ລາວ: ປະຊາຊົນ 6 ແຂວງທີ່ຖືກນໍ້າຖ້ວມ ຕ້ອງການຄວາມຊ່ວຍເຫລືອຮີບດ່ວນ

13:55 2019/09/06

ປັດຈຸບັນ ປະຊາຊົນ 6 ​ແຂວງ ​ເຊິ່ງປະກອບ​ມີ: ແຂ​ວງຄຳ​ມ່ວນ, ສະຫວັນ​ນະ​ເຂດ, ອັດ​ຕະປື, ສາລະ​ວັນ, ສາລະ​ວັນ ​ແລະ ຈຳປາ​ສັກ ທີ່​ຖືກ​ຜົນ​ກະທົບຈາກ​ນ້ຳ​ຖ້ວມ 37 ​ເມືອງ, 788 ບ້ານ, 54.207 ຄອບຄົວ ກຳລັງ​ຕ້ອງການ ​ຄວາມ​ຊ່ວຍ​ເຫລືອ​ຢ່າງ​ຮີບ​ດ່ວນ ​​ໂດຍ​ສະ​ເພາະ​ແມ່ນ ເຄື່ອງ​ອຸປະ​ໂພ​ກ-ບໍລິ​ໂພ​ກ ​ເປັນ​ຕົ້ນ​ ແມ່ນ​ອາຫານ, ນ້ຳ​ດື່ມ, ​ເຄື່ອ​ງ​ໃຊ້​ຄົວ​ເຮືອນ, ​ເຄື່ອງ​ນອນ, ​ເຮືອ​ພ້ອມ​ຄົນ​ຂັບ, ງົບປະມາ​ຮັບ​​ໃຊ້​ ​ແລະ ອື່ນໆ.

ລາວ: ປະຊາຊົນ 6 ແຂວງທີ່ຖືກນໍ້າຖ້ວມ ຕ້ອງການຄວາມຊ່ວຍເຫລືອຮີບດ່ວນ
ວັນທີ 5 ກັນຍາ 2019, ທີ່ສໍານັກງານນາຍົກລັດຖະມົນຕີ; ທ່ານ ທອງລຸນ ສີສຸລິດ ນາຍົກລັດ ຖະມົນຕີ ໄດ້ຮຽກປະຊຸມດ່ວນ ເພື່ອຮັບມື ແລະ ແກ້ໄຂໄພນໍ້າຖ້ວມທີ່ພວມເກີດຂຶ້ນ ຢູ່ບັນດາແຂວງພາກກາງ ແລະ ພາກໃຕ້ ສປປ ລາວ. (ພາບ: ຂປລ)

ໃນ​ຫລາຍ​ມື້​ຜ່ານ​ມາ ​ເກີດ​ມີ​ພາຍຸພັດ​ເຂົ້າ​ມາ ສປປ ລາວ ​ເຮັດ​ໃຫ້​ເກີດ​ມີ​ຝົນຕົກ​ໜັກ ​ແລະ ​ເກີດ​ນໍ້າ​ຖ້ວມ​ໜັກ ຢູ່  6 ​ແຂວງ​ຂອງລາວ ສົ່ງ​ຜົນ​ກະທົບ​​ໂດຍ​ກົງ ຕໍ່​ປະຊາຊົນ ​ໃນ 37 ​ເມືອງ, 788 ບ້ານ, 54.207 ຄອບຄົວ ​ແລະ​ ​ເຮັດ​ໃຫ້​ມີ​ຜູ້​ເສຍ​ຊີວິດ 2 ຄົນ (ສະ ຫວັນ​ນະ​ເຂດ 1 ຄົນ, ຈຳປາ​ສັກ 1 ຄົນ), ສູນຫາຍ 2 ຄົນ ຢູ່​ແຂວງ​ຈຳປາ​ສັກ, ປະຊາຊົນ​ຍົກຍ້າຍ 3.400 ກວ່າ​ຄອບຄົວ; ສ້າງ​ຄວາມ​ເສຍ​ຫາຍ ​ຕໍ່​ບ້ານ​ເຮື​ອນປະຊາຊົນ, ​ເນື້ອ​ທີ່​ນາ​ຖືກ​ນໍ້າ​ຖ້ວມ 130.569 ກວ່າ​ເຮັກຕາ, ສວນ 2.581 ​ເຮັກຕາ, ໜອງ​ປາ 953 ໜອງ, ຊົນລະປະທານ 26 ​ແຫ່ງ, ​ເສັ້ນທາງ​ຖືກ​ນ້ຳ​ຖ້ວມ 139 ກມ, ຂົວ 6 ​ແຫ່ງ, ​ໂຮງ​ຮຽນ 45 ​ແຫ່ງ, ສຸກສາລາ 2 ​ແຫ່ງ ​ແລະ ສັດລ້ຽງ​ຫລາຍ​ກວ່າ 136 ​ໂຕ ຖືກ​ຍ້າຍ​ໄປ​ຢູ່​ບ່ອນ​ທີ່​ປອດ​​ໄພ. ​ປັດຈຸບັນ​ກົມ​ສັງຄົມ​ສົງ​ເຄາະ (ກອງ​ເລຂາ ຄະນະ​ກຳມະການ​ປ້ອງ​ກັນ ​ແລະ ຄວບ​ຄຸ​ມ​ໄພພິບັດ​ແຫ່ງ​ຊາດ) ກໍາລັງ​ຈັດ​ສົ່ງ​ເຄື່ອງ​ຊ່ວຍ​ເຫລືອ​ ​ໃຫ້​ແກ່​ບັນດາ​ແຂວງ ລວມທັງ​ງົບປະມານ ​ຮັບ​ໃຊ້​ບໍລິຫານ​ສຸກ​ເສີນ​ແຂວງ​ລະ 50 ລ້ານ​ກີບ.

ປະຊາຊົນ 6 ແຂວງທີ່ຖືກນໍ້າຖ້ວມ ຕ້ອງການຄວາມຊ່ວຍເຫລືອຮີບດ່ວນ.(ພາບ: ຂປລ)

ສະ​ເພາະ​ຄວາມ​ຕ້ອງການ ​ຮີບ​ດ່ວນ​ຂອງ​ແຕ່ລະ​ແຂວງ ​ສັງ​ລວ​ມ​ໄດ້ດັ່ງ​ນີ້: ​ແຂວງ​ສະຫວັນ​ນະ​ເຂດ ຕ້ອງການ​ເຂົ້າສານ ຈຳນວນ 150 ​ໂຕນ, ນ້ຳ​ດື່ມ ຈຳນວນ 10 ພັນ​ແພັກ, ໜີ່ສຳ​ເລັດ​ຮູບ ຈຳນວນ 3 ພັນ​​ແກັດ​ໃຫຍ່, ປາກະປ໋ອງ​ຈຳນວນ 1.500 ​ແກັດ, ​ເປົາ​ຊາຍ 50 ພັນ​ໜ່ວຍ ​ເພື່ອ​​ເສີມ​ຄູ​ກັນ​ນ້ຳ ​ແລະ ປົວ​ແປງ​ຫລັງ​ນໍ້າ​ຫລຸ​ດ, ​ເຮືອ​ກູ້​ໄພໃຫ້​​ແກ່​ເມືອງ​ຊົນນະ​ບູລີ, ງົບປະມານ​ໃນ​ການ​ບໍລິຫານ​ນ້ຳມັນ​ລົດ, ​ເຮືອ ​ແລະ ຈັດ​ຊື້​ເຄື່ອງ​ອຸປະ​ໂພ​ກ-ບໍລິ​​ໂພ​ກ ​ໃຫ້​ປະຊາຊົນທີ່​ໄດ້​ຮັບ​ຜົນ​ກະທົບ ຢູ່​ແຕ່ລະ​ເມືອງ​ຈຳນວນ 250 ລ້ານກີບ; ​ແຂວງ​ຄຳ​ມ່ວນ ຕ້ອງການ​ເຄື່ອງ​ອຸປະ​ໂພ​ກ-ບໍລິ​ໂພ​ກ ​ໂດຍ​ສະ​ເພາະ​ແມ່ນ​ເຂົ້າ ​ແລະ ອາຫານ​ແຫ້ງ, ຢາ​ປົວ​ພະຍາດ​ຄົນ-ສັດ, ​ເຮືອ​ຮັບ​ໃຊ້​ໃນ​ການ​ກູ້​ໄພ ​ແລະ ຂົນ​ຍ້າຍ​ປະຊາຊົນ, ງົບປະມານ​ບໍລິຫານ ​ແລະ ​ແຮ​ສຸກ​ເສີນ; ​ແຂວງ​ສາລະ​ວັນ ຕ້ອງການ​ເຮືອ​ກູ້​ໄພ​ພ້ອມ​ຄົນ​ຂັບ, ​ເຄື່ອງ​ອຸ​ປະ​ໂພ​ກ-ບໍລິ​ໂພ​ກ ​ເປັນ​ຕົ້ນ ນ້ຳ​ດື່ມ, ​ເຂົ້າ​, ​ເຄື່ອ​ງ​ໃຊ້​ຄົວ​ເຮືອນ, ​ເຄື່ອງ​ນອນ, ງົບປະ ມານໃນ​ການ​ບໍລິຫານ​ນ້ຳມັນ​ ​ແລະ ​ເສື້ອ​ຊູຊີບ; ​ແຂວງ​ຈຳປາ​ສັກ ຕ້ອງການ​ເຮືອ ​ແລະ ຄົນ​ຂັບ ​ເພື່ອ​ເຄື່ອນ​ຍ້າຍ​ປະຊາຊົນ, ​ເຄື່ອງ​ອຸປະ​​ໂພ​ກ- ບໍລິ​ໂພ​ກ​ຕ່າງໆ ​ແລະ ງົບປະມານ​ໃນ​ການ​ບໍລິຫານ ​ຕອບ​ໂຕ້​ສຸກ​ເສີນ.

 ​ແຂວງ​ເຊ​ກອງ ສະ​ເໜີ​ໃຫ້ ຄະນະ​ກຳມະການ​ປ້ອງ ​ແລະ ຄວບ​ຄຸມ​ໄພພິບັດ​ແຫ່ງ​ຊາດ ລົງ​ຊຸກຍູ້​ປະຕິບັດ​ການ​ຕອບ​ໂຕ້​ສຸກ​ເສີນ, ງົບປະມານ​ໃນ​ການ​ບໍລິຫານ ​ປະຕິບັດ​ການ​ຕອບ​ໂຕ້​ສຸກ​ເສີນ ​ໂດຍ​ສະ​ເພາະ​ແມ່ນ​ນ້ຳມັນ, ​ເຂົ້າກິນ​ຈຳນວນ 100 ​ໂຕນ, ອາຫານ​ແຫ້ງ ​ເປັນ​ຕົ້ນ​ແມ່ນ ໝີ່ 1 ພັນ​ແກັດ, ປາກະປ໋ອງ 1 ພັນ​ແກັດ, ນ້ຳ​ດື່ມ 1 ພັນ​​ແກັດ, ​ເຄື່ອງ​ໃຊ້​ໃນ​ຄົວ​ເຮືອນ, ​ເຄື່ອງ​ນອນ, ​ເຄື່ອງນຸ່ງ​ຫົ່ມ ​ແລະ ພາຫະນະ​ລົດ​ໃຫຍ່, ລົດ​ກະບະ, ​ເຮືອ, ຍົນ ​ເພື່ອ​ຂົນ​ສົ່ງ​ຊ່ວຍ​​ເຫລືອ ​ເຂົ້າ​ໄປ​ເມືອງ​ກະລຶມ ​ແລະ ​ເມືອງດາກ​ຈຶງ (​ເມືອງ​ທີ່​ເສັ້ນທາງ​ຕັດຂາດ); ​ແຂວງ​ອັດ​ຕະປື ຕ້ອງການ​ໂຄມ​ໄຟ 28 ໜ່ວຍ, ​ເສື້ອກັນ​ຝົນ 210 ຜືນ, ​ເສື້ອ​ຊູຊີບ 210 ຜືນ, ​ເຊືອກ​ກູ້​ໄພ 14 ກໍ້, ນໍ້າມັນ​ເຮືອ (​ແອັດ​ຊັງ ​ແລະ ນ້ຳມັນ​ອຸ​ຕະລຸກ ປົນ​ນ້ຳມັນ​ເຮືອ), ໝໍ້​ໄຟ​ໃສ່​ຈັກ​ປັ່ນ​ໄຟຟ້າ 4 ໜ່ວຍ ​ແລະ ​ເຄື່ອງ​ອຸປະ​ໂພ​ກ-ບໍລິ​ໂພ​ກ.

ໃນວັນທີ 5 ກັນຍາ 2019 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕິ ພ້ອມຄະນະ ໄດ້ເຄື່ອນໄຫວຕິດຕາມສະພາບ ນ້ຳຖ້ວມຢູ່ແຂວງຈຳປາສັກ. (ພາບ: ຂປລ)

ວັນທີ 5 ກັນຍາ 2019, ທີ່ສໍານັກງານນາຍົກລັດຖະມົນຕີ; ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຮຽກປະຊຸມດ່ວນ ເພື່ອຮັບມື ແລະ ແກ້ໄຂໄພນໍ້າຖ້ວມທີ່ພວມເກີດຂຶ້ນ ຢູ່ບັນດາແຂວງພາກກາງ ແລະ ພາກໃຕ້ ໂດຍສະເພາະແມ່ນ ການຊ່ວຍເຫລືອພີ່ນ້ອງປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ທີ່ເກີດຂຶ້ນຢູ່ 6 ແຂວງ (ຄໍາມ່ວນ, ສະຫວັນນະເຂດ, ຈໍາປາສັກ, ອັດຕະປື, ສາລະວັນ ແລະ ເຊກອງ) ​ໂດຍ​ທ່ານໄດ້​ຊີ້ນຳໃຫ້ຈັດສົ່ງເຮືອ, ເຄື່ອງອຸປະໂພກ-ບໍລິໂພກ ແລະ ງົບປະມານຈຳນວນໜຶ່ງ ໃຫ້ແກ່ບັນດາແຂວງ ທີ່ໄດ້ຮັບຜົນກະທົບຢ່າງຮີບດ່ວນ.

ທ່ານ ທອງລຸນ ສີສຸລິດ ​ຍັງໄດ້ຊີ້ນຳໃຫ້ບັນດາກະຊວງ ຮີບຮ້ອນຈັດຕັ້ງປະຕິບັດ ໂດຍ​ສະ​ເພາະ​ແມ່ນ ໃຫ້ກະຊວງປ້ອງກັນປະເທດ ສືບຕໍ່ຊີ້ນຳ, ຈັດຕັ້ງກໍາລັງທະຫານ, ພາຫະນະ, ໜ່ວຍແພດສຸກເສີນເຂົ້າຊ່ວຍເຫລືອປະຊາຊົນ ທີ່ກຳ ລັງປະສົບໄພນໍ້າຖ້ວມ ໃຫ້ທັນການ ແລະ ທົ່ວເຖິງ; ໃຫ້ກະຊວງແຮງງານ ແລະ ສະຫວັດດີການສັງຄົມ ວາງແຜນແກ້ໄຂ ແລະ ຊ່ວຍເຫລືອໃຫ້ດີ ແລະ ແທດຕົວຈິງ ໂດຍມີການຈັດຕັ້ງແບ່ງງານກັນລະອຽດຈະແຈ້ງ; ໃຫ້ກະຊວງປ້ອງກັນຄວາມສະຫງົບ ເອົາໃຈໃສ່ຕໍ່ວຽກງານປ້ອງກັນ ຄວາມສະຫງົບໃຫ້ດີ ໂດຍສະເພາະການປົກປັກຮັກສາວັດຖຸສິ່ງຂອງ ຂອງປະຊາຊົນ ໃນພາວະເກີດໄພພິບັດສຸກເສີນຄືປັດຈຸບັນ ເພື່ອບໍ່ໃຫ້ມີການສວຍໂອກາດຂອງຄົນບໍ່ດີ; ໃຫ້ກະຊວງການເງິນ, ກະຊວງແຮງງານ ແລະ ສະຫວັດດີການສັງຄົມ ສົມທົບກັນຈັດສັນງົບປະມານ ເພື່ອແກ້ໄຂໄພພິບັດຄັ້ງນີ້ ໃຫ້ໄດ້ຮັບຜົນເປັນຢ່າງດີ; ໃຫ້ກະຊວງໂຍທາທິການ ແລະ ຂົນສົ່ງ ເອົາໃຈໃສ່ເກັບກຳຂໍ້ມູນ ແລະ ເລັ່ງແກ້ໄຂບັນຫາເສັ້ນທາງ, ຂົວ ແລະ ອື່ນໆ ທີ່ເປ່ເພເສຍຫາຍ ແລະ ບາງເສັ້ນທາງທີ່ຖືກຕັດຂາດ ໃຫ້ສາມາດສັນຈອນໄປມາໄດ້, ພ້ອມກັນນັ້ນ ກໍໃຫ້ຊ່ວຍເຫລືອຜູ້ໂດຍສານ ທີ່ຍັງຄ້າງຢູ່ຕາມເຂດນ້ຳຖ້ວມ ໃຫ້ສາມາດໄປຮອດຈຸດໝາຍປາຍທາງ; ໃຫ້ກະຊວງສາທາລະນະສຸກ ສົມທົບກັບກະຊວງປ້ອງກັນປະເທດ ຈັດຕັ້ງພະນັກງານແພດ-ໝໍ, ອຸປະກອນການແພດທີ່ຈຳເປັນ, ຢາປ້ອງກັນ ແລະ ປິ່ນປົວພະຍາດ ໄປຊ່ວຍເຫລືອປະຊາຊົນ ຕາມຈຸດເຕົ້າໂຮມຕ່າງໆ ຂອງແຂວງທີ່ໄດ້ຮັບຜົນກະທົບ.

ໃນວັນທີ 5 ກັນຍາ 2019 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕິ ພ້ອມຄະນະ ໄດ້ເຄື່ອນໄຫວຕິດຕາມສະພາບ ນ້ຳຖ້ວມຢູ່ແຂວງຈຳປາສັກ ​ໂດຍ​ທ່ານໄດ້ຂີ່ເຮືອກວດກາ ເບິ່ງເຮືອນຊານບ້ານຊ່ອງແລະ ເນື້ອທີ່ການຜະລິດຂອງປະຊາຊົນ ຜູ້ປະສົບໄພນ້ຳຖ້ວມຢູ່ເຂດບ້ານແກ, ນະຄອນປາກເຊ, ພ້ອມ​ທັງ​ໄດ້​ມອບເຂົ້າສານອາຫານແຫ້ງ ແລະ ນໍ້າດື່ມ ເພື່ອເປັນການບັນເທົາທຸກເບື້ອງຕົ້ນໃຫ້ແກ່ປະຊາຊົນ 4 ບ້ານຄື: ບ້ານແກ,ແກ້ວສຳພັນ, ຫ້ວຍປູນ ແລະ ໂພນສະອາດ ຈຳ ນວນ 50 ຄອບຄົວ ທີ່​ຢູ່ສູນພັກຊົ່ວຄາວ ໂຮງຮຽນມັດທະຍົມຕອນຕົ້ນແກ້ວສຳພັນ. ທ່ານຮອງນາຍົກລັດຖະມົນຕີ ກໍໄດ້ເດີນທາງໄປຢ້ຽມຢາມ ຖາມຂ່າວຜູ້ປະສົບໄພນ້ຳຖ້ວມມ ແລະ ມອບເຄື່ອງຊ່ວຍເຫລືອ ແກ່ປະຊາຊົນຢູ່ເຂດອື່ນໆຕື່ມອີກ, ທັງນີ້ ກໍເພື່ອນຳເອົາຄວາມຢື້​ຢາມ​ຖາມ​ຂ່າວ, ຄວາມເປັນຫ່ວງເປັນໄຍ ຂອງພັກ-ລັດຖະບານ ທີ່ມີຕໍ່ປະຊາຊົນບັນດາເຜົ່າ, ​ໂດຍສະເພາະຕໍ່ຜູ້ປະສົບໄພນ້ຳຖ້ວມໃຫ້ມີກຳລັງໃຈ, ອົດທົນຜ່ານຜ່າຄວາມຫຍຸ້ງຍາກ ຈົນກວ່າສະພາບຈະກັບເຂົ້າສູ່ປົກກະຕິ.

(ໄຊພອນ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
ບົດ​ຄວາມ​ຫລ້າ​ສຸດ
Scroll