ປະຊາຄົມຊາວຫວຽດນາມ ອາໄສຢູ່ລາວ ສະແດງຄວາມຮູ້ບຸນຄຸນ ໃຫ້ແກ່ບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດ

14:38 2019/07/30

ຍສໝ - ໃນວັນທີ 27 ກໍລະກົດ, ທີ່ວັດເຟິດຕິກ, ນະຄອນຫຼວງວຽງຈັນ, ປະຊາຄົມຊາວຫວຽດນາມ ອາໄສຢູ່ລາວ ໄດ້ຈັດຕັ້ງພິທີສູດສັກອະນິດຈາໃຫ້ແກ່ດວງວິນຍານບັນດານັກວິລະຊົນທີ່ເສຍສະຫຼະຊີວິດເພື່ອຊາດ ໃນພາລະກິດຕໍ່ສູ້ປົດປ່ອຍຊາດ.

ຜູ້ຕາງໜ້າສະຖານທູດຫວຽດນາມ ປະຈໍາ ລາວ, ທູດປ້ອງກັນຊາດຫວຽດນາມ ປະຈໍາ ລາວ, ປະທານສະຫະພັນນັກຮົບເກົ່າແຫ່ງຊາດລາວ ພ້ອມກັບຊາວຫວຽດນາມ ອາໄສຢູ່ນະຄອນຫຼວງວຽງຈັນ ເຂົ້າຮ່ວມເປັນຈໍານວນຫຼວງຫຼາຍ.

ພໍ່ແມ່ປະຊາຊົນຊາວຫວຽດນາມ ອາໄສຢູ່ລາວ ເຂົ້າຮ່ວມພິທີສູດສັກອະນິດຈາ. (ພາບ: vov.vn)

ໃນທ່າມກາງບັນຍາກາດທີ່ເຄັ່ງຂຶມ, ເຄົາລົບນັບຖືຂອງພິທີສູດສັກອະນິດຈາ ເນື່ອງໃນໂອກາດສະເຫຼີມສະຫຼອງ 72 ປີແຫ່ງວັນທະຫານເສຍອົງຄະ-ນັກຮົບເສຍສະຫຼະຊີວິດເພື່ອຊາດ, ທຸກໆຄົນກໍ່ພ້ອມກັນຖະຫວາຍທູບທຽນ, ດອກໄມ້ພາວະນາໃຫ້ດວງວິນຍານບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດ.

ນີ້ແມ່ນໂອກາດເພື່ອໃຫ້ທຸກຄົນສະແດງຄວາມຮູ້ບຸນຄຸນອັນໃຫຍ່ຫຼວງຕໍ່ບັນດາຜູ້ທີ່ໄດ້ເສຍສະຫຼະຊີວິດຂອງຕົນເພື່ອໃຫ້ປະເທດຊາດມີເອກະລາດ, ອິດສະລະພາບ, ທຸກຄົນໄດ້ດຳລົງຊີວິດໃນສັນຕິພາບ.

ບັນດາຜູ້ແທນພ້ອມກັບບັນດາພະສົງສຳມະເນນປ່ອຍນົກກາງແກພາວະນາຂໍໃຫ້ມີສັນຕິພາບ. (ພາບ: vov.vn)

ກ່າວຄໍາເຫັນທີ່ພິທີ, ທ່ານພົນຈັດຕະວາ ຄຳຫອມ ແສງບົວລົມ ຮອງປະທານສະຫະພັນນັກຮົບເກົ່າແຫ່ງຊາດລາວ ໄດ້ສະແດງຄວາມຮູ້ບຸນຄຸນຕໍ່ບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດຫວຽດນາມ, ພິເສດແມ່ນບັນດາທະຫານອາສາສະໝັກທີ່ໄດ້ເສຍສະຫຼະຊີວິດໃນປາງສົງຄາມຢູ່ລາວ. ທ່ານຖືວ່າສິ່ງດັ່ງກ່າວ ສະແດງໃຫ້ເຫັນນໍ້າໃຈສາມັກຄີ, ຄວາມສະໜິດຕິດພັນລະຫວ່າງສອງຊາດໃນການຕໍ່ສູ້ຕ້ານສັດຕູລວມ, ແມ່ນຊັບສົມບັດອັນລໍ້າຄ່າເພື່ອໃຫ້ບັນດາຄົນຮຸ່ນໜຸ່ມສອງປະເທດຮັກສາ ແລະສືບຕໍ່ເສີມຂະຫຍາຍ.

ຄຳຮຸ່ງ
;

同类别新闻