ເພີ່ມທະວີການຮ່ວມມືດ້ານການຄ້າຊາຍແດນ ຫວຽດນາມ-ລາວ

09:29 2019/07/05

ຍສໝ - ສູ້ຊົນນໍາວົງເງິນສົ່ງອອກລະຫວ່າງຫວຽດນາມ ແລະລາວ ໃຫ້ບັນລຸໄດ້ລະດັບເຕີບໂຕ 10% ໃນປີ 2019.

ກອງປະຊຸມ “ສົ່ງເສີມການຮ່ວມມືດ້ານການຄ້າຊາຍແດນລະຫວ່າງ 4 ແຂວງຂອງຫວຽດນາມ - 4 ແຂວງພາກເໜືອຂອງລາວ” ຫາກໍ່ຈັດຂື້ນຢູ່ແຂວງຊຽງຂວາງ, ສປປ. ລາວ ດ້ວຍການເຂົ້າຮ່ວມຂອງຫົວໜ້າສະຖານກົງສູນໃຫຍ່ຫວຽດນາມ ປະຈໍາແຂວງຫຼວງພະບາງ ແລະຕາງໜ້າບັນດາພະແນກ, ຂະແໜງການ, ວິສາຫະກິດ, ນັກລົງທຶນຂອງ 4 ແຂວງພາກເໜືອລາວ, ແມ່ນຫຼວງພະບາງ, ຜົ້ງສາລີ, ຫົວພັນ, ຊຽງຂວາງ ແລະ 4 ແຂວງຂອງຫວຽດນາມ ແມ່ນດ້ຽນບຽນ, ເຊີນລາ, ແທັງຮ໊ວາ ແລະເງະອານ.
ຜູ້ແທນ 4 ແຂວງຂອງ ຫວຽດນາມ ທີ່ມີເສັ້ນຊາຍແດນຮ່ວມກັບ 4 ແຂວງພາກເໜືອລາວ ເຂົ້າຮ່ວມກອງປະຊຸມ. (ພາບ: vov.vn)

ບັນດາແຂວງທີ່ມີເສັ້ນຊາຍແດນຮ່ວມຢູ່ພາກເໜືອຂອງສອງປະເທດໄດ້ເອົາໃຈໃສ່ລົງທຶນກໍ່ສ້າງພື້ນຖານໂຄງລ່າງຄົມມະນາຄົມ, ເປີດບັນດາຕະຫຼາດດ່ານຊາຍແດນ, ຕະຫຼາດຊາຍແດນ, ເພີ່ມທະວີສົ່ງເສີມການໂຄສະນາເຜີຍແຜ່ດ້ານການຄ້າຜ່ານງານຕະຫຼາດນັດ, ງານວາງສະແດງແນະນໍາ ແລະຊື້ຂາຍຜະລິດຕະພັນ.

ອໍານາດການປົກຄອງບັນດາທ້ອງຖິ່ນທີ່ມີເສັ້ນຊາຍແດນຮ່ວມໄດ້ເພີ່ມທະວີການພົບປະ, ແລກປ່ຽນບົດຮຽນຂອງການປະຕິຮູບລະບຽບການບໍລິຫານ, ສ້າງສະພາບແວດລ້ອມໃຫ້ວິສາຫະກິດສອງຝ່າຍຮ່ວມມືລົງທຶນ, ສົ່ງອອກນຳເຂົ້າສິນຄ້າໄດ້ຢ່າງສະດວກ.

ທ່ານ ຫວູ້ດັງແມ້ງ, ຫົວໜ້າສະຖານກົງສູນໃຫຍ່ຫວຽດນາມ ປະຈໍາ ແຂວງຫຼວງພະບາງ ກ່າວຄໍາເຫັນທີ່ກອງປະຊຸມ. (ພາບ: vov.vn)

ເຖິງຢ່າງໃດກໍ່ຕາມ, ຄວາມຫຍຸ້ງຍາກໃນການພົວພັນການຄ້າຊາຍແດນລະຫວ່າງບັນດາແຂວງຂອງຫວຽດນາມ ທີ່ມີເສັ້ນຊາຍແດນຮ່ວມກັບບັນດາແຂວງພາກເໜືອລາວ ຍັງມີຫຼາຍ, ສ້າງຄວາມກີດຂວາງບໍ່ແມ່ນໜ້ອຍໃຫ້ແກ່ການເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງການພົວພັນດ້ານການຄ້າລະຫວ່າງບັນດາທ້ອງຖິ່ນ.

ບັນດາຜູ້ແທນໄດ້ສະເໜີຫຼາຍບັນຫາເພື່ອແນໃສ່ປັບປຸງລະບົບກົດໝາຍກ່ຽວກັບການຄ້າຊາຍແດນ, ເພີ່ມທະວີການລົງທຶນລະບົບທາງຄົມມະນາຄົມ, ສາງສິນຄ້າເພື່ອເຊື່ອມຕໍ່ບັນດາດ່ານຊາຍແດນສອງປະເທດ. 

(来源: ຈາງຫງວຽນ/ກປ.ອອນໄລ)
;

同类别新闻