ຮູ້ຈັກແຫຼ່ງທ່ອງທ່ຽວຂອງນະຄອນຫຼວງວຽງຈັນ

00:54 2019/05/13

ນະຄອນຫຼວງວຽງຈັນເປັນເມືອງເອກຂອງ ສປປ ລາວ ຊຶ່ງມີການຈະເລີນເຕີບໂຕວ່ອງໄວທາງດ້ານພື້ນຖານໂຄງລ່າງ, ເສດຖະກິດ ແລະ ວັດທະນະທຳ-ສັງຄົມ. ນະຄອນຫຼວງວຽງຈັນຍັງເປັນທີ່ຕັ້ງຍຸດທະສາດອັນສຳຄັນທາງດ້ານປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ, ການເມືອງ-ການປົກຄອງຂອງຊາດ ຊຶ່ງ ບັນດາກະຊວງ, ທະບວງການ ແລະ ສຳນັກງານຕ່າງໆຂອງລັດຖະບານແມ່ນຕັ້ງຢູ່ໃນນະຄອນຫຼວງແຫ່ງນີ້ ແລະ ຍັງເປັນສູນກາງທຸລະກິດນຳອີກ.

ຮູ້ຈັກແຫຼ່ງທ່ອງທ່ຽວຂອງນະຄອນຫຼວງວຽງຈັນ
ມູມໜຶ່ງຂອງນະຄອນຫລວງວຽງຈັນ

ປັດຈຸບັນ, ນະຄອນຫຼວງວຽງຈັນມີປະຊາກອນອາໄສຢູ່ເກືອບ 8 ແສນຄົນ, ມີເນື້ອທີ່ 3.920 ກິໂລຕາແມັດຊຶ່ງເປັນເຂດທີ່ມີປະຊາກອນອາໄສຢູ່ຢ່າງໜາແໜ້ນທີ່ສຸດໃນປະເທດ (ປະມານ 200 ຄົນ/ຕາຕະລາງກິໂລແມັດ). ນະຄອນຫຼວງວຽງຈັນປະກອບມີ 9 ຕົວເມືອງໄດ້ແກ່ເມືອງຈັນທະບູລີ, ເມືອງສີໂຄດຕະບອງ, ເມືອງໄຊເຊດຖາ, ເມືອງສີສັດຕະນາກ, ເມືອງນາຊາຍທອງ, ເມືອງໄຊທານີ, ເມືອງຫາດຊາຍຟອງ, ເມືອງສັງທອງ ແລະ ເມືອງປາກງື່ມ. ນະຄອນຫຼວງວຽງຈັນເປັນເຂດຮາບພຽງອ້ອມຮອບດ້ວຍພູເຂົາຄວາຍຕໍ່ໃສ່ສາຍພູງູ, ມີແມ່ນ້ຳສາຍຫຼັກຄືແມ່ນ້ຳຂອງ ແລະ ນ້ຳງື່ມ. ຄ້ອຍຄໍ່າຍາມແລງຈະເຫັນຜູ້ຄົນຍ່າງເລາະຫຼິ້ນໄປ ຕາມແຄມຂອງທັງຄົນລາວ ແລະ ນັກທ່ອງທ່ຽວຕ່າງຊາດພາກັນມານັ່ງພັກຜ່ອນຢ່ອນໃຈ, ຮັບປະທານອາຫານແຊບໆຕາມບັນດາຮ້ານທີ່ຢັ່ງຢາຍໄປຕາມແຄມຂອງ ແລະ ເບິ່ງຕາເວັນຕົກດິນຊຶ່ງກາຍເປັນມົນສະເໜ່ຂອງວຽງຈັນຍາມອາທິດອັດສະດົງຍາກທີ່ຈະຫາບ່ອນອື່ນໃດມາປຽບປານ. ນອກນັ້ນຍັງມີພະທາດຫຼວງວຽງຈັນອັນເປັນມິ່ງຂວັນຂອງປວງຊົນລາວທັງຊາດ ແລະ ເປັນສັນຍາລັກປະຈຳຊາດນຳອີກ. ຢູ່ໃນນະຄອນຫຼວງວຽງຈັນປະກອບມີຕະຫຼາດນ້ອຍໃຫຍ່ເຖິງ 83 ແຫ່ງ ສະທ້ອນໃຫ້ເຫັນເຖິງການດຳ ລົງຊີວິດຂອງແມ່ຄ້າຊາວຂາຍທີ່ຕິດພັນກັບຕະຫຼາດໃນທຸກໆມື້ທັງຍັງເປັນແຫຼ່ງດຶງດູດໃຈໃຫ້ແກ່ນັກທ່ອງທ່ຽວທີ່ຕ້ອງການເລາະຊົມ-ເລາະຊື້ຜະລິດຕະພັນນາໆປະເພດທັງເຄື່ອງສົດ ແລະ ຂອງແຫ້ງພ້ອມທັງຮຽນຮູ້ວິຖີຊີວິດຂອງປະຊາຊົນລາວ. “ມາວຽງຈັນຊົມຂົວມິດຕະພາບ ກາບໄຫວ້ຫໍພະແກ້ວ ຊົມສວນປະຕູໄຊ ໄຫວ້ພະທາດຫຼວງມິ່ງຂວັນ ຊົມວິວທິວທັດແຄມຂອງ ຫາດຊາຍສີທອງດອນຈັນ ຊິມລົດຊາດອາຫານນາໆຊາດ ເທິງຫໍຜາສາດສິບ ສີ່ຊັ້ນ ພັກຜ່ອນເທິງວິມານ ສະຫວັນໂຮງແຮມດອນຈັນ ພາເລດ ລືນາມ” ເປັນຄຳຂວັນ ຂອງນະຄອນຫຼວງວຽງຈັນອັນ ເປັນໝາກຫົວໃຈຫຼັກຂອງ ສປປ ລາວ.

ພະທາດຫຼວງ

ພະທາດຫຼວງ, ພະທາດຫຼວງວຽງຈັນປະກາຍສີທອງຄຳອັນຮຸ່ງເຮືອງຕັ້ງຢູ່ຢ່າງໂດດເດັ່ນທີ່ເຂດບ້ານທາດຫຼວງ ເມືອງໄຊເຊດຖາ, ເປັນປູຊະນີຍະສະຖານບູຮານອັນເປັນສັນຍາລັກຂອງປະເທດລາວ, ເປັນພະທາດໂລກະຈຸນລະມະນີທີ່ບັນຈຸພະສາລິຣິກະທາດຂອງພະພຸດທະເຈົ້າ ແລະ ເປັນສູນລວມແຫ່ງຈິດວິນຍານຂອງປວງຊົນລາວທັງຊາດ. ພະທາດຫຼວງວຽງຈັນຖືກສ້າງຂຶ້ນເທື່ອທຳອິດເມື່ອປີ ພສ 236 ໂດຍການນຳພາຂອງເຈົ້າເມືອງວຽງຈັນຈັນທະບູລີປະສິດທິສັກ ຫຼື ບູລີຈັນ ແລະ ຖືກຕໍ່ເຕີມເສີມສ້າງຕື່ມອີກໃນປີ ຄສ 1566 ໂດຍເຈົ້າໄຊຍະເສດຖາທິຣາຊກະສັດຜູ້ສະຖາປະນາວຽງຈັນເປັນນະຄອນຫຼວງຂອງອານາຈັກລາວລ້ານຊ້າງ. ມາຮອດ ປີ 1957, ລັດຖະບານລາວພາຍໃຕ້ພະບໍລົມມະຊູປະຖຳຂອງເຈົ້າສີສະຫວ່າງວົງກໍໄດ້ນຳພາປະຊາຊົນປັ້ນພະບໍລົມມະຮູບຂອງເຈົ້າໄຊຍະເຊດຖາທິຣາຊປະດິດສະຖານໄວ້ຢູ່ໜ້າທາງເຂົ້າພະທາດດ້ານຕາເວັນຕົກເພື່ອເປັນອະນຸສາວະລີທີ່ພະອົງໄດ້ສ້າງພະທາດຫຼວງຂຶ້ນມາເປັນທີ່ສັກກາລະບູຊາຈົນຮອດປັດຈຸບັນ. ພະທາດ ຫຼວງສູງ 45 ແມັດ, ມີໃບສີມາອ້ອມ 228 ໃບ, ມີບໍລິວານ (ທາດ ນ້ອຍ) ອ້ອມຮອບ 30 ອົງເອີ້ນ ວ່າ: “ປາລະມີສາມສິບທັດ”, ຕີນພະທາດແຕ່ດ້ານຕາເວັນອອກຫາດ້ານຕາເວັນຕົກຍາວ 69 ແມັດ, ແຕ່ດ້ານເໜືອຫາໃຕ້ຍາວ 68 ແມັດ ແລະ ມີກົມມະລຽນດ້ານນອກອ້ອມພະທາດຫຼວງແຕ່ລະດ້ານຍາວ 91,75 ແມັດ. ໃນວັນເພັງເດືອນສິບສອງຂອງທຸກໆປີ (ໄລຍະເດືອນຕຸລາພະຈິກ) ປະຊາຊົນລາວຈາກທົ່ວສາລະທິດຈະພາກັນເດີນທາງມາສະເຫຼີມສະຫຼອງບຸນນະມັດສະການພະທາດຫຼວງຊຶ່ງເປັນບຸນມະໂຫລານທີ່ໃຫຍ່ທີ່ສຸດໃນປະເທດລາວຖືກຈັດຂຶ້ນເປັນເວລາ 7 ມື້ 7 ຄືນພ້ອມການສະແດງມະໂຫລີ, ສິລະປະ-ວັນນະຄະດີ ແລະ ງານວາງສະແດງສິນຄ້າຈາກຫຼາກຫຼາຍຫ້າງຮ້ານ. ບຸນພະທາດຫຼວງສະແດງສິນຄ້າຈາກຫຼາກຫຼາຍຫ້າງຮ້ານ, ບຸນພະທາດຫຼວງສະແດງໃຫ້ເຫັນເຖິງວັດທະນະທຳ ແລະ ຮີດຄອງປະເພນີອັນດີງາມຂອງຊາວພຸດກໍຄືຊາວລາວທັງຊາດໂດຍມີພິທີສຳຄັນທາງສາສະໜາເຊັ່ນ: ພິທີແຫ່ຜາສາດເຜິ້ງ, ວຽນທຽນ ແລະ ຕັກບາດຖວາຍທານຊຶ່ງມີພະສົງຈາກທົ່ວທຸກແຂວງໃນປະເທດລາວເດີນທາງມາຮ່ວມ ແລະ ພາຍຫຼັງພິທີຕັກບາດກໍມີການແຂ່ງຂັນຕີຄີຊຶ່ງເປັນກິລາພື້ນເມືອງທີ່ຈັດຂຶ້ນທຸກໆໄລຍະບຸນດັ່ງກ່າວ. ພະທາດຫຼວງເປີດໃຫ້ບັນດາທ່ານເຂົ້າທ່ຽວຊົມໄດ້ໃນວັນອັງຄານ-ວັນອາທິດ ເວລາ 8:00 ໂມງ-12:00 ໂມງ ແລະ 13:00 ໂມງ-16:00 ໂມງ (ປິດ ວັນຈັນ).

ຫໍທຳມະສະພາ

ຫໍທຳມະສະພາ, ຫໍທຳມະສະພາຕັ້ງຢູ່ບໍລິເວນວັດທາດຫຼວງເໜືອຊຶ່ງຢູ່ທາງທິດເໜືອຂອງພະທາດຫຼວງວຽງຈັນ. ຫໍທຳມະສະພາຖືກສ້າງຕັ້ງຂຶ້ນດ້ວຍສະຖາປັດຕະຍະກຳອັນງົດງາມແບບສິລະປະລາຍລາວຊຶ່ງມີຂະໜາດໃຫຍ່ ແລະ ກວ້າງຂວາງຖືກໃຊ້ເປັນສະຖານທີ່ປະກອບພິທີກຳຕ່າງໆທາງສາສະໜາຂອງພະສົງ.

(ແຫຼ່ງ​ຂໍ້​ມູນ​: pasaxon.org.la)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll