ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ໄຂຂຶ້ນຢ່າງເປັນທາງການ ທີ່ປະເທດຍີ່ປຸ່ນ

10:38 2018/10/10

ໃນວັນທີ 9 ຕຸລາ 2018, ຄະນະຜູ້ແທນ ສປປ ລາວ ນໍາໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ເດີນທາງເຂົ້າຮ່ວມກອງປະຊຸມ ສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ທີ່ ນະຄອນຫລວງໂຕກຽວ ປະເທດຍີ່ປຸ່ນ, ພາຍໃຕ້ການເປັນປະທານຂອງທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ແລະ ມີບັນດາຜູ້ນຳຂອງ 5 ປະເທດແມ່ນໍ້າຂອງຄື: ກໍາປູເຈຍ, ສປປ ລາວ, ມຽນມາ, ໄທ ແລະ ສສ.ຫວຽດນາມ ເຂົ້າຮ່ວມ.

ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ໄຂຂຶ້ນຢ່າງເປັນທາງການ ທີ່ປະເທດຍີ່ປຸ່ນ
ກອງປະຊຸມ ສຸດຍອດ ແມ່ນຳ້ຂອງ-ຍີປຸ່ນ ຄັ້ງທີ 10.(ພາບ: ຂປລ)

ກອງປະຊຸມດັ່ງກ່າວ, ໄດ້ຕີລາຄາຄືນຄວາມຄືບໜ້າ ຂອງການຈັດຕັ້ງປະຕິບັດ ບັນດາໂຄງການ ແລະ ແຜນວຽກຕ່າງໆ ພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານສໍາລັບ ປີ 2016-2018 ຂອງຂອບການຮ່ວມມື ແມ່ນໍ້າຂອງ-ຍີ່ປຸ່ນ ໃນໄລຍະຜ່ານມາ ແລະ ຮ່ວມກັນປຶກສາຫາລືກ່ຽວກັບທິດທາງ ເສີມຂະຫຍາຍການຮ່ວມມືໃນຕໍ່ໜ້າ. ໃນໂອກາດດັ່ງກ່າວ, ບັນດາຜູ້ນໍາຂອງ ປະເທດແມ່ນໍ້າຂອງ ໄດ້ສະແດງຄວາມຊົມເຊີຍ ຕໍ່ລັດຖະບານຍີ່ປຸ່ນ ທີ່ໄດ້ມີຄວາມພະຍາຍາມ ສຸມໃສ່ການຊ່ວຍເຫລືອ ເພື່ອພັດທະນາພື້ນຖານໂຄງລ່າງ ອຸດສາຫະກຳພາກພື້ນ ແມ່ນ້ຳຂອງໃນໄລຍະ 3ປີ ຜ່ານມາ, ໂດຍສະເພາະ ການສະໜັບສະໜູນງົ ບປະມານ ຈໍານວນ 750 ຕື້ເຢັນ ເຂົ້າໃນການຈັດຕັ້ງປະຕິບັດໂຄງການຕ່າງໆ ຂອງແຜນຍຸດທະສາດໂຕກຽວ 2015 ແລະ ສະເໜີ ໃຫ້ຍີ່ປຸ່ນ ສືບຕໍ່ໃຫ້ການ ສະໜັບສະໜູນ.

ສໍາລັບ ສປປ ລາວ ທ່ານ ທອງລຸນ ສີສຸລິດ ໄດ້ແລກປ່ຽນທັດສະນະຕໍ່ ກອງປະຊຸມວ່າ: ສປປ ລາວ ມີຄວາມເພິ່ງພໍໃຈຕໍ່ໝາກຜົນ ຂອງການ ຈັດຕັ້ງປະຕິບັດ ຍຸດທະສາດໂຕກຽວ 2015 ກໍຄືການ ຈັດຕັ້ງຜັນຂະຫຍາຍ ບັນດາແຜນວຽກ ແລະ ໂຄງການຕ່າງໆ, ຕະຫລອດໄລຍະ 3 ປີ ຜ່ານມາ, ເຫັນວ່າຫລາຍໂຄງການຢູ່ ສປປ ລາວ ໄດ້ຮັບການຈັດຕັ້ງປະຕິບັດ ຢ່າງມີປະສິດທິຜົນ ເປັນຕົ້ນ ແມ່ນໃນ ຂົງເຂດການເຊື່ອມຈອດ ແລະ ການພັດທະນາ ພື້ນຖານໂຄງລ່າງທີ່ມີຄຸນນະພາບ ເຊັ່ນ: ໂຄງການຂະຫຍາຍ ອາຄານສະໜາມບິນສາກົນວັດໄຕ, ໂຄງການປັບປຸງເສັ້ນທາງໝາຍເລກ9, ໂຄງການສ້າງ ຂົວເຊກອງ ຢູ່ເສັ້ນທາງຫລວງແຫ່ງຊາດ ໝາຍເລກ 16B, ໂຄງການເຂື່ອນໄຟຟ້ານໍ້າງຽບ 1 ແລະ ອື່ນໆ. ບັນດາໂຄງການເຫລົ່ານີ້, ບໍ່ພຽງແຕ່ ປະກອບສ່ວນອັນສໍາຄັນ ໃຫ້ແກ່ການເຊື່ອມໂຍງ ເສດຖະກິດ ລະຫວ່າງບັນດາປະເທດ ແມ່ນໍ້າຂອງດ້ວຍກັນເທົ່ານັ້ນ ແຕ່ຍັງເປັນການ ສ້າງພື້ນຖານ ໂຄງລ່າງ ໃຫ້ແກ່ການເຊື່ອມຈອດ ຂອງພາກພື້ນອີກດ້ວຍ.

ພ້ອມດຽວກັນນີ້,  ບັນດາຜູ້ນໍາຂອງປະເທດແມ່ນໍ້າຂອງ ແລະ ຍີ່ປຸ່ນ ຍັງໄດ້ເຫັນດີເປັນເອກະພາບກັນຮັບຮອງ ເອົາຍຸດທະສາດໂຕກຽວ2018 ເພື່ອສືບຕໍ່ເສີມຂະຫຍາຍ ການຮ່ວມມື ລະຫວ່າງບັນ ດາປະເທດແມ່ນໍ້າຂອງ ແລະ ຍີ່ປຸ່ນ ຂຶ້ນສູ່ລະດັບຄູ່ຮ່ວມຍຸດທະສາດ ແລະ ຮັບປະກັນຜົນປະໂຫຍດ ລວມແຫ່ງສັນຕິພາບ, ການພັດທະນາເສດຖະກິດ-ສັງຄົມ ແລະ ຍົກສູງຄຸນນະພາບຊີວິດ ການເປັນຢູ່ຂອງປະຊາຊົນ ໃນພາກພື້ນແມ່ນໍ້າຂອງ ໃຫ້ນັບມື້ນັບດີຂຶ້ນ, ທັງເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງປະເທດ ແມ່ນໍ້າຂອງລວມທັງ ສປປ ລາວ ກັບ ຍີ່ປຸ່ນ ໃຫ້  ແໜ້ນແຟ້ນຍິ່ງຂຶ້ນ. ນອກຈາກເຂົ້າຮ່ວມກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 10, ທ່ານ ນາຍົກລັດຖະມົນຕີ ຈະໄດ້ເຂົ້າຢ້ຽມຂໍ່ານັບ ເຈົ້າຈັກກະພັດ ຍີ່ປຸ່ນ, ເຂົ້າຮ່ວມກອງປະຊຸມ ພົບປະສອງຝ່າຍ ລະຫວ່າງ ສປປ ລາວ - ຍີ່ປຸ່ນ, ຮ່ວມພົບປະກັບຄະນະຮັບຜິດຊອບ ແລະ ນັກກິລາບານເຕະ ທີມຊາດຂອງບັນດາ ປະເທດແມ່ນໍ້າຂອງ, ເຂົ້າຮ່ວມເປັນສັກຂີພິຍານ ພິທີເຊັນສັນຍາ ແລະ ແລກປ່ຽນເອກະສານວ່າດ້ວຍ ການຊ່ວຍເຫລືອດ້ານ UXO, ລົງນາມໂດຍລັດຖະມົນຕີ ຕ່າງປະເທດຂອງ ລາວ ແລະ ຍີ່ປຸ່ນ, ເຂົ້າຮ່ວມພົບປະກັບ ສະມາຄົມມິດຕະພາບຝ່າຍ ລັດຖະສະພາ ຍີ່ປຸ່ນ-ແມ່ນໍ້າຂອງ ແລະ ເຂົ້າຮ່ວມເວທີສົນທະນາການລົງທຶນ ຢູ່ພາກພື້ນແມ່ນໍ້າຂອງຊຶ່ງຈັດຂຶ້ນໂດຍ ອົງການສົ່ງເສີມການຄ້າຍີ່ປຸ່ນ ເພື່ອເພີ່ມທະວີການຮ່ວມມື ແລະ ສົ່ງເສີມການຄ້າ, ການລົງທຶນ ແລະ ທ່ອງທ່ຽວ ລະຫວ່າງ ບັນດາປະເທດແມ່ນໍ້າຂອງ ແລະ ຍີ່ປຸ່ນ ພ້ອມທັງໄດ້ຕ້ອນຮັບ ການຢ້ຽມຂໍ່ານັບຂອງໂຮງໝໍ ກິຕາຮາຣາ, ບໍລິສັດ Hitachi ແລະ ບໍລິສັດ TEPCO.

(ແຫຼ່ງ​ຂໍ້​ມູນ​: ຂ​ປ​ລ)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
Scroll