ການນຳລັດຖະບານ ລົງຕິດຕາມຢ້ຽມຢາມ ແລະ ເຮັດວຽກ ຢູ່ເມືອງວຽງໄຊ ແຂວງຫວົພັນ

19:40 2019/08/13

ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຕິດຕາມຄະນະ ຂອງ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ເຄື່ອນໄຫວຢ້ຽມຢາມ ແລະ ເຮັດວຽກ ທີ່ເມືອງວຽງໄຊ ໃນວັນທີ 11 ສິງຫາ ນີ້ ພ້ອມຄະນະຢ້ຽມຢາມ ແລະ ເຮັດວຽກຢູ່ ເມືອງວຽງໄຊ, ແຂວງຫົວພັນ ໂດຍໄດ້ຮັບການຕ້ອນຮັບຈາກທ່ານ ວັນໄຊ ແພງຊຸມມາ ເລຂາພັກແຂວງ, ເຈົ້າແຂວງຫົວພັນ ມີຄະນະພັກ, ຄະນະນຳຂອງເມືອງ, ບັນດາຫ້ອງການອ້ອມຂ້າງແຂວງ, ພະນັກງານ, ທະຫານ, ຕໍາຫຼວດ ພ້ອມດ້ວຍປະຊາຊົນໃຫ້ການຕ້ອນຮັບຢ່າງສົມກຽດ.

ການນຳລັດຖະບານ ລົງຕິດຕາມຢ້ຽມຢາມ ແລະ ເຮັດວຽກ ຢູ່ເມືອງວຽງໄຊ ແຂວງຫວົພັນ
 ທ່ານຮອງນາຍົກລັດຖະມົນຕີກໍ່ໄດ້ມອບເງິນສົດ ຈໍານວນ 100.000.000 ລ້ານກີບ ພ້ອມດ້ວຍເຄື່ອງອຸປະໂພກ-ບໍລິໂພກ ມູນຄ່າ 20 ລ້ານກີບ ໃຫ້ແກ່ອໍານາດການປົກຄອງເມືອງວຽງໄຊ ເພື່ອນໍາໄປມອບຕໍ່ໃຫ້ກັບພໍ່ແມ່ປະຊາຊົນຕ່ືມອີກ.

ໂອກາດການລົງຢ້ຽມຢາມ ແລະ ເຮັດວຽກໃນຄັ້ງນີ້ ທ່ານຮອງນາຍົກລັດຖະມົນຕີໄດ້ຮັບຟັງການລາຍງານໂດຍສັງເຂບ ຈາກທ່ານ ພອນສຸກ ອິນທະວົງ ເລຂາພັກເມືອງ, ເຈົ້າເມືອງວຽງໄຊ ຈາກນັ້ນ, ກໍໄດ້ຮັບຟັງການລາຍງານສະພາບຜົນກະທົບຈາກພາຍຸໝູນວິພາ ທີ່ເກີດຂຶ້ນຢູ່ເມືອງວຽງໄຊ ໃນລະຫວ່າງວັນທີ 2-5 ສິງຫາ 2019 ເຊິ່ງມີ 29 ບ້ານໄດ້ຮັບຜົນກະທົບຈາກພະຍຸດັ່ງກ່າວໄດ້ສ້າງຜົນເສຍຫາຍອັນໜັກໜ່ວງຕໍ່ປະຊາຊົນຊາວເມືອງວຽງໄຊ ໂດຍສະເພາະບັນດາບ້ານທີ່ຢູ່ຂອບເຂດຊາຍແດນ ເມືອງກວັນເຊີນ, ແຂວງແທັງຮວ່າ, ສສ ຫວຽດນາມ ຢູ່ຕາມລ້ອງນໍ້າງາ, ນໍ້າພູນ, ນໍ້າສິມ ແລະ ນໍ້າໂສຍ ສໍາລັບບ້ານທີ່ໄດ້ຮັບຜົນກະທົບຮ້າຍແຮງກວ່າໝູ່ແມ່ນບ້ານຫີນດໍາ, ບ້ານນາຮາມ, ບ້ານຄໍານາງ ເຊິ່ງມີດິນເຈື່ອນໄຫຼລົງມາທັບເຮືອນປະຊາຊົນຢູ່ບ້ານຫີນດໍາ 2 ຫຼັງ, ບ້ານຄໍານາງ 2 ຫຼັງ ແລະ ບ້ານນາຮາມ 1 ຫຼັງເຮັດໃຫ້ມີຜູ້ສູນຫາຍຈຳນວນ 7 ຄົນ, ບາດເຈັບ 5 ຄົນ ແລະ ເສຍຊີວິດ 1 ຄົນ; ເສັ້ນທາງເປເພ 4 ເສັ້ນ ຄື: ເສັ້ນທາງພູນໃໝ່-ຄໍານາງ, ເສັ້ນທາງ ກ້າງໂຄ້ງ-ບ້ານບໍ, ເສັ້ນທາງກອງ 11-ຫ້ວຍຕຸງ ແລະ ເສັ້ນທາງດ່ານສາກົນນໍ້າໂສຍ-ບ້ານໂສຍ; ຄອງເໝືອງເປເພ່ 33 ເສັ້ນ; ຝາຍເປເພ 12 ແຫ່ງ; ເນື້ອທີ່ນາຖືກນໍ້າຖ້ວມ, ນໍ້າເຊາະເຈື່ອນເສຍຫາຍ ປະມານ 98 ເຮັກຕາ; ເນື້ອທີ່ໄຮ່ເຂົ້າເສຍຫາຍ 2 ເຮັກຕາ, ສັດໃຫຍ່ ງົວ-ຄວາມ 18 ໂຕ, ຫົວປັນໄຟນໍ້າຢອດ ເສຍຫາຍ 80 ເຄື່ອງ ນອກນີ້ກໍຍັງມີປະເພດສັດລ້ຽງຂອງປະຊາຊົນເສຍໃຫ້ຈໍານວນຫຼວງຫຼາຍ ຄາດຄະເນຄວາມເສຍຫາຍໃນເບື້ອງຕົ້ນຈາກໄພພິບັດໃນຄັ້ງນີ້ທົ່ວເມືອງວຽງໄຊທັງໝົດປະມານ 13 ຕື້ກວ່າກີບ. ຕໍ່ກັບສະພາບການດັ່ງກ່າວ ພາຍຫຼັງທີ່ໄດ້ຮັບແຈ້ງຂ່າວ ຈາກກອງຮ້ອຍທະຫານຊາຍແດນ 215 ວ່າເກີດມີພາຍຸຂັ້ນຮ້າຍແຮງຢູ່ເຂດນໍ້າງາ ແລະ ມີດິນເຈື່ອນທັບຄົນ ທາງຄະນະປະຈໍາພັກເມືອງກໍ່ໄດ້ຮີບຮ້ອນຈັດກໍາລັງເຂົ້າຊ່ວຍເຫຼືອທັນທີ ໂດຍການສົບທົບກັບກອງທະຫານ ແລະ ປະຊາຊົນຊອກຄົ້ນຜູ້ສູນຫາຍ ແຕ່ກໍ່ບໍ່ທັນພົບຮ່ອງຮອຍຂອງຜູ້ສູນຫາຍ ຈຶ່ງໄດ້ເຮັດໜັງສືສະເໜີຫາການນໍາເມືອງກວັນເຊິນ ສສ ຫວຽດນາມ ໃຫ້ຊ່ວຍຄົ້ນຫາຜູ້ສູນຫາຍ ທີ່ອາດຖືກກະເເສນໍ້າພັດໄຫຼລົງໄປ ຮອດເຂດເມືອງກວັນເຊິນ ສສ ຫວຽດນາມ.

ຄະນະຜູ້ແທນຂັ້ນສູງ ຈາກສູນກາງລົງຕິດຕາມສະພາບການຟື້ນຟູຊີວິດການເປັນຢູ່ ຂອງປະຊາຊົນເມືອງວຽງໄຊ.

ໂອກາດດຽວກັນນີ້, ທ່ານຮອງນາຍົກລັດຖະມົນຕີ ກໍໄດ້ຮັບຟັງການລາຍງານສະພາບການຟື້ນຟູຊີວິດການເປັນຢູ່ຂອງປະຊາຊົນຈາກທ່ານເຈົ້າເມືອງວຽງໄຊ ແລະ ວິທີການແກ້ໄຂຜົນກະທົບຈາກໄພພິບັດນໍ້າຖ້ວມ ພ້ອມທັງໃຫ້ກຽດໂອ້ລົມ ແລະ ເນັ້ນໜັກໃຫ້ອໍານາດການປົກຄອງເມືອງວຽງໄຊ ກໍ່ຄືແຂວງຫົວພັນ ໃຫ້ເອົາໃຈໃສ່ສືບຕໍ່ຄົ້ນຫາຜູ້ສູນຫາຍຈາກໄພພິບັດທາງທໍາມະຊາດໂດຍການສົມທົບກັບ ກໍາລັງຫວຽດນາມຊອກຄົ້ນຫາ ທີ່ຄາດຄະເນວ່າອາດຖືກກະເເສນໍ້າພັດໄຫຼລົງໄປ ຮອດເຂດເມືອງກວັນເຊິນ ສສ ຫວຽດນາມ; ເອົາໃຈໃສ່ກວດກາຄືນ ໃນຄວາມເສຍຫາຍຂອງແຕ່ລະຄອບຄົວທີ່ໄດ້ຮັບຜົນກະທົບ ແລະ ສີ່ງຂອງສາທາລະນະ ເປັນຕົ້ນ: ໂຮງຮຽນ, ສຸກສາລາ, ຫ້ອງການຕ່າງໆ ລວມທັງພື້ນຖານໂຄງລາງ ໃຫ້ຄິດໄລມູນຄ່າຄວາມເສຍຫາຍຢ່າງລະອຽດ; ໃນການຟື້ນຟູ ບ້ານເຮືອນແມ່ນໃຫ້ພາກັນຄົ້ນຄວ້າຢ່າງລະອຽດວ່າຄວນໄປໃນທິດທາງໃດ ເພື່ອຫາທາງແກ້ໄຂຊ່ວຍປະຊາຊົນ ພ້ອມທັງໃຫ້ການຊ່ວຍເຫຼືອທາງດ້ານແຮງງານ, ວັດຖຸປັດໃຈ, ເຄື່ອງອຸປະໂພກ-ບໍລິໂພກ, ແຫຼ່ງທໍາການຜະລິດກະສິກໍາ-ປູກຝັງລ້ຽງສັດຂອງປະຊາຊົນ ແລະ ເອົາໃຈໃສ່ເປັນພິເສດໃນການຟື້ນສະພາບຈິດໃຈຂອງພໍ່ແມ່ປະຊາຊົນ; ຮີບຮ້ອນປັງປຸງໂຮງຮຽນໃຫ້ນັກຮຽນກ່ອນທີ່ຈະເປີດເທີມຮຽນ, ສ້າງສຸກສາລາ, ສ້ອມແປງເສັ້ນທາງ ແລະ ທີ່ພັກອາໄສຂອງພໍ່ແມ່ປະຊາຊົນ ໂດຍເລີ່ມຈາກສິ່ງທີ່ມີຄວາມຈໍາ; ດ້ານສຸຂະພາບຂອງພໍ່ແມ່ປະຊາຊົນ ຕ້ອງໄດ້ຮັບການເບິ່ງແຍງເປັນພິເສດເພາະອາດຕິດພະຍາດທີ່ມານຳນໍ້າຖ້ວມ ແລະ ເພື່ອເປັນການບັນເທົາທຸກແກ່ຜູ້ປະສົບໄພ ທ່ານຮອງນາຍົກລັດຖະມົນຕີກໍ່ໄດ້ມອບເງິນສົດ ຈໍານວນ 100.000.000 ລ້ານກີບ ພ້ອມດ້ວຍເຄື່ອງອຸປະໂພກ-ບໍລິໂພກ ມູນຄ່າ 20 ລ້ານກີບ ໃຫ້ແກ່ອໍານາດການປົກຄອງເມືອງວຽງໄຊ ເພື່ອນໍາໄປມອບຕໍ່ໃຫ້ກັບພໍ່ແມ່ປະຊາຊົນຕ່ືມອີກ. ໂອກາດດັ່ງກ່າວ, ທ່ານຮອງນາຍຍົກລັດຖະມົນຕີພ້ອມດ້ວຍຄະນະ ໄດ້ລົງພົບປະຢ້ຽມຢາມ ພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມ ແລະ ລົງກວດກາເບີ່ງຄວາມເສຍຫາຍໃນເບື້ອງຕົ້ນ ຕື່ມອີກ.

(来源: ເພັດສະໄໝ/ຂ່າວສານ ແຮງງານ ແລະ ສະຫວັດດີການສັງຄົມ)
;

同类别新闻