ຫວຽດນາມ - ຍີ່ປຸ່ນ ຮ່ວມມືໃນການຕໍ່ກຳປັ່ນທະຫານ

06:31 2020/03/06

ຍສໝ - ຫວຽດນາມ ແລະ ຍີ່ປຸ່ນເຫັນດີຜັນຂະຫຍາຍການຮ່ວມມືໃນຂົງເຂດຕໍ່ກຳປັ່ນ, ສົ່ງມອບເຕັກໂນໂລຢີຂອງຂະແໜງການຕໍ່ກຳປັ່ນທະຫານ; ຮ່ວມມືໃນການຜະລິດບັນດາລາຍການເສດຖະກິດ.

ຕອນເຊົ້າວັນທີ 3 ມີນາ, ທ່ານພົນໂທ ຟານວັນຢາງ, ຫົວໜ້າກອງເສນາທິການໃຫຍ່, ຮອງລັດຖະມົນຕີກະຊວງປ້ອງກັນປະເທດ ໄດ້ເປັນປະທານພິທີຕ້ອນຮັບ ທ່ານພົນເອກ Yamazaki Koji, ຫົວໜ້າເສນາທິການ ຍີ່ປຸ່ນ, ພ້ອມດ້ວຍຄະນະຜູ້ແທນມາຢ້ຽມຢາມ ຫວຽດນາມ ຢ່າງເປັນທາງການ.

ທີ່ການໂອ້ລົມສົນທະນາ, ສອງຝ່າຍໄດ້ເຫັນດີເປັນເອກະພາບ ກ່ຽວກັບໝາກຜົນແຫ່ງການພົວພັນດ້ານປ້ອງກັນຊາດ ຫວຽດນາມ - ຍີ່ປຸ່ນ ໃນໄລຍະຜ່ານມາ; ການຮ່ວມມືລະຫວ່າງກອງທັບປະຊາຊົນຫວຽດນາມ ແລະ ກຳລັງກອງທັບປ້ອງກັນຕົວ ຍີ່ປຸ່ນ ໄດ້ຮັບການຜັນຂະຫຍາຍບົນພື້ນຖານຖະແຫຼງການວິໄສທັດຮ່ວມ ກ່ຽວກັບການຮ່ວມມືດ້ານປ້ອງກັນຊາດໃນທົດສະວັດຕໍ່ໄປ ລະຫວ່າງກະຊວງປ້ອງກັນປະເທດ ຫວຽດນາມ ແລະ ກະຊວງປ້ອງກັນປະເທດຍີ່ປຸ່ນ ເຊິ່ງໄດ້ສອງຝ່າຍລົງນາມໃນເດືອນເມສາ 2018.

ທ່ານພົນເອກ Yamazaki Koji ແລະ ທ່ານພົນໂທ ຟານວັນຢາງ ທີ່ການຕ້ອນຮັບ. (ພາບ: thanhnien.vn)

ທ່ານພົນເອກ Yamazaki Koji ເນັ້ນໜັກວ່າ ການຮ່ວມມືດ້ານປ້ອງກັນຊາດສອງຝ່າຍໃນໄລຍະຜ່ານມາໄດ້ຮັບການພັດທະນາຢ່າງບໍ່ຢຸດຢັ້ງ, ແມ່ນໜຶ່ງໃນບັນດາເສົາຄໍ້າສໍາຄັນເພື່ອຊຸກຍູ້ການພົວພັນສອງປະເທດ. 

ສອງຝ່າຍກໍ່ເຫັນດີຊຸກຍູ້ການພົວພັນຮ່ວມມືຢ່າງແທດຈິງ ລະຫວ່າງກອງທັບປະຊາຊົນ ຫວຽດນາມ ແລະ ກຳລັງກອງທັບປ້ອງກັນຕົວ ຍີ່ປຸ່ນ, ໃນນັ້ນມີລົດໄຟ ແລະ ເຮືອບິນຂອງກຳລັງກອງທັບປ້ອງກັນຕົວ ຍີ່ປຸ່ນ ມາຢ້ຽມຢາມ ຫວຽດນາມ; ສົ່ງເສີມການຮ່ວມມືໃນຂົງເຂດການຝຶກອົບຮົມວິຊາສະເພາະດ້ານການແພດໃຕ້ນ້ຳ, ການແພດໃຕ້ກຳປັ່ນດຳນ້ຳ, ປະກອບອາວຸດກູ້ໄພ; ສະໜອງເຄື່ອງມື, ອຸປະກອນການແພດ ເພື່ອຊ່ວຍເຫຼືອຜູ້ປະສົບເຄາະຮ້າຍຢູ່ທະເລໃຫ້ແກ່ກອງທັບເຮືອ ຫວຽດນາມ.

ຫວຽດນາມ ແລະ ຍີ່ປຸ່ນເຫັນດີຜັນຂະຫຍາຍການຮ່ວມມືໃນຂົງເຂດຕໍ່ກຳປັ່ນ, ສົ່ງມອບເຕັກໂນໂລຢີຂອງຂະແໜງການຕໍ່ກຳປັ່ນທະຫານ; ຮ່ວມມືໃນການຜະລິດບັນດາລາຍການເສດຖະກິດ; ຮຽກຮ້ອງໃຫ້ ຍີ່ປຸ່ນ ສະໜັບສະໜູນການຝຶກອົບຮົມຜູ້ຊ່ຽວຊານດ້ານເຕັກນິກໃນ ອຸດສາຫະກຳຂົງເຂດປ້ອງກັນປະເທດ, ເພີ່ມທະວີການຮ່ວມມືໃນການກໍ່ສ້າງຍຸດທະສາດ ເພື່ອພັດທະນາກຳລັງຮັກສາສັນຕິພາບຂອງ ຫວຽດນາມ ແລະ ຈັດກອງປະຊຸມກ່ຽວກັບການອະນຸລັກຮັກສາສັນຕິພາບ ສະຫະປະຊາຊາດ ຢູ່ຫວຽດນາມ.

ຄຳຮຸ່ງ
;

同类别新闻