ລາວ ກຽມສົ່ງນັກກິລາເຂົ້າຮ່ວມ ກີລານັກຮຽນອາຊຽນ ຈຳນວນ 5 ປະເພດ

09:54 2019/06/04

ອີງຕາມການໃຫ້ສຳພາດຂອງທ່ານນາງ ຂັນທອງ ແສງສຸພາວັນ ພະນັກງານທີ່ຮັບຜິດຊອບວຽກງານກີລານັກຮຽນອາຊຽນ ສປປ ລາວ ຂອງກົມກີລາພະລະ ແລະ ສິລະປະສຶກສາ ກະຊວງສຶກສາທິການ ແລະ ກີລາ (ສສກ) ໃນວັນທີ 29 ພຶດສະພາ 2019 ວ່າ: ໃນປີນີ້ ທາງກົມກີລາພະລະ ແລະ ສິລະປະສຶກສາ ແມ່ນໄດ້ມີມະຕິຕົກລົງເຫັນດີເປັນເອກະພາບ ຈະສົ່ງ 5 ປະເພດກີລາ ເຂົ້າຮ່ວມການແຂ່ງຂັນງານມະຫະກຳກີລານັກຮຽນອາຊຽນ ຄັ້ງທີ XI ທີ່ປະເທດອິນໂດເນເຊຍ ເປັນເຈົ້າພາບ ລະຫວ່າງວັນທີ 17-25 ກໍລະກົດ 2019 ປະກອບມີ: ແລ່ນ-ລານ ລອຍນ້ຳ ດອກປີກໄກ່ ກະຕໍ້ ແລະ ປັດຈັກສິລັດ.

ຄະ­ນະ​ນັກ­ກີ­ລາ​ນັກ­ຮຽນ​ຂອງ ສປປ ລາວ ຈະ​ເຂົ້າ​ຮ່ວມ​ປະ­ມານ 80 ຄົນ ລວມ​ທັງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ປັດ­ຈຸ­ບັນ​ນີ້ ນັກ­ກີ­ລາ​ທັງ 5 ປະ­ເພດ​ດັ່ງ­ກ່າວ ແມ່ນ​ໄດ້​ມີ​ການ​ເຝິກ­ຊ້ອມ ຕາມ​ການ​ມອບ​ໝາຍ​ຂອງ​ທາງ​ຄະ­ນະ​ນຳ ແລະ ໃນ​ມໍ່ໆ​ນີ້ ກໍ​ຈະ​ໄດ້​ມີ​ກອງ​ປະ­ຊຸມ​ປຶກ­ສາ​ຫາ­ລື​ກັນ​ຕື່ມ​ອີກ ເພື່ອ​ເຮັດ​ແນວ­ໃດ​ໃຫ້­ການ​ກະ­ກຽມ ແລະ ການ​ເດີນ­ທາງ​ເຂົ້າ​ຮ່ວມ​ແຂ່ງ­ຂັນ​ປະ­ສົບ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ​ທີ່​ວາງ​ໄວ້​ທຸກ​ປະ­ການ ທັງ​ຮັບ­ປະ­ກັນ​ໄດ້­ຜົນ​ງານ ແລະ ອື່ນໆ.

ການ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ 

ສຳ­ລັບ​ຜົນ­ງານ​ທັບ​ນັກ­ກີ­ລາ​ນັກ­ຮຽນ​ລາວ ໃນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ​ຄັ້ງ​ຜ່ານ​ມາ ໃນ​ປີ 2013 ທີ່ ສສ ຫວຽດ­ນາມ ເປັນ​ເຈົ້າ­ພາບ ເປັນ​ຄັ້ງ​ທຳ​ອິດ​ທີ່ ສປປ ລາວ ເຂົ້າ​ຮ່ວມ ແມ່ນ​ໄດ້​ອັນ​ດັບ 6 ຈາກ​ທັງ​ໝົດ 8 ປະ­ເທດ​ເຂົ້າ​ຮ່ວມ ຍາດ​ມາ​ໄດ້ 3 ຫຼຽນ​ເງິນ ແລະ 5 ຫຼຽນ​ທອງ ໃນ​ປີ 2015 ທີ່​ປະ­ເທດ​ບຣູ​ໄນ ເປັນ​ເຈົ້າ­ພາບ ແມ່ນ​ໄດ້​ອັນ​ດັບ 8 ຈາກ​ທັງ​ໝົດ 8 ປະ­ເທດ​ເຂົ້າ​ຮ່ວມ ຍາດ​ມາ​ໄດ້ 1 ຫຼຽນ​ເງິນ ແລະ 2 ຫຼຽນ​ທອງ ໃນ​ປີ 2016 ທີ່​ປະ­ເທດ​ໄທ ເປັນ​ເຈົ້າ­ພາບ ແມ່ນ​ໄດ້​ອັນ​ດັບ 6 ຈາກ​ທັງ​ໝົດ 8 ປະ­ເທດ​ເຂົ້າ​ຮ່ວມ ຍາດ​ມາ​ໄດ້ 1 ຫຼຽນ​ເງິນ ແລະ 7 ຫຼຽນ​ທອງ ໃນ​ປີ 2017 ທີ່​ປະ­ເທດ​ສິງ­ກະ­ໂປ ເປັນ​ເຈົ້າ­ພາບ ແມ່ນ​ໄດ້​ອັນ​ດັບ 8 ຈາກ​ທັງ​ໝົດ 10 ປະ­ເທດ​ເຂົ້າ​ຮ່ວມ ຍາດ​ມາ​ໄດ້ 2 ຫຼຽນ​ທອງ ແລະ ໃນ​ປີ 2018 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ແມ່ນ​ໄດ້​ອັນ​ດັບ 8 ຈາກ​ທັງ​ໝົດ 10 ປະ­ເທດ​ເຂົ້າ​ຮ່ວມ ຍາດ​ມາ​ໄດ້ 3 ຫຼຽນ​ທອງ ລວມ​ທັງ​ໝົດ 5 ຄັ້ງ​ທີ່​ທັບ​ນັກ­ກີ­ລາ​ນັກ­ຮຽນ​ລາວ ເຂົ້າ​ຮ່ວມ ແມ່ນ​ຄວ້າ​ມາ​ໄດ້ 5 ຫຼຽນ​ເງິນ ແລະ 19 ຫຼຽນ​ທອງ.

(ແຫຼ່ງ​ຂໍ້​ມູນ​: vientianemai)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll