ຈຳປາສັກ ຂະຫຍາຍເນື້ອທີ່ວັງອະນຸຮັກປາຂ່າ

10:08 2018/06/19

​ເຫັນ​ດີ​ຂະຫຍາຍວັງ​ອະນຸ​ຮັກ​ປາ​ຂ່າ ຈາກ​ເນື້ອທີ່ 21 ເຮັກຕາ​ເມື່ອ​ກ່ອນ ມາ​ເປັນ 150 ເຮັກຕາ ເຊິ່ງ​ໄດ້​ປະກາດ​ຢ່າງ​ເປັນ​ທາງ​ການ ໃນ​ວັນ​ທີ 4 ພຶດສະພາ 2018.

ຈຳປາສັກ ຂະຫຍາຍເນື້ອທີ່ວັງອະນຸຮັກປາຂ່າ
ປາ​ຂ່ານ້ຳ​ຈືດ​ທີ່​ພົບ​ເຫັນ​ຢູ່​ແຂວງ ຈຳ​ປາ​ສັກ.

ການ​ອະນຸ​ຮັກ ແລະ ປົກ​ປັກ​ຮັກສາ​ປາ​ຂ່າ ແມ່ນ​ວຽກ​ງານ​ໜຶ່ງ​ທີ່​ສຳຄັນ​ຂອງ​ແຂວງ​ຈຳປາ​ສັກ ກໍ່​ຄື​ເມືອງ​ໂຂງ ທີ່​ໄດ້​ເອົາໃຈໃສ່​ມາ​ເປັນ​ເວລາ​ດົນ​ນານ ດັ່ງນັ້ນ ອຳນາດ​ການ​ປົກຄອງ ແລະ ປະຊາຊົນ​ບ້ານ​ຫາງ​ສະ​ດຳ ແລະ ບ້ານ​ຫາງ​ຄອນ ເມືອງ​ໂຂງ ໄດ້​ເຫັນ​ດີ​ຂະຫຍາຍວັງ​ອະນຸ​ຮັກ​ປາ​ຂ່າ ຈາກ​ເນື້ອທີ່ 21 ເຮັກຕາ​ເມື່ອ​ກ່ອນ ມາ​ເປັນ 150 ເຮັກຕາ ເຊິ່ງ​ໄດ້​ປະກາດ​ຢ່າງ​ເປັນ​ທາງ​ການ ໃນ​ວັນ​ທີ 4 ພຶດສະພາ 2018 ເພື່ອ​ເຮັດ​ໃຫ້​ປາ​ຂ່າ​ມີ​ພື້ນ​ທີ່​ຫາ​ກິນ​ກວ້າງ​ຂຶ້ນ ມີ​ອາຫານ​ຫຼາຍ​ກວ່າ​ເກົ່າ ຫຼີກ​ລ່ຽງ​ການ​ລົບ​ກວນ ແລະ ປະຊາຊົນ​ເອງ​ກໍ່​ເຫັນ​ໄດ້​ເຖິງ​ຄວາມ​ສຳຄັນ​ຂອງ​ການ​ອະນຸ​ຮັກ​ປາ​ຂ່າ ເພາະ​ເຂົາເຈົ້າ​ສາມາດ​ສ້າງ​ລາຍ​ຮັບ​ຈາກ​ການ​ບໍລິການ​ນັກ​ທ່ອງ​ທ່ຽວ ​ໄປ​ທ່ຽວ​ຊົມ​ປາ​ຂ່າ​ຕາມ​ລະດູ​ການ​ຕ່າງໆ.

ທ່ານ ບຸນ​ເກີດ ຄຳ​ພິ​ທັກ ຫົວໜ້າ​ໜ່ວຍ​ງານ​ການ​ປະມົງ​ຂະແໜງ​ລ້ຽງສັດ ແລະ ການ​ປະມົງ ພະ​ແນກ​ກະສິກຳ ແລະ ປ່າໄມ້ ແຂວງ​ຈຳປາ​ສັກ ໃຫ້​ສຳພາດ​ໂອກາດ​ລົງ​ຕິດຕາມ​ໂຄງການ​ຄຸ້ມ​ຄອງ ແລະ ຊົມໃຊ້​ປາ ແລະ ສັດ​ນ້ຳ​ອື່ນໆ​ແບບ​ຍືນ​ຍົງ ຢູ່​ເຂດ​ສີ​ພັນ​ດອນ ໄລຍະ 2 ເມື່ອ​ບໍ່​ດົນ​ນີ້​ວ່າ: ປາ​ຂ່າ​ເປັນ​ສັດ​ນ້ຳ​ຢູ່​ໃນ​ບັນຊີ​ຫວງ​ຫ້າມ ແລະ ມີ​ຄວາມ​ສ່ຽງ​ຕໍ່​ການ​ສູນພັນ ນັບ​ແຕ່​ປີ 2009 ເປັນຕົ້ນ​ມາ ອົງການ​ກອງ​ທຶນ​ອະນຸ​ຮັກ​ທຳ​ມະ​ຊາດ​ໂລກ ປະຈຳ​ລາວ ຫຼື (WWF-Laos) ໄດ້​ສະໜັບສະໜູນ​ທຶນ ແລະ ອຸປະກອນ​ໂດຍ​ຜ່ານ​ກິດຈະກຳ ແລະ ໂຄງການ​ຕ່າງໆ ເພື່ອ​ນຳ​ໃຊ້​ເຂົ້າ​ໃນ​ການ​ຄຸ້ມ​ຄອງ​ອະນຸ​ຮັກ ແລະ ປົກ​ປັກ​ຮັກສາ​ປາ​ຂ່າ ຈົນ​ມາ​ເຖິງ​ປັດຈຸບັນ​ນີ້ ອີງ​ຕາມ​ຜົນ​ສຳ​ຫຼວດ​ຂອງ​ອົງການ​ກອງ​ທຶນ​ອະນຸ​ຮັກ​ທຳ​ມະ​ຊາດ​ໂລກ​ປະຈຳ​ລາວ ແລະ ກຳປູເຈຍ ທີ່​ໄດ້​ຮ່ວມ​ມື​ກັນ​ສຳ​ຫຼວດ​ປີ​ໜຶ່ງ​ສອງ​ຄັ້ງ ຄື: ເດືອນ​ທັນວາ ແລະ ເດືອນ​ພຶດສະພາ ເຫັນ​ວ່າປາ​ຂ່າ​ຢູ່​ໃນ​ວັງ​ອະນຸ​ຮັກ​ເຂດ​ດິນແດນ​ລາວ ທີ່​ກວມ​ເອົາ​ບ້ານ​ຫາງ​ສະ​ດຳ ແລະ ບ້ານ​ຫາງ​ຄອນ ມີ​ພຽງ 4 ໂຕ ເຊິ່ງ​ພົບ​ເຫັນ​ໃນ​ໄລຍະ 3-4 ປີ​ແລ້ວ ບໍ່​ເຫັນ​ທ່າ​ທີ່​ມີ​ການ​ຂະຫຍາຍ​ພັນ​ເພີ່ມ​ຂຶ້ນ ແລະ ກໍ່​ບໍ່​ຫຼຸດ​ລົງ​ຄື​ກັນ ເນື່ອງ​ຈາ​ກວ່າ ການ​ຂະຫຍາຍ​ພັນ​ຂອງ​ປາ​ດັ່ງກ່າວ ແມ່ນ​ແຕກ​ຕ່າງ​ຈາກ​ປາ​ຊະນິດ​ອື່ນໆ ເພາະວ່າ​ອອກລູກ​ເປັນ​ໂຕ ແລະ ຢູ່​ຝັ່ງ​ກຳປູເຈຍ ມີ​ເຖິງ 90 ກວ່າ​ໂຕ.

ສຳລັບ​ການ​ອະນຸ​ຮັກ​ປາ​ຂ່າ ແມ່ນ​ຫ້າມ​ໃຫ້​ປະຊາຊົນ​ຫາ​ປາ​ໃນ​ບໍລິເວນ​ດັ່ງກ່າວ​ທຸກ​ກໍລະນີ ຖ້າ​ຫາກ​ພົບ​ເຫັນ​ຜູ້​ທີ່​ຝ່າຝືນ ແມ່ນ​ຈະ​ຖືກ​ປັບ​ໃໝ ຫຼື ລົງໂທດ​ຕາມ​ລະບຽບ​ກົດໝາຍ ປັດຈຸບັນ ອຳນາດ​ການ​ປົກຄອງ​ສອງ​ບ້ານ​ດັ່ງກ່າວ ໄດ້​ແຕ່ງຕັ້ງ​ໜ່ວຍ​ກວດກາ​ລາດຕະເວນ ຫຼື ເຈົ້າ​ໜ້າທີ່​ປະມົງ​ຂັ້ນ​ບ້ານ ເພື່ອ​ປົກ​ປັກ​ຮັກສາ​ປາ​ຂ່າ ແລະ ສະກັດ​ກັ້ນ​ຜູ້​ທີ່​ມາ​ຫາ​ປາ​ໃນ​ວັງ​ອະນຸ​ຮັກ​ດັ່ງກ່າວ.

ໂອກາດ​ນີ້ ທ່ານ ບຸນ​ເກີດ ຄຳ​ພິ​ທັກ ໄດ້​ຮຽກຮ້ອງ​ມາ​ຍັງ​ທົ່ວ​ສັງຄົມ ໂດຍ​ສະເພາະ ປະຊາຊົນ​ພາຍ​ໃນ​ແຂວງ​ຈຳປາ​ສັກ ຈົ່ງ​ຮ່ວມ​ໃຈ​ກັນ​ອະນຸ​ຮັກ ແລະ ປົກ​ປັກ​ຮັກສາ​ປາ​ຂ່າ ພ້ອມ​ທັງ​ຮຽກຮ້ອງ​ມາ​ຍັງ​ນັກ​ທ່ອງ​ທ່ຽວ​ທີ່​ມາ​ທ່ຽວ​ຊົມ​ເບິ່ງ​ປາ​ຂ່າ ຈົ່ງ​ປະຕິບັດ​ຕາມ​ລະບຽບ​ກົດໝາຍ​ຢ່າງ​ເຂັ້ມ​ງວດ ໂດຍ​ສະເພາະ​ແມ່ນ​ການ​ຖິ້ມ​ສິ່ງ​ເສດ​ເຫຼືອ​ຕ່າງໆ​ລົງ​ວັງ​ປາ​ຂ່າ ເພື່ອ​ຫຼີກ​ລ່ຽງ​ການ​ທຳລາຍ​ທີ່ຢູ່​ອາໄສ​ຂອງ​ປາ ແລະ ລະບົບ​ນິເວດ​ທາງ​ທຳ​ມະ​ຊາດ ພ້ອມ​ນັ້ນ ພວກ​ເຮົາ​ສາມາດ​ເບິ່ງ​ປາ​ຂ່າ​ໄດ້​ທຸກ​ລະດູ ແຕ່​ລະດູ​ທີ່​ເໝາະ​ສົມ​ທີ່​ສຸດ ແລະ ເຫັນ​ໄດ້​ຊັດ​ເຈນ​ແມ່ນ​ລະດູແລ້ງ ໂດຍ​ເລີ່ມ​ແຕ່​ເດືອນ​ທັນວາ ຫາເດືອນ​ພຶດສະພາ.

(ແຫຼ່ງ​ຂໍ້​ມູນ​: www.vientianemai.net)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll