ຫວຽດນາມ-ຝະລັ່ງ: ຊຸກຍູ້ການພົວພັນຮ່ວມມືດ້ານປ້ອງກັນຊາດ

09:46 2019/07/08

ຍສໝ - ຫວ່າງແລ້ວນີ້, ຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ນໍາໂດຍທ່ານພົນໂທ ຫງວຽນ ຈີ໋ ວີ້ງ, ຮອງລັດຖະມົນຕີກະຊວງປ້ອງກັນປະເທດ ໄດ້ມີການຢ້ຽມຢາມ ແລະ ເຮັດວຽກຢູ່ ສ.ຝະລັ່ງ, ເປັນປະທານຮ່ວມການເຈລະຈາຍຸດທະສາດ ແລະ ການຮ່ວມມືດ້ານປ້ອງກັນຊາດ ຫວຽດນາມ-ຝະລັ່ງ ຄັ້ງທີ 1.

ຫວຽດນາມ-ຝະລັ່ງ: ຊຸກຍູ້ການພົວພັນຮ່ວມມືດ້ານປ້ອງກັນຊາດ
ບັນຍາກາດທີ່ການພົບປະເຈລະຈາ. (ພາບ: TTXVN)

ທີ່ການພົບປະເຈລະຈາ, ສອງຝ່າຍໄດ້ແລກປ່ຽນທັດສະນະກ່ຽວກັບສະພາບການສາກົນ ແລະ ພາກພື້ນ; ເຫັນດີເປັນເອກະພາບຕີລາຄາວ່າ, ສະພາບການມີການຜັນແປສັບສົນຫຼາຍຢ່າງ, ຮຽກຮ້ອງໃຫ້ບັນດາປະເທດຕ້ອງການຮ່ວມແຮງຮ່ວມໃຈ, ມານະພະຍາຍາມແກ້ໄຂ, ໂດຍສະເພາະແມ່ນບັນດາສິ່ງທ້າທາຍຄວາມໝັ້ນຄົງທີ່ບໍ່ແມ່ນການທະຫານ. ສອງຝ່າຍເຫັນດີເປັນເອກະພາບຕີລາຄາວ່າ ການຮ່ວມມືໃນໄລຍະຜ່ານມາບັນລຸໄດ້ບັນດາໝາກຜົນຕັ້ງໜ້າໃນຫຼາຍດ້ານເປັນຕົ້ນຄື: ການຮັກສາສັນຕິພາບສະຫະປະຊາຊາດ, ການບຳລຸງສ້າງ, ຄວາມໝັ້ນຄົງທາງເຄືອຂ່າຍອິນເຕີແນັດ, ການແລກປ່ຽນຍຸດທະສາດ, ແຜນທີ່ການທະຫານ ແລະ ອື່ນໆ. 

ຄະນະຜູ້ແທນກະຊວງປ້ອງກັນປະເທດຫວຽດນາມ ແລະ ຄະນະຜູ້ແທນກະຊວງປ້ອງກັນປະເທດຝະລັ່ງ ຖ່າຍຮູບລວມ. (ພາບ: TTXVN)

ທ່ານພົນໂທ Hervé De Bonnaventure, ຮອງຫົວໜ້າກົມໃຫຍ່ການພົວພັນສາກົນ ແລະ ຍຸດທະສາດ, ກະຊວງປ້ອງກັນປະເທດຝະລັ່ງ ໄດ້ຢັ້ງຢືນວ່າ: ຝະລັ່ງຕີລາຄາສູງຖານະບົດບາດ, ທີ່ຕັ້ງຂອງຫວຽດນາມຢູ່ພາກພື້ນ; ປາດຖະໜາຢາກຊຸກຍູ້ການພົວພັນຮ່ວມມືດ້ານປ້ອງກັນຊາດກັບຫວຽດນາມ ເພື່ອແນໃສ່ປະກອບສ່ວນໃຫ້ສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ. ພ້ອມທັງ ຕີລາຄາສູງໝາກຜົນການຮ່ວມມື ເຊິ່ງສອງຝ່າຍບັນລຸໄດ້ ແລະ ຖືວ່າຜ່ານການເຈລະຈາຈະປະກອບສ່ວນນໍາການພົວພັນຮ່ວມມືດ້ານປ້ອງກັນຊາດສອງປະເທດພັດທະນາຢ່າງມີປະສິດທິຜົນ ແລະ ແທດຈິງ.

ສ່ວນ ທ່ານພົນໂທ ຫງວຽນ ຈີ໋ ວີ້ງ ໄດ້ຕີລາຄາວ່າການເຈລະຈາໃນຄັ້ງນີ້ ມີຄວາມໝາຍສໍາຄັນ ຍ້ອນວ່ານີ້ແມ່ນຄັ້ງທໍາອິດ ທີ່ ສອງຝ່າຍ ຜັນຂະຫຍາຍ ກົນໄກຮ່ວມມືໃໝ່, ບົນພື້ນຖານກົນໄກຄະນະກຳມະການປະສົມກ່ຽວກັບການຮ່ວມມືດ້ານປ້ອງກັນຊາດກ່ອນໜ້ານັ້ນ; ພ້ອມກັນນັ້ນ, ເລື່ອງຍົກລະດັບກົນໄກເຈລະຈານີ້ກໍ່ແມ່ນພະຍານຫຼັກຖານໃຫ້ແກ່ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດທີ່ນັບມື້ນັບພັດທະນາ.

ພິທີລົງນາມໃນບົດບັນທຶກໝາກຜົນການເຈລະຈາຍຸດທະສາດ ແລະ ການຮ່ວມມືດ້ານປ້ອງກັນຊາດຫວຽດນາມ-ຝະລັ່ງ ຄັ້ງທີ 1. (ພາບ: TTXVN)

ທີ່ການເຈລະຈາ, ທ່ານພົນໂທ ຫງວຽນ ຈີ໋ ວີ້ງ ແລະ ທ່ານພົນໂທ Hervé De Bonnaventure ໄດ້ລົງນາມໃນບົດບັນທຶກໝາກຜົນການເຈລະຈາຍຸດທະສາດ ແລະ ການຮ່ວມມືດ້ານປ້ອງກັນຊາດຫວຽດນາມ-ຝະລັ່ງ ຄັ້ງທີ 1.

(ໄຊພອນ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
ບົດ​ຄວາມ​ຫລ້າ​ສຸດ
Scroll