ນໍ້າໃຈສະໜິດສະໜົມລະຫວ່າງປະຊາຊົນສອງຟາກຊາຍແດນ ຫວຽດນາມ-ລາວ

10:11 2019/08/01

ຜ່ານ 15 ປີແຫ່ງການແຮກສ່ຽວ, ປະຊາຊົນບ້ານກາຕັງ (ຫວຽດນາມ) ແລະບ້ານແດນສະຫວັນ (ລາວ) ໄດ້ເສີມຂະຫຍາຍນໍ້າໃຈສາມັກຄີ, ໜູນຊ່ວຍເຊິ່ງກັນ ແລະກັນໃນການພັດທະນາເສດຖະກິດ-ສັງຄົມ, ຍົກສູງຄຸນນະພາບການດໍາລົງຊີວິດ.

ນໍ້າໃຈສະໜິດສະໜົມລະຫວ່າງປະຊາຊົນສອງຟາກຊາຍແດນ ຫວຽດນາມ-ລາວ
ປະຊາຊົນບ້ານກາຕັງ ແລະບ້ານແດນສະຫວັນ ພົບປະກັນດ້ວຍຄວາມປິຕິຊົມຊື່ນໃນກອງປະຊຸມປະເມີນຜົນ 15 ປີແຫ່ງການແຮກສ່ຽວບ້ານ-ບ້ານ. (ພາບ: bienphong.com.vn)

ຜ່ານນັ້ນ, ເຂົາເຈົ້າໄດ້ຄຽງບ່າຄຽງໄຫຼ່ພ້ອມກັບກໍາລັງປົກປັກຮັກສາຊາຍແດນສອງຝ່າຍຮັກສາ, ກໍ່ສ້າງເສັ້ນຊາຍແດນຮ່ວມສັນຕິພາບ, ມິດຕະພາບແບບພິເສດ. ໂດຍແມ່ນບ້ານທຳອິດໄດ້ຮັບການຜັນຂະຫຍາຍ, ບ້ານ ກາຕັງ ແລະບ້ານແດນສະຫວັນ ກາຍເປັນຈຸດຜົ້ນເດັ່ນໃນຂະບວນການແຮກສ່ຽວບ້ານ-ບ້ານ ລະຫວ່າງສອງຟາກຊາຍແດນ ຫວຽດນາມ-ລາວ. ນັບແຕ່ຮຸ່ງເຊົ້າວັນທີ 30 ກໍລະກົດ, ປະຊາຊົນບ້ານແດນສະຫວັນ, ເມືອງເຊໂປນ, ແຂວງສະຫວັນນະເຂດ ແລະບ້ານກາຕັງ, ເທດສະບານເມືອງລາວບ໋າວ, ເມືອງເຮື໊ອງຮ໊ວາ, ແຂວງກວາງຈິ ເປັນຈໍານວນຫຼວງຫຼາຍໄດ້ມີໜ້າຢູ່ເທດສະບານເມືອງລາວບ໋າວ. ນີ້ແມ່ນມື້ພິເສດ, ເຊິ່ງອໍານາດການປົກຄອງທ້ອງຖິ່ນສອງຟາກຊາຍແດນຈັດຕັ້ງປະເມີນຜົນ 15 ປີແຫ່ງວັນແຮກສ່ຽວບ້ານ-ບ້ານ ລະຫວ່າງບ້ານກາຕັງ ແລະບ້ານແດນສະຫວັນ.

ບ້ານແດນສະຫວັນ ແລະບ້ານກາຕັງ ມີເສັ້ນຊາຍແດນຮ່ວມຍາວເກືອບ 4 ກີໂລແມັດ ແລະມີ 5 ຫຼັກໝາຍຊາຍແດນ. ປະຊາຊົນສອງຟາກມີນໍ້າໃຈສາມັກຄີ, ມິດຕະພາບມາແຕ່ດົນນານ, ມີບັນດາຈຸດທີ່ຄ້າຍຄືກັນກ່ຽວກັບວັດທະນະທໍາ, ເສດຖະກິດ, ສັງຄົມ. ວັນທີ 28 ເມສາປີ 2005, ບ້ານກາຕັງ ແລະບ້ານແດນສະຫວັນ ໄດ້ຮັບການເລືອກເຟັ້ນເປັນສອງບ້ານທໍາອິດໃນເສັ້ນຊາຍແດນກວາງຈິ ແລະສະຫວັນນະເຂດ ລົງນາມໃນລາຍການແຮກສ່ຽວ. ຜ່ານການເຄື່ອນໄຫວແຮກສ່ຽວ, ຄະນະຄຸ້ມຄອງບັນດາບ້ານໄດ້ຈັດຕັ້ງການໂຄສະນາເຜີຍແຜ່ຢ່າງເລິກເຊິ່ງກວ້າງຂວາງ ເພື່ອໃຫ້ປະຊາຊົນຮູ້ ແລະປະຕິບັດຕາມສັນຍາກ່ຽວກັບລະບຽບການຄຸ້ມຄອງຊາຍແດນ ຫວຽດນາມ-ລາວ ແລະບັນດາຂໍ້ກໍານົດຂອງກົດໝາຍແຕ່ລະປະເທດຢ່າງຖືກຕ້ອງ. ຜ່ານບັນດາການເຄື່ອນໄຫວໂຄສະນາເຜີຍແຜ່, ສະຕິ, ຄວາມຮູ້ກ່ຽວກັບກົດໝາຍ, ອະທິປະໄຕ, ຜືນແຜ່ນດິນຂອງປະຊາຊົນໄດ້ຮັບການຍົກສູງຂຶ້ນຢ່າງຈະແຈ້ງ. ປະຊາຊົນສອງບ້ານຍາມໃດກໍ່ສະແດງຄວາມຮັກແພງ, ຊ່ວຍເຫຼືອເຊິ່ງກັນ ແລະກັນໃນການດໍາລົງຊີວິດ, ພ້ອມກັນແກ້ໄຂຄວາມຫຍຸ້ງຍາກເພື່ອບືນຕົວຂຶ້ນ.

ການເຄື່ອນໄຫວແຮກສ່ຽວບ້ານ-ບ້ານ ລະຫວ່າງສອງຟາກຊາຍແດນບໍ່ພຽງແຕ່ໜູນຊ່ວຍປະຊາຊົນຍົກສູງຄຸນນະພາບການດໍາລົງຊີວິດເທົ່ານັ້ນ ຫາກຍັງປະກອບສ່ວນປະຕິບັດຂະບວນການ “ມະຫາຊົນຕັ້ງໜ້າເຂົ້າຮ່ວມການຄຸ້ມຄອງເສັ້ນຊາຍແດນ, ຫຼັກໝາຍຊາຍແດນ” ຢ່າງມີປະສິດທິຜົນອີກດ້ວຍ. ມະຫາຊົນໄດ້ຕັ້ງໜ້າເຂົ້າຮ່ວມວຽກງານລາດຕະເວນເສັ້ນຊາຍແດນ, ບຸລະນະຮັກສາຫຼັກໝາຍຊາຍແດນ. ສອງຝ່າຍໄດ້ເຫັນດີເປັນເອກະພາບສ້າງຕັ້ງບັນດາໜ່ວຍຄຸ້ມຄອງຄວາມສະຫງົບປອດໄພ, ຄວາມເປັນລະບຽບຮຽບຮ້ອຍດ້ວຍຕົນເອງ, ເພີ່ມທະວີການສຶກສາອົບຮົມ, ການຄຸ້ມຄອງ, ຂົນຂວາຍປະຊາຊົນໃນໝູ່ບ້ານ, ຕັ້ງໜ້າຕໍ່ສູ້ສະກັດກັ້ນ, ບໍ່ປົກປິດ, ບໍ່ໜູນຊ່ວຍອາດຊະຍາກຳ. ຄະນະຄຸ້ມຄອງສອງບ້ານເພີ່ມເຕີມລະບຽບການ, ບໍ່ໄດ້ໄປມາຜ່ານເສັ້ນຊາຍແດນພາຍຫຼັງເວລາ 22 ໂມງ, ຜ່ານນັ້ນປະກອບສ່ວນຕໍ່ສູ້, ສະກັດກັ້ນອາດຊະຍາກໍາຢ່າງມີປະສິດທິຜົນ.

(来源: la.qdnd.vn)
;

同类别新闻