ນາຍົກລັດຖະມົນຕີ ເນັ້ນໃຫ້ສືບຕໍ່ພັດທະນາລະບົບການສຶກສາ ແລະ ຄູ

09:38 2019/10/07

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຮຽກຮ້ອງຜູ້ບໍລິຫານການສຶກສາທຸກຂັ້ນ ໃຫ້ເອົາໃຈໃສ່ສືບຕໍ່ພັດທະນາລະບົບການສຶກສາ ແລະ ຄູ ໃຫ້ທັນຍຸກທັນໄໝ ແລະ ຕໍ່ເນື່ອງ ເພື່ອຮັບປະກັນໃຫ້ແທດເໝາະກັບຄວາມ ຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງປະເທດ. ທ່ານນາຍົກລັດຖະມົນຕີ ກ່າວໃນໂອກາດເຂົ້າຮ່ວມພິທີສະເຫລີມສະຫລອງວັນຄູແຫ່ງຊາດ (7 ຕຸລາ 2019) ຄົບຮອບ 25 ປິ ເຊິ່ງຈັດຂຶ້ນຢ່າງເປັນທາງການ ທີ່ມະຫາວິທະຍາໄລແຫ່ງຊາດ ໃນວັນທີ 4 ຕຸລາ 2019 ໂດຍມີທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ, ບັນດາຮອງລັດຖະມົນຕີ, ຄູ-ອາຈານ ແລະ ນັກສຶກສາ ເຂົ້າຮ່ວມ.

ນາຍົກລັດຖະມົນຕີ ເນັ້ນໃຫ້ສືບຕໍ່ພັດທະນາລະບົບການສຶກສາ ແລະ ຄູ
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.(ພາບ:http://www.tonamcha.com)

ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍວັນຄູແຫ່ງຊາດ ຄົບຮອບ 25 ປີ ແລະ ຝາກຄຳຢື້ຢາມຖາມຂ່າວ ຄູ-ອາຈານ ໃນຂອບເຂດທົ່ວປະເທດ ແລະ ໄດ້ຕາງໜ້າໃຫ້ສູນກາງພັກ, ລັດຖະບານ ແລະ ປະຊາຊົນລາວ ສະແດງ ຄວາມຮູ້ບຸນຄຸນຕໍ່ຂະແໜງການສຶກສາ ກໍຄືບັນດາຄູ-ອາຈານ ທີ່ໄດ້ເສຍສະຫລະກຳລັງກາຍ, ກຳລັງກາຍເຂົ້າໃນການພັດທະນາການສຶກສາ ແລະ ຊັບພະຍາກອນມະນຸດ ເພື່ອປະກອບສ່ວນສ້າງສາ ແລະ ພັດທະນາປະເທດຊາດ. ພ້ອມທັງໄດ້ກ່າວຢໍ້າວ່າ: “ຢາກພັດປະເທດຊາດໃຫ້ມີຄວາມກ້າວໜ້າຕ້ອງພັດທະຄົນ ເພາະວ່າຄົນເປັນກຳລັງແຮງຂັບເຄື່ອນໃນການພັດທະນາປະເທດຊາດແລະ ຢາກໄດ້ຊັບພະຍາກອນມະນຸດທີ່ດີ ຕ້ອງມີລະບົບການສຶກສາທີ່ດີ, ມີການປະຕິຮູບ ແລະ ການປ່ຽນແປງໃຫ້ທັນຍຸກ ທັນສະໄໝ” ເພື່ອເຮັດໃຫ້ຂະແໜງການສຶກສາມີການພັດທະນາຢ່າງຕໍ່ເນື່ອງ, ລະບົບການສຶກສາ ຕ້ອງໄດ້ຮັບການປະຕິຮູບໃຫ້ທັນຍຸກທັນສະໄໝ ແລະ ທັນກັບຄວາມຮຽກຮ້ອງຕ້ອງການຂອງການປ່ຽນແປງໃໝ່. ຂະນະດຽວກັນ ຕ້ອງມີຄູ-ອາຈານ ຜູ້ທີ່ມີຄວາມຮູ້, ຄວາມສາມາດ ແລະ ຜູ້ທີ່ໃຫ້ຄວາມຮູ້ທີ່ດີ ແລະ ເກັ່ງ, ທັນຍຸກ, ທັນສະໄໝ ແລະ ເປັນຜູ້ທີ່ໃຝ່ຮູ້ໃຝ່ຮຽນຢູ່ຕະຫລອດເວລາ. ການສຶກສາຕ້ອງມີການປະຕິຮູບແລ້ວປະຕິຮູບອີກ, ປ່ຽນແປງແລ້ວປ່ຽນແປງອີກ ເພາະວ່າຄວາມຮຽກຮ້ອງຕ້ອງການເກີດຂຶ້ນໃໝ່ເລື້ອຍໆ ໃນຍຸກແຫ່ງການເຊື່ອມໂຍງ, ຍຸກໂລກາພິວັດ, ຍຸກ 4.0 ແລະ ຍຸກແຫ່ງການແຂ່ງຂັນ. 

ໂອກາດດຽວກັນ, ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ກໍໄດ້ລາຍງານກ່ຽວກັບການຂະຫຍາຍຕົວດ້ານປະລິມານຂອງຄູໃນໄລຍະ 25 ປີຜ່ານມາ, ການພັດທະນາຄູ, ການສ້າງສິ່ງຈູງໃຈໃຫ້ແກ່ຄູ ເພື່ອໃຫ້ມີຄວາມພູມໃຈ ແລະ ທຸ່ນທ່ຽງໃນອາຊີບຕົນ, ລວມທັງການປັບປຸງການບໍລິຫານ ແລະ ການຄຸ້ມຄອງການສຶກສາ ເຊິ່ງນັບແຕ່ປີ 1994 ເປັນຕົ້ນມາ, ການສຶກສາໄດ້ຮັບການພັດທະນາທາງດ້ານປະລິມານ ແລະ ຄຸນນະພາບຢ່າງກ້າວກະໂດດ ນັບທັງການສຶກສາກ່ອນໄວຮຽນ, ປະຖົມສຶກສາ, ມັດທະຍົມສຶກສາ, ການສຶກສາສາຍອາຊີວະສຶກສາ ແລະ ອົບຮົມວິຊາຊີບ, ການສຶກສາສົງ ແລະ ອື່ນໆ. ໃນຊຸມປີຕໍ່ໜ້າ ກະຊວງສຶກສາທິການ ແລະ ກິລາ ຈະໄດ້ເອົາໃຈໃສ່ບາງວຽກງານທີ່ເປັນຈຸດສຸມຄື: ປັບປຸງສັບຊ້ອນ ແລະ ຈັດສັນຄູຄືນໃໝ່ ໂດຍເລ່ັງໃສ່ເຂດຫ່າງໄກສອກຫລີກບ່ອນທີ່ຂາດເຂີນຄູ, ການກໍ່ສ້າງຄູຈະເນັ້ນໜັກໃນວິຊາທີ່ຂາດຄູ ແລະ ມີການສົ່ງເສີມໃຫ້ນັກຮຽນເຂົ້າຮຽນຄູໃນວິຊາທີ່ຕ້ອງການ, ປັບປຸງບາງມາດຕາຂອງດຳລັດວ່າດ້ວຍລັດຖະກອນ ຄູສະບັບເລກທີ 177 ຄືນໃໝ່ ເປັນຕົ້ນແມ່ນການກຳນົດຊົ່ວໂມງສອນຂອງຄູ, ການປະເມີນຜົນງານຂອງຄູ ແລະ ຜູ້ບໍລິຫານໂຮງຮຽນ ກໍຄືນະໂຍບາຍດ້ານຕ່າງໆ ໃຫ້ມີຄວາມສອດຄ່ອງກວ່າເກົ່າ, ໄປພ້ອມໆກັບການປັບປຸງນິຕິກຳອື່ນໆທີ່ກ່ຽວຂ້ອງກັບຄູ ເປັນຕົ້ນແມ່ນກ່ຽວກັບຄູອາສາສະໝັກ ແລະ ຄູສັນຍາຈ້າງທີ່ມີຢູ່ແລ້ວ. ທ່ານ ນາງ ແສງເດືອນ ຫລ້າຈັນທະບູນ ຍັງໄດ້ຮຽກຮ້ອງມາຍັງຄູ-ອາຈານ ຈົ່ງໄດ້ເສີມຂະຫຍາຍຄວາມຮັບຜິດຊອບຂອງຕົນ ໃນການອົບຮົມສັ່ງສອນ ແລະ ສິດສອນນັກຮຽນໃຫ້ມີຄວາມຮູ້, ຄວາມສາມາດ,ມີຄຸນສົມບັດສິນທໍາປະຕິວັດ, ປະຕິບັດຈັນຍາບັນຂອງຄູໃຫ້ເລິກເຊິ່ງ ໃຫ້ສົມກັບຄຳວ່າຄູເປັນແມ່ພິມຂອງຊາດ.

ການສະເຫລີມສະຫລອງວັນຄູແຫ່ງຊາດທຸກໆປີ ແມ່ນເພື່ອປຸກລະດົມຈິດໃຈໃຫ້ທົ່ວສັງຄົມໄດ້ສະແດງອອກເຖິງການສົ່ງເສີມ, ເຊີດຊູບົດບາດ, ກຽດສັກສີ ຂອງຄູ-ອາຈານໃຫ້ສູງຂຶ້ນ, ທັງເປັນການໂຄສະນາເຜີຍແຜ່ຜົນງານ, ຄຸນງາມຄວາມດີຂອງ ຄູ-ອາຈານ ໃຫ້ທຸກຄົນໃນສັງຄົມໄດ້ຮັບຮູ້ເຖິງຜົນງານຂອງຄູ ພ້ອມທັງສະແດງອອກເຖິງຄວາມກະຕັນຍູ, ຮູ້ບຸນຄຸນຕໍ່ຄູ-ອາຈານທີ່ໄດ້ສິດສອນໃຫ້ຄວາມຮູ້ແກ່ຕົນ ນັບທັງອາດີດ ກໍຄືປັດຈຸບັນ.

      ໃນສົກຮຽນ 2017-2018, ລັດຖະກອນທົ່ວຂະແໜງການສຶກສາທິການ ແລະ ກິລາ ມີທັງໝົດ 85.812 ຄົນ, ຍິງ 44.455 ຄົນ, ໃນນັ້ນລັດຖະກອນຄູ 76.528 ຄົນ, ຍິງ 40.951 ຄົນ ແລະ ລັດຖະກອນບໍລິຫານ 9.284 ຄົນ, ຍິງ 3.504 ຄົນ.
(ແຫຼ່ງ​ຂໍ້​ມູນ​: ຂ​ປ​ລ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
ບົດ​ຄວາມ​ຫລ້າ​ສຸດ
Scroll