ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ຄັ້ງທີ 13: ຄວາມໝັ້ນຄົງແບບຍືນຍົງ

21:44 2019/07/12

ຍສໝ - ໃນຕອນເຊົ້າຂອງວັນທີ 11 ກໍລະກົດ 2019, ທີ່ ບາງກອກ, ປະເທດໄທ, ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ (ADMM) ຄັ້ງທີ 13 ດ້ວຍຫົວຂໍ້ “ຄວາມໝັ້ນຄົງແບບຍືນຍົງ” ໄດ້ໄຂຂຶ້ນຢ່າງເປັນທາງການ.

ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ຄັ້ງທີ 13: ຄວາມໝັ້ນຄົງແບບຍືນຍົງ
ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ຄັ້ງທີ 13: ຄວາມໝັ້ນຄົງແບບຍືນຍົງ.(ພາບ:nhandan.com.vn)

ຄະນະຜູ້ແທນການທະຫານຂັ້ນສູງຫວຽດນາມ ນຳໂດຍທ່ານພົນເອກ ໂງ ຊວນ ລິກ ລັດຖະມົນຕີກະຊວງປ້ອງກັນປະເທດຫວຽດນາມ ເຂົ້າຮ່ວມກອງປະຊຸມ. ໃນບົດກ່າວປາໄສທີ່ກອງປະຊຸມ, ທ່ານລັດຖະມົນຕີກະຊວງປ້ອງກັນປະເທດ ຫວຽດນາມ ໂງ ຊວນ ລິກ ໄດ້ເນັ້ນຫນັກວ່າ: ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນ (ADMM) ຄັ້ງທີ 13 ດຳເນີນໄປໃນສະພາບການການເມືອງຄວາມໝັ້ນຄົງຂອງໂລກ ແລະ ພາກພື້ນ ພວມຜັນແປໄປຢ່າງສັບສົນ ແລະ ວ່ອງໄວ.  

ທ່ານລັດຖະມົນຕີກະຊວງປ້ອງກັນປະເທດ ຫວຽດນາມ ໂງ ຊວນ ລິກ ຖືວ່າ: ອາຊຽນຕ້ອງເພີ່ມທະວີຄວາມສາມັກຄີ, ເສີມຂະຫຍາຍລັກສະນະກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະ ຍົກສູງບົດບາດໃຈກາງ, ຊັກຈູງໃນບັນດາກົນໄກຮ່ວມມືຢູ່ພາກພື້ນ; ທ່ານ ພົນເອກ ໂງ ຊວນ ລິກ ເຊື່ອໝັ້ນວ່າດ້ວຍການຊັກຈູງຂອງປະເທດເຈົ້າພາບໄທ, ການຮ່ວມມືດ້ານປ້ອງກັນຊາດອາຊຽນ ຈະສືບຕໍ່ຍາດໄດ້ຜົນສຳເລັດຫຼາຍຢ່າງ, ປະກອບສ່ວນຢ່າງຕັ້ງໜ້າໃຫ້ສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນ.

ຄະນະຜູ້ແທນການທະຫານຂັ້ນສູງຫວຽດນາມ ເຂົ້າຮ່ວມກອງປະຊຸມ. (ພາບ:qdnd.vn)

ດ້ວຍຫົວຂໍ້ “ຄວາມໝັ້ນຄົງແບບຍືນຍົງ”, ລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ໄດ້ເຫັນດີເປັນເອກະພາບຕໍ່ຄວາມຮັບຮູ້ລວມກ່ຽວກັບການປ່ຽນແປງຢ່າງວ່ອງໄວຂອງສະພາບແວດລ້ອມຄວາມໝັ້ນຄົງຂອງພາກພື້ນ, ຜົນກະທົບຂອງການເຊື່ອມໂຍງ ແລະ ການເຊື່ອມຕໍ່ພາກພື້ນ ນັບມື້ນັບເພີ່ມຂຶ້ນ ໄດ້ກໍ່ໃຫ້ເກີດບັນດາໄພນາບຂູ່ເຖິງອາດຊະຍາກຳແບບໃຫມ່. 

ບັນດາຫົວໜ້າຄະນະໄດ້ລົງນາມໃນຖະແຫຼງການຮ່ວມຂອງ ADMM-13 ວ່າດ້ວຍ “ຄວາມໝັ້ນຄົງແບບຍືນຍົງ”. ຖະແຫຼງການຮ່ວມຢັ້ງຢືນຄືນໃໝ່ເລື່ອງເພີ່ມທະວີ, ປັບປຸງການຮ່ວມມືດ້ານປ້ອງກັນຊາດລະຫວ່າງບັນດາປະເທດສະມາຊິກອາຊຽນ ກໍ່ຄືບັນດາປະເທດເຂົ້າຮ່ວມ. ຖະແຫຼງການຮ່ວມກໍ່ໄດ້ເນັ້ນໜັກເຖິງຄວາມສຳຄັນຂອງການປະຕິບັດຖະແຫຼງການກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (ດີໂອຊີ), ກ້າວໄປເຖິງການບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (ຊີໂອຊີ) ໂດຍໄວ,  ຄົບຖ້ວນ ແລະ ມີປະສິດທິຜົນ. ຖະແຫຼງການຮ່ວມຂອງ ADMM-13 ຊົມເຊີຍເລື່ອງຫວຽດນາມ ຈະດໍາລົງຕໍາແໜ່ງປະທານອາຊຽນ ແລະຈັດຕັ້ງ ADMM ຄັ້ງທີ 14 ແລະ ADMM + ຄັ້ງທີ 7 ໃນປີ 2020.

ໄຊພອນ
;

同类别新闻