ທ່ານນາຍົກລັດຖະມົນຕີ ຊຸກຍູ້ການເພີ່ມພູນຜະລິດ ຢູ່ ແຂວງສາລະວັນ

14:41 2019/08/16

ໃນສອງສາມວັນທີ່ຜ່ານມາ, ໃນໂອກາດລົງເຄື່ອນໄຫວຊີ້ນຳ ແລະ ຊຸກຍູ້ການຜະລິດຢູ່ແຂວງສາລະວັນ, ທ່ານ ທອງລຸນ ສີສຸລິດ, ນາຍົກລັດຖະມົນຕີ, ພອ້ມດວ້ຍ ທ່ານ ລັດຖະມົນຕີ ແລະ ຮອງລັດຖະມົນຕີ ກະຊວງກ່ຽວຂ້ອງ ໄດ້ໄປຢ້ຽມຢາມ ແລະ ຊຸກຍູ້ການຜະລິດ ຢູ່ຫລາຍເມືອງ, ໂດຍມີທ່ານ ສີສຸວັນ ສີຈອມ, ເຈົ້າແຂວງໆສາລະວັນ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ.

ທ່ານນາຍົກລັດຖະມົນຕີ ຊຸກຍູ້ການເພີ່ມພູນຜະລິດ ຢູ່ ແຂວງສາລະວັນ

ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງຢ້ຽມຢາມພື້ນທີ່ການຜະລິດປຸກພືດກະສິກຳ ເປັນຕົ້ນ ການປູກສາລີ ຢູ່ບ້ານແສນວັງ ເມືອງສາລະວັນ, ແລະ ການປູກມັນດ້າງ ຢູ່ບ້ານເຕເມສັງທອງ ແລະ ມັນຕົ້ນ ຢູ່ບ້ານ ພະນວນ, ເມືອງເລົ່າງາມ ຊຶ່ງປະຊາຊົນ ໄດ້ປູກເປັນຈຳນວນຫຼາຍ ແລະ ໄດ້ມີການຈັດຕັ້ງເປັນກຸ່ມການຜະລິດ, ຜົນຜະລິດທີ່ໄດ້ ແມ່ນມີຜູ້ເກັບຊື້ ເພື່ອຂາຍໃຫ້ປະເທດໄທ ແລະ ຫວຽດນາມ.  ທ່ານ ນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ປະຊາຊົນທີ່ມີຄວາມດຸໝັ່ນ, ຮູ້ໝູນໃຊ້ທ່າແຮງຂອງທ້ອງຖິ່ນຂອງຕົນ ເພື່ອທຳການຜະລິດ ແລະ ສ້າງລາຍຮັບໃຫ້ແກ່ຄອບຄົວເພີ່ມຂຶ້ນ, ເຮັດໃຫ້ຊີວິດການເປັນຢູ່ຂອງຕົນເອງນັບມື້ນັບດີຂຶ້ນ.  ໃນເວລາຕໍ່ມາ, ທາງຄະນະຂອງທ່ານນາຍົກລັດຖະມົນຕີ ໄດ້ໄປຢ້ຽມຢາມ ແລະ ໃຫ້ກຳລັງໃຈແກ່ ປະຊາຊົນເມືອງຕຸ້ມລານ ເນື່ອງຈາກເປັນເມືອງ ທີ່ເກີດ ມີສະພາບການລະບາດຂອງພະຍາດອະຫິວາໝູອາຟຣິກາ ກ່ອນໝູ່. 

ທ່ານນາຍົກລັດຖະມົນຕີ ທອງລຸນ ສີສຸລິດ ກ່າວຄຳປາໄສຢູ່ ແຂວງສາລະວັນ.

ເມືອງຕຸ້ມລານ ຢູ່ຫ່າງຈາກເທດສະບານແຂວງໄປປະມານ 50 ກິໂລແມັດ ປະກອບດ້ວຍ 3 ຊົນເຜົ່າ ມີ: ເຜົ່າກະຕາງ, ເຜົ່າຕະໂອ໊ຍ ແລະ ເຜົ່າລາວລຸ່ມ, ມີພົນລະເມືອງທັງໝົດ 28.193 ຄົນ, ຍິງ14.237 ຄົນ, ມີ 3.614 ຫຼັງເຮືອນ ແລະ 5.330 ຄອບຄົວ; ປະຊາຊົນສ່ວນໃຫຍ່ເຮັດອາຊີບເຮັດນາເປັນຕົ້ນຕໍ. 

ຢູ່ເມືອງຕຸ້ມລານ, ມີບ້ານທີ່ໄດ້ຮັບຜົນກະທົບຈາກການລະບາດຂອງພະຍາດອະຫິວາໝູ ອາຟຣິກາ 12 ບ້ານ; ມາຮອດປະຈຸບັນ ມີໝູທີ່ຕິດເຊື້ອຕາຍ ແລະ ຖືກທໍາລາຍຖິ້ມ ລວມທັງໝົດ 4.185 ໂຕ ແລະ ພາກສ່ວນທີ່ກ່ຽວຂ້ອງ ແມ່ນສາມາດຄວບຄຸມການລະບາດຂອງພະຍາດດັ່ງກ່າວໄດ້ແລ້ວ. 

ທ່ານ ນາຍົກລັດຖະມົນຕີ ໄດ້ມອບໃຫ້ທ່ານລັດຖະມົນຕີ ກະຊວງກະສິກຳ ແລະ ປ່າໄມ້ ອະທິບາຍ ແລະ ໃຫ້ຄຳແນະນຳ ແກ່ອົງການປົກຄອງເມືອງ ແລະ ປະຊາຊົນຕື່ມ ກ່ຽວກັບຄວາມເປັນມາ, ການປ້ອງກັນ ແລະ ຄວບຄຸມແກ້ໄຂ ການລະບາດຂອງພະຍາດດັ່ງກ່າວ ໂດຍໄດ້ເນັ້ນວ່າ ຖ້າພົບໝູຕິດເຊື້ອ ໃຫ້ຂ້າທຳລາຍທັນທີ ແລະ ບໍ່ໃຫ້ນຳຊີ້ນໝູມາບໍລິໂພກຢ່າງເດັດຂາດ. 

ທ່ານນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຕໍ່ການຕັດສິນໃຈສູງຂອງອຳນາດການປົກຄອງທ້ອງຖິ່ນ ກໍ່ຄືປະຊາຊົນ ໃນການຂ້າທຳລາຍໝູ ທີ່ຕິດເຊື້ອພະຍາດ ແລະ ໃຫ້ສືບຕໍ່ເອົາໃຈໃສ່ປະຕິບັດ ຕາມການແນະນຳຂອງວິຊາການເພື່ອບໍ່ໃຫ້ພະຍາດແຜ່ລາມອອກໄປ. 

ສຳລັບການຟື້ນຟູການລ້ຽງໃນຕໍ່ໜ້າ, ແມ່ນໃຫ້ລໍຖ້າ ຈົນກວ່າວິຊາການຈະໄດ້ກວດກາໃຫ້ຮຽບຮ້ອຍສາກ່ອນ ແລະ ຮັບຮອງວ່າສາມາດຄວບຄຸມ ແລະ ປາບພະຍາດດັ່ງກ່າວ ໄດ້ແລ້ວ, ສ່ວນດ້ານນະໂຍບາຍ ກະຊວງກະສິກຳ ແລະ ປ່າໄມ້ ກຳລັງຄົ້ນຄວ້າ ເພື່ອສະເໜີລັດຖະບານ ພິຈາລະນາ; ໃຫ້ກະຊວງກະສິກຳ ແລະ ປ່າໄມ້ ສົມທົບກັບເມືອງໃນການຄົ້ນຄວ້າສົ່ງເສີມການລ້ຽງສັດ ປະເພດອື່ນ ເຊັ່ນ ງົວ, ຄວາຍ, ແບ້, …. 

ໃນໂອກາດນີ້, ຍັງໄດ້ມອບໃຫ້ທ່ານ ລັດຖະມົນຕີກະຊວງສາທາລະນະສຸກ ຊີ້ແຈງອະທິບາຍຕື່ມ ກ່ຽວກັບການປ້ອງກັນ ແລະ ປິ່ນປົວພະຍາດໄຂ້ຍຸງລາຍ ໂດຍເນັ້ນການປ້ອງກັນແຕ່ຫົວທີ, ການທຳລາຍໜອນນ້ຳຍຸງລາຍ ແລະ ແຫຼ່ງເພາະພັນ, ເມື່ອເປັນໄຂ້ ບໍ່ໃຫ້ໄປຊື້ຢາມາກິນເອງ ແຕ່ໃຫ້ໄປພົບແພດໝໍ ເພື່ອປິ່ນປົວ; ພ້ອມກັນນີ້ ກໍ່ໃຫ້ເອົາໃຈໃສ່ຕິດຕາມເຝົ້າລະວັງ ການລະບາດຂອງພະຍາດໄອໄກ່ ແລະ ຊຸກຍູ້ໃຫ້ປະຊາຊົນ ມາສັກຢາກັນ. 

ຫຼັງຈາກນັ້ນ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມໂຮງໝໍແຂວງສາລະວັນ ທີ່ຕັ້ງຢູ່ບ້ານ ໂພນແກ້ວ, ເມືອງສາລະວັນ, ແຂວງສາລະວັນ ຊຶ່ງໄດ້ເປີດນຳໃຊ້ເປັນທາງການໃນປີ 1980, ເປັນໂຮງໝໍ 100 ຕຽງ, ມີ 5 ຕຶກນອນປິ່ນປົວ ແລະ 24 ໜ່ວຍງານຍ່ອຍ, ມີພະນັກງານທັງໝົດ 125 ຄົນ ແລະ ພະນັກງານອາສາສະໝັກ 86 ຄົນ. 

ປະຈຸບັນ ມີຄົນເຈັບທີ່ເຂົ້າມາປິ່ນປົວຢູ່ໂຮງໝໍແຂວງຫຼາຍ ເນື່ອງຈາກເປັນໄລຍະລະບາດຂອງພະຍາດໄຂ້ຍຸງລາຍ ຊຶ່ງ ທົ່ວແຂວງ ມີຜູ້ຕິດເຊື້ອພະຍາດໄຂ້ຍຸງລາຍ 2.802 ກໍລະນີ, ເສຍຊີວິດແລ້ວ 4 ກໍລະນີ. 

ໃນໂອກາດນີ້, ທ່ານ ນາຍົກລັດຖະມົນຕີ ໄດ້ຊີ້ນຳແກ່ພະແນກສາທາລະນະສຸກແຂວງ ແລະ ພະນັກງານແພດໝໍຂອງໂຮງໝໍແຂວງ ໃຫ້ເພີ່ມທະວີຄວາມເອົາໃຈໃສ່ການບໍລິການ, ປິ່ນປົວຮັກສາ ແລະ ໃຫ້ຄຳແນະນຳແກ່ປະຊາຊົນ, ການມີຈັນຍາບັນຂອງພະນັກງານແພດໝໍ, ປະຕິບັດໜ້າທີ່ດ້ວຍຄວາມຮັບຜິດຊອບ ແລະ ດ້ວຍຄວາມຮັກໃນອາຊີບ; ເອົາໃຈໃສ່ປັບປຸງ ຄຸນນະພາບ ຂອງໂຮງໝໍເມືອງ ໃຫ້ສາມາດຮອງຮັບປິ່ນປົວຄົນເຈັບໄດ້ດີຂຶ້ນ ເພື່ອຫຼຸດຜ່ອນການມາຫາແຕ່ໂຮງໝໍແຂວງ ທີ່ປະຈຸບັນມີ ຄວາມແອອັດ, ຍົກລະດັບຄວາມຮູ້ດ້ານວິຊາສະເພາະຂອງພະນັກງານແພດໝໍ ແລະ ພະຍາບານ; ເອົາໃຈໃສ່ການຕິດຕາມ ເຝົ້າລະວັງ ແລະ ແກ້ໄຂການລະບາດຂອງພະຍາດໄຂ້ຍຸງລາຍ, ເອົາໃຈໃສ່ການປ້ອງກັນແຕ່ຫົວທີ ໂດຍສະເພາະການທຳລາຍແຫຼ່ງໜອນນ້ຳຍຸງລາຍ, ໃຫ້ເອົາໃຈໃສ່ການປະຕິບັດ 10 ຕົວຊີ້ວັດ ເພື່ອຮັບປະກັນ ການຈັດຕັ້ງປະຕິບັດເປົ້າໝາຍ ການພັດທະນາ ແບບຍືນຍົງ (SDGs), ໂດຍສະເພາະ ດ້ານໂພສະນາການ, ການຂາດສານອາຫານໃນເດັກນ້ອຍ, ການສັກຢາປ້ອງກັນ.

ໃນໂອກາດມາຢ້ຽມຢາມ ແຂວງສາລະວັນໃນຄັ້ງນີ້, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນຳ ຄະນະນຳ ແລະ ຄະນະປະຈຳພັກແຂວງ ພາຍຫຼັງໄດ້ຮັບຟັງການລາຍງານຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງສາລະວັນ ໄລຍະ 6 ເດືອນຕົ້ນປີ 2019 ຈາກທ່ານເຈົ້າແຂວງ ໂດຍທ່ານໄດ້ຊົມເຊີຍແຂວງ ຊື່ງເຫັນໄດ້ວ່າມີ ຫຼາຍປັດໃຈໃໝ່ໃນການພັດທະນາເກີດຂຶ້ນ ໂດຍສະເພາະ ການຜະລິດກະສິກຳ; ພ້ອມນີ້ ທ່ານຍັງໄດ້ເນັ້ນໜັກໃຫ້ຄະນະນໍາທຸກຂັ້ນພາຍໃນແຂວງສູ້ຊົນເກັບລາຍຮັບ ໃຫ້ໄດ້ຕາມແຜນ, ດຶງດູດການລົງທຶນ ໂດຍປະຕິບັດນະໂຍບາຍ 3 ເປີດ, ຄຸ້ມຄອງການລົງທຶນ ແລະ ໃຫ້ປະຊາຊົນມີສ່ວນຮ່ວມ ແລະ ໄດ້ຮັບຜົນປະໂຫຍດຈາກການລົງທຶນ, ເອົາໃຈໃສ່ໃນການ ພັດທະນາດ້ານສັງຄົມ ໄປຄຽງຄູ່ກັບການພັດທະນາເສດຖະກິດ, ເອົາໃຈໃສ່ແກ້ໄຂປະກົດການຫຍໍ້ທໍ້, ລວມທັງການຕິດຕາມຫາງສຽງສັງຄົມ, ແກ້ຂ່າວຫາງສຽງທີ່ບໍ່ດີ ບິດເບືອນ ຫຼື ບໍ່ມີຄວາມຈິງ ຊຶ່ງທັງໝົດກໍ່ໃຫ້ຕິດພັນກັບການສ້າງຂະບວນການ ໃຫ້ແກ່ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງແຂວງ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ຊີ້ນຳໃຫ້ແຂວງ ເອົາໃຈໃສ່ໃນວຽກງານບຸກຄະລາກອນ, ໂດຍສະເພາະ ການສ້າງບຸກຄະລາກອນ ພະນັກງານໜຸ່ມນ້ອຍ, ພ້ອມທັງ ໃຫ້ເອົາໃຈໃສ່ຕໍ່ການສ້າງຄວາມເຂັ້ມແຂງ ແລະ ຄວາມເປັນເອກະພາບພາຍໃນ, ຍົກສູງຄວາມຮັບຜິດຊອບ, ຄວາມເປັນເຈົ້າການ ແລະ ຄວາມເປັນແບບຢ່າງຂອງການນຳ ໃນແຕ່ລະຂັ້ນ.

ພາບແຫ່ງຄວາມປະທັບໃຈໃນການລົງຊຸກຍູ້ການເພີ່ມພູນຜລິດຜົນຂອງທ່ານນາຍົກລັດຖະມົນຕີ ຢູ່ແຂວງສາລະວັນ:

ທ່ານນາຍົກລັດຖະມົນຕີ ແຫ່ງ ສປປ ລາວ ທອງລຸນ ສີສຸລິດ ລົງຊຸກຍູ້ການເພີ່ມພູນຜລິດຜົນ ຢູ່ ແຂວງສາລະວັນ.

(ແຫຼ່ງ​ຂໍ້​ມູນ​: ຫ້ອງການສຳນັກງານນາຍົກ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll