດ້ານຄົມມະນາຄົມ ກໍ່ໄດ້ຮັບການຮ່ວມມືພັດທະນານຳກັນ ແລະໄດ້ຮັບການເອົາໃຈໃສ່ຕິດຕາມຊຸກຍູ້ຢ່າງໃກ້ຊິດຈາກສອງລັດຖະບານ, ອັນພົ້ນເດັ່ນແມ່ນ ລັດຖະບານ ສສ.ຫວຽດນາມ ເຫັນດີໃຫ້ສປປ.ລາວ ເຂົ້າມາຮ່ວມມືລົງທຶນພັດທະນາທ່າເຮືອຫວຸງອາງ 1, 2 ແລະ 3 ເພື່ອສ້າງເງື່ອນໄຂສະດວກໃຫ້ລາວ ມີທາງອອກສູ່ທະເລ ແລະ ພັດທະນາທ່າເຮືອດັ່ງກ່າວ ໃຫ້ກາຍເປັນທ່າເຮືອສາກົນຂອງລາວ, ນອກນັ້ນ ສອງປະເທດ ຍັງໄດ້ພ້ອມກັນສືບຕໍ່ຊຸກຍຸ້ໂຄງການສ້າງເສັ້ນທາງລົດໄຟ ແຕ່ວຽງຈັນ-ທ່າແຂກ-ເຕິ່ນເອີບ-ຫວຸງອາງ ແລະ ໂຄງການເສັ້ນທາງດ່ວນຮ່າໂນ້ຍ-ວຽງຈັນ, ໂຄງການພັດທະນາເຂື່ອນໄຟຟ້າ ຈຸດຫຼວງພະບາງຮ່ວມກັນ ແລະການລົງທຶນ, ການຄ້າຂາຍຕາມບໍລິເວນຊາຍແດນລາວ-ຫວຽດນາມ ໃຫ້ປະກົດຜົນເປັນຈິງ ໃນອະນາຄົດອັນໃກ້ນີ້; ບັນດາໂຄງການຮ່ວມມືເຫຼົ່ານີ້ ຖືເປັນໂຄງການສັນຍະລັກ ແຫ່ງການຮ່ວມມືພັດທະນາ ທີ່ມີປະສິດທິຜົນ, ແທດເຖິງຕົວຈິງ, ຍືນຍົງຂະນົງແກ່ນທີ່ສຸດ ລະຫວ່າງສອງປະເທດ ເຊິ່ງເປັນການເອື້ອອຳນວຍຄວາມສະດວກເຊິ່ງກັນແລະກັນທັງເປັນການສ້າງແຮງບັນດານໃຈຕໍ່ຄວາມໄຝ່ຝັນ ຂອງທັງສອງປະເທດ ທີ່ຢາກເຫັນການພັດທະນາຂອງປະຊາຊົນລາວ-ຫວຽດນາມນັ້ນໃຫ້ເປັນຮູບປະທຳ ເຊິ່ງປະຈຸບັນພວມເກີດເປັນຮູບຮ່າງຂຶ້ນມາ ແລະ ຈະຄ່ອຍໆກາຍເປັນຈິງໃນບໍ່ດົນນີ້.

ນັກລົງທືນຫວຽດນາມ ໄດ້ເຂົ້າມາລົງທຶນຢູ່ລາວຫຼາຍທີ່ສຸດ ແລະ ເປັນປະເທດຄູ່ຄ້າໃຫຍ່ອັນດັບຕົ້ນໆ ຂອງລາວ. ປີ 2017 ຜ່ານມານີ້, ມູນຄ່າການຄ້າ ລະຫວ່າງສອງຝ່າຍ ບັນລຸໄດ້ 936,8 ລ້ານໂດລາສະຫະລັດ, ເພີ່ມຂຶ້ນ 13,7% ເມື່ອທຽບໃສ່ໄລຍະດຽວກັນຂອງປີຜ່ານມາ. ມູນຄ່າການລົງທຶນຂອງຫວຽດນາມ ຢູ່ລາວປະມານ 3,7 ຕື້ໂດລາສະຫະລັດ ສ່ວນໃຫ່ຍແມ່ນເຂົ້າໃນຂະແໜງເຂື່ອນໄຟຟ້ານ້ຳຕົກ, ບໍ່ແຮ່, ກະສິກຳ, ການບໍລິການ ແລະ ຂະແໜງການ ອື່ນໆຂອງລາວ. ບັນດາວິສາຫະກິດຂອງຫວຽດນາມ ທີ່ເຂົ້າມາລົງທຶນຢູ່ລາວ ບໍ່ໄດ້ຄຳນຶງແຕ່ຜົນປະໂຫຍດດ້ານເສດຖະກິີດຂອງຕົນເທົ່ານັ້ນ, ແຕ່ພວກເຂົາເຈົ້າ ໄດ້ຊ່ວຍສ້າງໂຄງການທີ່ມີຜົນດີຕໍ່ຊີວິດການເປັນຢູ່ຂອງປະຊາຊົນລາວ ເຊັ່ນ: ໂຮງຮຽນ, ໂຮງໝໍ, ເສັ້ນທາງເປັນຕົ້ນ ທັງນີ້ ກໍເພື່ອຊ່ວຍຍົກລະດັບຊີວິດການເປັນຢູ່ຂອງປະຊາຊົນລາວ ໃຫ້ດີຂຶ້ນກວ່າແຕ່ກ່ອນຫລາຍ. ສິ່ງທີ່ຫນ້າຊົມເຊີຍ ແລະເຫັນປະຈັກຕາ ກໍແມ່ນໂຄງການສ້າງເຂື່ອນໄຟຟ້າເຊຂະໝານ 1 ເຊິ່ງແມ່ນສະຫະບໍລິສັດຊົງດາ ເປັນຜູ້ລົງທຶນ ມາເຖິງປະຈຸບັນ ໄດ້ດໍາເນີນການຜະລິດ ແລະໄດ້ຮັບຜົນເປັນຢ່າງດີ ເຊິ່ງໄດ້ຂາຍກະແສໄຟຟ້າໄປຍັງຫວຽດນາມ ສ້າງລາຍຮັບຫລາຍລ້ານໂດລາ ແລະໄດ້ຖອກພັນທະການເງິນໃຫ້ລັດຖະບານລາວ ໄດ້ຫລາຍສົມຄວນ. ສຳລັບ ສປປ ລາວ ກໍ່ມີການສົ່ງສິນຄ້າໄປຂາຍຢູ່ຫວຽດນາມ ເພີ່ມຂຶ້ນ ໂດຍສະເພາະແມ່ນ ຜະລິດຕະພັນສິນຄ້າກະສິກຳ ທີ່ເປັນທ່າແຮງຂອງລາວ ເຊັ່ນ: ເຂົ້າສານ, ກາເຟ, ໝາກກ້ວຍ ແລະໝາກໂມອື່ນໆເປັນຕົ້ນ... ນັບມື້ນັບໄດ້ຮັບຄວາມນິຍົມຊົມຊອບຈາກຜູ້ບໍລິໂພກຂອງຫວຽດນາມ.

ການແລກປ່ຽນດ້ານວັດທະນະທຳລາວ-ຫວຽດນາມ ນັບມື້ນັບເພີ່ມຫຼາຍຂຶ້ນ, ນັກສະແດງລາວ ແລະຫວຽດນາມ ໄດ້ຮ່ວມກັນສະແດງລະຄອນເລື່ອງ: “ຮ່ວມຂຸມຄອງດຽວກັນ” ເຊິ່ງເປັນການສະແດງສີລະປະວັນນະຄະດີເຜີຍແຜ່ປະຫວັດການຕໍ່ສູ້ກູ້ຊາດ ສະທ້ອນໃຫ້ເຫັນ ມູນເຊື້ອແຫ່ງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງປະເທດ ເຊິ່ງໄດ້ຮັບຄວາມນິຍົມຊົມຊອບ ແລະເຮັດໃຫ້ປະຊາຊົນສອງປະເທດ ມີຄວາມເອກອ້າງ ແລະ ປະທັບໃຈຫຼາຍທີ່ສຸດ. ໃນຊຸມປີຜ່າມາ, ຈຳນວນນັກທ່ອງທ່ຽວຫວຽດນາມ ໄດ້ມາທ່ອງທ່ຽວຢູ່ລາວ ນັບມື້ນັບຫຼາຍຂຶ້ນ ແລະຈຳນວນຄົນລາວ ໄປທ່ອງທ່ຽວ ຫລື ທຳມາຄ້າຂາຍກັບຊາວຫວຽດນາມນັບມື້ນັບຫຼາຍຂຶ້ນ; ຈໍານວນນັກສຶກສາລາວ ທີ່ໄດ້ຮັບທຶນການສຶກສາຂອງລັດຖະບານຫວຽດນາມ ນັບມື້ນັບເພີ້ມຂື້ນ, ບໍ່ນັບທຶນແຂວງແຮກສ່ຽວ ແລະໄປຮຽນດ້ວຍທຶນສ່ວນຕົວ, ມາຮອດປະຈຸບັນ ນັກສຶກສາລາວ ທີ່ໄປຮຽນ ຢູ່ ສສ ຫວຽດນາມ ແມ່ນຫຼາຍທີ່ສຸດໃນຈຳນວນນັກສຶກສາລາວ ທີ່ໄປຮຽນຢູ່ຕ່າງປະເທດ ແລະສາມາດເວົ້າໄດ້ວ່າ ສສ ຫວຽດນາມ ໄດ້ກໍ່ສ້າງບຸກຄະລາກອນໃຫ້ລາວ ຫລາຍທີ່ສຸດໃນແຕ່ລະປີ ແລະ ບຸກຄະລາກອນເຫລົ່ານັ້ນ ໄດ້ກາຍເປັນພະນັກງານຫລັກແຫລ່ງ ເຊິ່ງໄດ້ຖືກຊັບຊ້ອນ ແລະບັນຈຸເຂົ້າໃນບັນດາກະຊວງ, ຂະແຫນງການ, ອົງການຈັດຕັ້ງຕ່າງໆ ນັບທັງບັນດາແຂວງ ໃນທົ່ວປະເທດ.

ດ້ານສາທາລະນະສຸກ ກໍ່ໄດ້ຮັບການເສີມຂະຫາຍເປັນຢ່າງດີ, ໂດຍສະເພາະ ແມ່ນການບໍລິການດ້ານການປິ່ນປົວພະຍາດ ຢູ່ບັນດາທ້ອງຖິ່ນທີມີຊາຍແດນຕິດຈອດກັນ, ແພດຫວຽດນາມ ໄດ້ຈັດຕັ້ງການມາກວດກາສຸຂະພາບ ແລະ ປິ່ນປົວພະຍາດຢູ່ ບັນດາແຂວງຊາຍແດນ ຕາມການສະເຫນີຂອງລາວ; ອັນສຳຄັນໃນນັ້ນ ລັດຖະບານຫວຽດນາມ ໄດ້ຕົກລົງໃຫ້ ການຊ່ວຍເຫຼືອລ້າ “ໂຄງການກໍ່ສ້າງໂຮງໝໍມິດຕະພາບ ລາວ-ຫວຽດນາມ ຢູ່ ສອງແຂວງຫົວພັນ ແລະ ຊຽງຂວາງ” ເຊິ່ງເປັນສອງໂຄງການກໍ່ສ້າງໂຮງຫມໍຂະຫນາດໃຫຍ່, ທັນສະໄຫມ ແລະ ຄົບວົງຈອນ ເພື່ອຮັບໃຊ້ປິ່ນປົວປະຊາຊົນລາວຢູ່ບັນດາເຂດພາກເຫນືອ ເຊິ່ງຄາດວ່າຈະກໍ່ສ້າງສຳເລັດ ໃນປີ 2020, ນີ້ ສະແດງໃຫ້ເຫັນເຖິງມິດຈິດມິດໃຈຂອງສະຫາຍຫວຽດນາມ ເຖິງວ່າຕົນເອງ ຍັງພົບຄວາມຫຍຸ້ງຍາກບໍ່ຫນ້ອຍ ແຕ່ກໍຍັງຕັດສິນໃຈບິແບ່ງໃຫ້ການຊ່ວຍເຫລືອແບ່ງສຸກແບ່ງທຸກກັບພັກ-ລັດຖະບານລາວ ຕະລອດມາ ເຊິ່ງກໍໄດ້ຮັບການຍ້ອງຍໍຊົມເຊີຍຈາກປະຊາຊົນລາວຢ່າງກວ້າງຂວາງ; ສິ່ງເຫລົ່ານີ້ ໄດ້ເປັນການປະກອບສ່ວນເຂົ້າໃນການພັດທະນາເສດຖະກິດໃຫ້ແກ່ ສປປ ລາວ ເວົ້າລວມ, ເວົ້າສະເພາະ ກໍແມ່ນຂະແຫນງສາທາລະນະສຸກ ຂອງລາວ ໃຫ້ມີຄວາມເຂັ້ມແຂງ ເຊິ່ງ, ພັກ, ລັດ ແລະ ປະຊາຊົນລາວ ຍາມໃດກໍຮູ້ບຸນຄຸນ, ສະແດງຄວາມຂອບອົກຂອບໃຈ ຕໍ່ການຊ່ວຍເຫລືອອັນລໍ້າຄ່າ ແລະທັນການ ຂອງເພື່ອນຫວຽດນາມ.

ໃນອານາຄົດ, ສອງປະເທດ ພວກເຮົາຕ້ອງສືບທອດພາລະກໍາປະຕິວັດອັນຍິ່ງໃຫຍ່ທີ່ສອງຊາດ ໄດ້ມອບຫມາຍໃຫ້ ໂດຍສືບຕໍ່ເສີມຂະຫຍາຍມິດຕະພາບອັນຍີງໃຫ່ຍ, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງປະເທດຢ່າງໜັກແໜ້ນກ້າວເຂົ້າສູ່ລວງກວ້າງ ແລະລວງເລິກ ດ້ວຍການສ້າງຄວາມໄວ້ເນື້ອເຊື່ອໃຈໃນລະດັບສູງໃຫ້ແກ່ກັນແລະກັນ, ໃນນັ້ນ ເອົາໃຈໃສ່ຖອດຖອນບົດຮຽນໃນດ້ານການຊຸກຍູ້ການປະຕິຮູບທີ່ເປັນຜົນດີໃຫ້ແກ່ການພັດທະນາ, ຊອກຄົ້ນຄວ້າ, ຮຽນຮູທິດສະດີການເມືອງ ແນໃສ່ສ້າງພຶດຕິກຳ ໃນການສ້າງສາສັງຄົມນິຍົມ ໃຫ້ເປັນຮູບປະທຳ, ສືບຕໍ່ຮັດແໜ້ນການໄປມາຫາສູ່ກັນລະຫວ່າງສອງພັກ, ສອງລັດຖະບານ, ນັບທັງພາກສ່ວນນິຕິບັນຍັດ ແລະລະດັບທ້ອງຖີ່ນ; ສອງປະເທດ ຕ້ອງໄດ້ສືບຕໍ່ຮ່ວມມື, ໃຫ້ການສະໜັບສະໜູນກັນ ໃນບັນຫາຕ່າງໆ ທີ່ກ່ຽວພັນເຖິງຜົນປະໂຫຍດ ແລະ ຊະຕາກຳອັນດຽວກັນ, ພ້ອມກັນປົກປັກຮັກສາສິດ ແລະ ຜົນປະໂຫຍດອັນຊອບທໍາຂອງຕົນ. ບໍ່ພຽງເທົ່ານັ້ນ ພວກເຮົາ ຈະຕ້ອງໄດ້ຮ່ວມກັນສຶກສາຄົ້ນຄວ້າເຖິງຄວາມຈຳເປັນ ການເຊື່ອມຈອດກັນດ້ານຍຸດທະສາດ ແນໃສ່ພັດທະນາເສດຖະກິດ ຂອງແຕ່ລະປະເທດໃຫ້ມີຄວາມເຂັ້ມແຂງແບບຍືນຍົງ ຍ້ອນສອງປະເທດພວກເຮົາ ໄດ້ສ້າງວິລະກຳ ແລະ ເຄີຍຮ່ວມຊະຕາກຳອັນດຽວກັນ ໃນໄລຍະຜ່ານມາ. ແນ່ນອນວ່າ ສສ ຫວຽດນາມ ມີທ່າແຮງທີ່ເປັນພື້ນຖານໂຄງລ່າງອັນຫນັກແຫນ້ນ, ແຂງແກ່ນເຊິ່ງເປັນເງື່ອນໄຂສະດວກ ທັງເປັນເຄື່ອງມືທີ່ພ້ອມຊ່ວຍຂັບເຄື່ອນພັດທະນາເສດຖະກິດຂອງຊາດ ໃຫ້ຈະເລີນເຕີບໂຕຢ່າງວ່ອງໄວໃນລະດັບພາກພື້ນ ແລະ ສາກົນ, ແຕ່ພ້ອມດຽວກັນນັ້ນ ເສດຖະກິດຂອງລາວ ຍັງອ່ອນນ້ອຍ ແລະ ບອບບາງຈຶ່ງຮຽກຮ້ອງໃຫ້ຫວຽດນາມອ້ານນ້ອງ ຕ້ອງໄດ້ສະໜັບສະໜູນເສີມຂະຫຍາຍທ່າແຮງດ້ານພູມິປະເທດ, ທ່າ­ແຮງທີ່ບົ່ມຊ້ອນ ແລະຂໍ້ໄດ້ປຽບຂອງລາວເພື່ອສ້າງສາພັດທະນາປະເທດຊາດ ແລະ ກ້າວຫນ້າເດີນຕາມເສັ້ນທາງສັງຄົມນິຍົມຮ່ວມກັນ, ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດ ດັ່ງຄຳສັ່ງສອນ ຂອງປະທານ ໂຮ່ຈິມິນ ທີ່ວ່າ “ຊ່ວຍເພື່ອນ ກໍ່ຄືຊ່ວຍຕົນເອງ”.

ຄຳສຸພາສິດລາວກ່າວໄວ້ວ່າ “ໄມ້ລຳດຽວລ້ອມຮົ້ວບໍ່ໄຂວ່, ໄຜ່ບໍ່ພ້ອມແປງບ້ານບໍ່ເຮືອງ”, ຄົນຫວຽດນາມມັກເວົ້າວ່າ “Một cây làm chẳng nên non, Ba cây chụm lại thành hòn núi cao”. ຂໍໃຫ້ສອງປະເທດພວກເຮົາ ຢຶດຫມັ້ນໃນມູນເຊືອໃນອັນດີງາມ ທີ່ການນຳຮຸ່ນອາວຸໂສ ໄດ້ສ້າງໄວ້, ຂ້າພະເຈົ້າ ເຊື່ອແນ່ວ່າ ອະນາຄົດອັນສົດໄສທີ່ເປັນມູນເຊື້ອແຫ່ງການພົວພັນມິດຕະພາບທີ່ຍີງໃຫ່ຍ, ຄວາມສາມັກຄີພິເສດ ແລະ ການຮ່ວມມືແບບຮອບດ້ານ ລະຫວ່າງສອງປະເທດລາວ ແລະຫວຽດນາມ ຈະຂະຫນານຄຽງຄູ່ກັນໄປ ຢ່າງສວຍສົດງົດງາມ ເໜືອນດັ່ງ ໄມ້ຄໍ້າກ້ວຍ ກ້ວຍຄໍ້າໄມ້ແຕກດອກອອກຜົນ, ສົດຊື່ນແຈ່ມໃສຍີ່ງໆຂື້ນ ຢ່າງແນ່ນອນ.

ເນື່ອງໃນໂອກາດວັນຊາດ ແຫ່ງ ສາທາລະນະລັດ ສັງຄົມນິຍົມຫວຽດນາມ ຄົບຮອບ 73 ປີ (02/09/1945–02/09/2018)

ຂ້າພະເຈົ້າ ຂໍສົ່ງຄວາມຂ່ຳນັບຊົມເຊີຍອັນອົບອຸ່ນ, ຄວາມສາມັກຄີຮັກແພງອັນສະໜິດສະໜົມ ແລະ ຄຳອວຍພອນໄຊອັນປະເສີດ ໄປຍັງການນຳພັກ, ລັດ ແລະປະຊົນຫວຽດນາມ ອ້າຍນ້ອງ ທຸກຖ້ວນທົ່ວໜ້າ ແລະ ຂໍສະແດງຄວາມຮູ້ບຸນຄຸນອັນລົ້ນເຫຼືອ ຕໍ່ການຊ່ວຍເຫຼືອອັນລໍ້າຄ່າ ແລະທັນການ ຂອງ ພັກ-ລັດຖະບານຫວຽດນາມອ້າຍນ້ອງ ທີ່ຍາມໃດກໍ່ໄດ້ບິແບ່ງ ມາໃຫ້ປະຊາຊົນລາວ ບໍ່ວ່າຍຸກໃດສະໄໝໃດ.

ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາອັນປີຊາສາມາດ ຂອງພັກກອມມູນິດຫວຽດນາມ, ປະຊາຊົນຫວຽດນາມ ຜູ້ດຸໝັ່ນຂະຫຍັນພຽນຈະສາມາດຍາດໄດ້ຜົນສຳເລັດໃໝ່ຍິ່ງໃຫຍ່ກວ່າເກົ່າ ໃນການຈັດຕັ້ງປະຕິບັດຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ສືບຕໍ່ດຳເນີນຍຸດທະສາດການພັດທະນາເສດຖະກິດ-ສັງຄົມ ຮອດປີ 2020 ຢ່າງມີໄຊ, ສ້າງບາດລ້ຽວອັນສຳຄັນ ໃຫ້ແກ່ການນຳເອົາປະເທດຫວຽດນາມ ກ້າວຂຶ້ນຢ່າງໜັກ  ແໜ້ນ, ຫັນເປັນອຸດສາຫະກຳຕາມທິດທັນສະໄໝ, ປະເທດຊາດມັ່ງຄັ້ງ, ເຂັ້ມແຂງ, ປະຊາທິປະໄຕ, ຍຸດຕິທຳ ແລະ ສີວິໄລ; ປະກອບສ່ວນຢ່າງຕັ້ງໜ້າ ເຂົ້າໃນພາລະກິດແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ໃນພາກພື້ນ ແລະ ໃນໂລກ.

ໃນໂອກາດອັນມີຄວາມໝາຍປະຫວັດສາດ ຂອງປະຊາຊົນຫວຽດນາມອ້າຍນ້ອງ, ຂ້າພະເຈົ້າ ມີຄວາມປິຕິ ຊົມຊື່ນ ທີ່ເຫັນວ່າສາຍພົວພັນມິດຕະພາບທີ່ຍີງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະປະຊາຊົນສອງຊາດພວກເຮົາ; ແມ່ນການພົວພັນຮ່ວມມືບົນຫຼັກການສະເໜີພາບ, ເຄົາລົບເອກະລາດ, ອະທິປະໄຕ ແລະຜືນແຜ່ນດິນອັນຄົບຖ້ວນຂອງກັນແລະກັນ, ຕ່າງຝ່າຍຕ່າງມີຜົນປະໂຫຍດ ຊ່ວຍເຫຼືອເກື້ອກຸນກັນດ້ວຍຄວາມຈິງໃຈຕໍ່ກັນ ທີ່ມີມູນເຊື້ອອັນດີງາມມາແຕ່ດົນນານແລ້ວນັ້ນ ໄດ້ຮັບການພັດທະນາໃຫ້ເກີດດອກອອກຜົນຢ່າງບໍ່ຢຸດຢັ້ງ.

(ຫັດ​ທະ​ບູນ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll