ລາວ ສືບຕໍ່ສ້າງສາຍພົວພັນການທູດ ແລະ ເສີມຂະຫຍາຍການຮ່ວມມືກັບບັນດາປະເທດໃນໂລກ

22:09 2019/10/01

ໃນໂອກາດເຂົ້າຮ່ວມກອງປະຊຸມປະຈຳປີ ຂອງສະມັດຊາໃຫຍ່ອົງການ ສະຫະປະຊາຊາດສະໄໝທີ 74; ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຕາງໜ້າ ລັດຖະບານສປປ ລາວ ລົງນາມໃນຖະແຫລງການ ວ່າດ້ວຍການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດການາ; ຕາງໜ້າໃຫ້ລັດຖະບານ ສາທາລະນະລັດການາ ໂດຍແມ່ນ ທ່ານນາງ ​ເຊີ​ເລ ອາ​ໂຢກ ​ໂບສ​ເວ (Shirley AyorkorBotchwey) ລັດຖະມົນຕີກະຊວງການຕ່າງປະເທດ ແລະ ການເຊື່ອມໂຍງພາກພື້ນແຫ່ງ ສາທາລະນະລັດການາ ຮ່ວມລົງນາມໃນຖະແຫລງການດັ່ງກ່າວ. ພິທີລົງນາມໄດ້ຈັດຂຶ້ນໃນວັນທີ 27 ກັນຍາ 2019 ທີ່ສຳນັກງານໃຫຍ່ອົງການ ສປຊ ທີ່ນິວຢອກ, ສະຫະລັດອາເມລິກາ ໂດຍມີຄະນະຜູ້ແທນ ຂອງສອງຝ່າຍ ເຂົ້າຮ່ວມເປັນສັກຂີພິຍານ.

ລາວ ສືບຕໍ່ສ້າງສາຍພົວພັນການທູດ ແລະ ເສີມຂະຫຍາຍການຮ່ວມມືກັບບັນດາປະເທດໃນໂລກ
ລາວ ສືບຕໍ່ສ້າງສາຍພົວພັນການທູດ ແລະ ເສີມຂະຫຍາຍການຮ່ວມມືກັບບັນດາປະເທດໃນໂລກ

ການສ້າງຕັ້ງສາຍພົວພັນການທູດ ລະຫວ່າງ ສອງປະເທດໃນຄັ້ງນີ້ ຖືເປັນເຫດການສຳຄັນທາງການເມືອງ ເພື່ອເພີ່ມທະວີການຮັດແໜ້ນການພົວພັນ ແລະ ການຮ່ວມມືລະຫວ່າງສອງປະເທດ ກໍຄື ສອງລັດຖະບານ. ສາທາລະນະລັດການາ ໄດ້ຮັບເອກະລາດຈາກອັງກິດ ແລະ ໄດ້ສະຖາປານາເປັນ ສາທາ ລະນະລັດ ການາ ໃນວັນທີ 6 ມີນາ 1957. ສາທາລະນະລັດ ການາ ຕັ້ງຢູ່ທະວີບອາຟຣິກາຕາເວັນຕົກ, ມີຊາຍແດນຕິດກັບປະເທດ ກົດດີວົວ, ໂຕໂກ ແລະ ອ່າວກິນີ, ມີນະຄອນຫລວງຊື່ວ່າ ອັກກຣາ, ນໍາໃຊ້ພາສາອັງກິດເປັນພາສາທາງການ, ມີເນື້ອທີ່ທັງໝົດ 238.533 ກິໂລຕາແມັດ, ມີປະຊາກອນປະມານ 28,2 ລ້ານຄົນ, ໂດຍແມ່ນ ທ່ານ ນານາ ອັດ​ໂດ ດັນ​ວາ ອາ​ກູ​ໂຟ-ອັດ​ໂດ (Nana Addo Dankwa Akufo-Addo) ດໍາລົງຕໍາ ແໜ່ງປະທານາທິບໍດີ ທັງເປັນຫົວໜ້າ ຄະນະລັດຖະບານ ນັບຕັ້ງແຕ່ເດືອນມັງກອນ 2017 ເປັນຕົ້ນມາ. ປະເທດ ສາທາລະນາລັດ ການາ, ມີເສດຖະກິດໃຫຍ່ເປັນອັນດັບທີ 9 ຂອງປະເທດໃນທະວີບ ອາຟຮິກາ, ມີ ຈີ​ດີ​ພີ(PPP) 130,2 ຕື້ໂດລາສະຫະລັດ, ອັດຕາການຂະຫຍາຍຕົວຂອງ ຈີ​ດີ​ພີ 5,9% ແລະ ມີລາຍໄດ້ສະເລ່ຍຕໍ່ຫົວຄົນ (GDP Percapita) 4,700 ໂດລາສະຫະລັດ.

ໃນໂອກາດດຽວກັນນີ້,​ ທ່ານ ສະເຫລີມໄຊ ກົມມະສິດ​ ແລະ ທ່ານ ​ໂນ​ໂກສ ຄຣີຄີ​ໂຕ​ໂດ​ລີດ(NokosChristodoilides) ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ໄຊປຣັດ ຍັງໄດ້ລົງນາມໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ແລະ ການປຶກສາຫາລືທາງດ້ານ ການເມືອງສອງຝ່າຍ ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສາທາລະນະລັດ ໄຊປຣັດ (MOU on Cooperation and Bilateral Political Consultations between Ministry of Foreign Affairs of the Lao PRD and Ministry of Foreign Affairs of the Public of Cyprus). 

ການລົງນາມໃນບົດບັນທຶກຄວາມເຂົ້າໃຈ ຂອງສອງກະຊວງການຕ່າງປະເທດ ລາວ ແລະ ໄຊປຣັດ ໃນຄັ້ງນີ້ ເປັນພື້ນຖານສຳຄັນໃນການຮັດແໜ້ນສາຍພົວພັນການທູດ ແລະການຮ່ວມມືລະຫວ່າງ ສອງປະເທດໃຫ້ນັບມື້ຂະຫຍາຍຕົວດີຍິ່ງໆຂຶ້ນ ໂດຍສະເພາະແມ່ນ ການປຶກສາຫາດ້ານການເມືອງ, ການແລກປ່ຽນການຢ້ຽມ ຂອງຄະນະຜູ້ແທນຂັ້ນສູງ, ການສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ. ສປປ ລາວ ແລະ ສາທາລະນະລັດ ໄຊປຣັດ ໄດ້ສ້າງຕັ້ງສາພົວພັນ ການທູດນຳກັນໃນວັນທີ 29 ມິຖຸນາ ປີ 2000. ການຕິດຕໍ່ພົວພັນທາງການ ລະຫວ່າງ ສອງປະເທດ, ຝ່າຍ ສປປ ລາວ ແມ່ນຜ່ານສະຖານທູດແຫ່ງ ສປປ ລາວ ທີ່ມີສໍານັກງານຕັ້ງຢູ່ ທີ່ ເຊີແນວ, ປະເທດ ສະວິສ; ສ່ວນຝ່າຍ ສາທາລະນາລັດ ໄຊປຣັດ ແມ່ນຜ່ານສະຖານທູດສາທາລະນະລັດ ໄຊປຣັດ ທີ່ມີສໍານັກງານຕັ້ງຢູ່ ນະຄອນຫລວງປັກກິ່ງ, ສປ ຈີນ.

ນອກຈາກນັ້ນ, ໄລຍະເຂົ້າຮ່ວມກອງປະຊຸມ ປະຈຳປີຂອງສະມັດຊາໃຫຍ່ອົງການ ສປຊ ແລະ ກອງປະຊຸມປິ່ນອ້ອມອື່ນໆໃນປີນີ້, ຄະນະຜູ້ແທນ ສປປລາວ ຍັງໄດ້ພົບປະກັບຄະນະ ຜູ້ແທນຂັ້ນສູງ ຂອງຫລາຍປະເທດ ເຊັ່ນ: ໂປໂລຍ, ອຽກລັງ, ສະຫະລັດອາເມລິກາ, ການາດາ, ເວເນຊູເອລາ, ປອກຕຸຍການ ແລະ ອົງການ ສປຊ ເພື່ອການພັດທະນາ ເພື່ອສືບຕໍ່ເສີມຂະຫຍາຍ ແລະ ຮັດແໜ້ນການຮ່ວມມື ກັບບັນດາປະເທດ ແລະ ອົງການດັ່ງກ່າວ.

ມາຮອດປັດຈຸບັນ, ສປປ ລາວ ມີສາຍພົວພັນການທູດຮ່ວມກັບ143 ປະເທດ ແລະ ມີສະຖານທູດຢູ່ຕ່າງປະເທດ 26 ແຫ່ງ, ສຳນັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 10 ແຫ່ງ, ຫ້ອງການກົງສຸນໃຫຍ່ 1 ແຫ່ງ, ລວມທັງ ມີການແຕ່ງຕັ້ງກົງສຸນກິຕິມະສັກຂອງ ສປປ ລາວ ຈໍານວນ 17 ທ່ານ. ການເຄື່ອນໄຫວວຽກງານ ການຕ່າງປະເທດໃນຄັ້ງນີ້ ໄດ້ປະກອບສ່ວນຢ່າງສໍາຄັນ ແລະ ຕັ້ງໜ້າເຂົ້າໃນການຈັດຕັ້ງປະຕິບັດ ແນວທາງນະໂຍບາຍການຕ່າງປະເທດ ອັນສະເໝີຕົ້ນສະເໜີປາຍຂອງ ສປປ ລາວ ຄື: ສັນຕິພາບ ເອກະລາດ ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ ເພື່ອເປີດກວ້າງການພົວພັນ ຮ່ວມມືແບບຫລາຍທິດ, ຫລາຍຝ່າຍ ແລະ ຫລາຍຮູບແບບ ບົນພື້ນຖານຫລັກການສາກົນ, ເຄົາລົບອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ ທັງເປັນການຍາດແຍ່ງ ການສະໜັບສະໜູນ ຈາກບັນດາປະເທດຕ່າງໆ ໃນເວທີພາກພື້ນ ແລະ ສາກົນໃຫ້ນັບມື້ນັບຫລາຍຂຶ້ນ.

(ແຫຼ່ງ​ຂໍ້​ມູນ​: ຂປລ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
ບົດ​ຄວາມ​ຫລ້າ​ສຸດ
Scroll