ແຂວງຫົວພັນຮ່ວມກັບຊາວຫວຽດນາມສະຫຼອງວັນຊາດຄົບຮອບ 74 ປີ

13:30 2019/09/03

ວັນທີ 2 ກັນຍາ 2019 ນີ້, ການນຳແຂວງຫົວພັນຮ່ວມກັບຄະນະຄຸ້ມຄອງຊາວຫວຽດນາມຢູ່ແຂວງຫົວພັນຈັດຕັ້ງສະເຫຼີມສະຫຼອງວັນຊາດຫວຽດນາມ ຄົບຮອບ 74 ປີ (2/9/1945-2/9/2019) ຂຶ້ນຢູ່ຫ້ອງວ່າການແຂວງ ໂດຍການເຂົ້າຮ່ວມຂອງສະຫາຍ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ສະຫາຍ ເລວັນຮຶງ ປະທານຄະນະຄຸ້ມຄອງຊາວຫວຽດນາມຢູ່ແຂວງຫົວພັນ, ມີບັນດາທ່ານໃນການນຳແຂວງ, ຄະນະຮັບຜິດຊອບຊາວຫວຽດນາມຢູ່ແຂວງຫົວພັນ, ພາກສ່ວນທີ່ກ່ຽວຂ້ອງອ້ອມຂ້າງແຂວງ ຕະຫຼອດຮອດຊາວຫວຽດນາມທີ່ກຳລັງອາໄສເຮັດທຸລະກິດຢູ່ແຂວງຫົວພັນເຂົ້າຮ່ວມນຳຢ່າງພ້ອມພຽງ.

ແຂວງຫົວພັນຮ່ວມກັບຊາວຫວຽດນາມສະຫຼອງວັນຊາດຄົບຮອບ 74 ປີ
ບັນຍາກາດກອງປະຊຸມ.(ພາບ:ງຸດ ວິໄລຄຳ/houaphannews.wordpress.com)

ສະຫາຍ ໂດ້ວຽດກຸຍ ຮອງປະທານຄະນະຄຸ້ມຄອງຊາວຫວຽດນາມຢູ່ແຂວງຫົວພັນ ກ່າວວ່າ: ການປະຕິວັດເດືອນສິງຫາ ແລະ ວັນຊາດ 2 ກັນຍາ 1945 ແມ່ນເຫດການປະຫວັດສາດອັນຍິ່ງໃຫຍ່ໃນການເລີ່ມຕົ້ນສັງກະລາດໃໝ່ຂອງປະຫວັດສາດຊົນຊາດຫວຽດນາມ.ພາຍໃຕ້ການນຳພາອັນສະຫລາດສ່ອງໃສຂອງພັກກອມມູນິດຫວຽດນາມ ໂດຍແມ່ນປະທານ ໂຮ້ຈີ່ມິນ ເປັນປະທານ, ເດືອນສິງຫາ 1945 ປະຊາຊົນຫວຽດນາມທົ່ວປະເທດໄດ້ພ້ອມກັນລຸກຮື້ຂຶ້ນຍຶດອຳນາດທົ່ວປະເທດ. ຈາກນັ້ນ, ຮອດວັນທີ 2 ກັນຍາ 1945, ທີ່ສະໜາມຫຼວງບາດິ້ງ(ຮ້າໂນ້ຍ), ປະທານໂຮ້ຈີ່ມິນໄດ້ອ່ານບົດປະກາດເອກະລາດ, ພ້ອມຖະແຫຼງການສະຖາປະນາປະເທດ “ຫວຽດນາມປະຊາທິປະໄຕ ສາທາລະນະລັດ ປະຈຸບັນແມ່ນ ສາທາລະນະລັດ ສັງຄົມນິຍົມ ຫວຽດນາມ” ທ່ານໄດ້ຢັ້ງຢືນວ່າ: ຫວຽດນາມມີສິດເສລີພາບ, ເອກະລາດ ແລະ ຄວາມຈິງແລ້ວໄດ້ກາຍເປັນປະເທດເສລີພາບ, ເອກະລາດ. ປະຊາຊົນຫວຽດນາມຕັດສິນໃຈອຸທິດທັງກາຍ ແລະ ໃຈ, ແຮງງານ, ຊີວິດ ແລະ ວັດຖຸເພື່ອຮັກສາສິດເສລີພາບ ແລະ ເອກະລາດນັ້ນ.

ໄຊຊະນະແຫ່ງການປະຕິວັດເດືອນສິງຫາ ແລະ ການກຳເນີດປະເທດຫວຽດນາມໃໝ່ ມີຄວາມສຳຄັນທາງດ້ານປະຫວັດສາດອັນຍິ່ງໃຫຍ່. ໄດ້ທັບມ້າງແອກປົກຄອງຂອງພວກລ່າເມືອງຂຶ້ນ ແລະ ຟາດຊິດຢ່າງສິ້ນເຊີງ; ສິ້ນສຸດລະບອບສັກດິນາຫຼ້າຫຼັງ; ກໍ່ສ້າງພື້ນຖານປະຊາທິປະໄຕ ສາທາລະນະລັດ, ເປີດມ່ານຍຸກໃໝ່ໃນປະຫວັດສາດປະຊາຊົນ, ຍຸກແຫ່ງເອກະລາດເສລີພາບ, ກຳມະຊີບຊາວອອກແຮງງານເປັນເຈົ້າຂອງປະເທດຊາດ. ການປະຕິວັດເດືອນສິງຫາ ແລະ ການກຳເນີດປະເທດ “ຫວຽດນາມປະຊາທິປະໄຕ ສາທາລະນະລັດ” ຍັງເປັນທຸງໄຊສະໜັບສະໜູນອັນແຂງແກ່ງໃຫ້ແກ່ຂະບວນການຕໍ່ສູ້ຂອງຊົນຊັ້ນທີ່ຖືກກົດຂີ່ຂູດຮີດຈາກຈັກກະພັດລ່າເມືອງຂຶ້ນແບບໃໝ່. ທີ່ສຳຄັນແມ່ນການລົ້ມສະຫຼາຍລະບົບເຈົ້າທີ່ດິນຂອງລັດທິລ່າເມືອງຂຶ້ນເກົ່າແກ່ໃນທົ່ວໂລກ.

ຄະນະຜູ້ແທນແຂວງຫວົພັນ ແລະ ຄະນະຄຸ້ມຄອງຊາວໜຸ່ມຫວຽດນາມ ຮ່ວມຖ່າຍຮູບເປັນທີ່ລະນຶກ.(ພາບ:ງຸດ ວິໄລຄຳ/houaphannews.wordpress.com)

ໂອກາດດຽວກັນນີ້, ສະຫາຍ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ ໄດ້ຕີລາຄາສູງຕໍ່ການນຳພາຂອງພັກຄອມມູນິດຫວຽດນາມຕະຫຼອດໄລຍະ 74 ປີຜ່ານມາ, ໂດຍສະເພາະແມ່ນການສົ່ງເສີມສາຍພົວພັນມິດຕະພາບ, ນ້ຳໃຈສາມັກຄີແບບພິເສດ ແລະ ການຮ່ວມມືຮອບດ້ານ. ພ້ອມນັ້ນທ່ານຍັງໄດ້ອວຍພອນໃຫ້ຊາວຫວຽດນາມທີ່ອາໃສເຮັດທຸລະກິດຢູ່ແຂວງຫົວພັນຈົ່ງມີສຸຂະພາບແຂງແຮງ, ມີຄວາມຜາສຸກ, ອຸ່ນອຽນທຸ່ນທ່ຽງໃນການດຳລົງຊີວິດຢູ່ແຂວງຫົວພັນ ແລະ ສືບຕໍ່ປະກອບສ່ວນເຂົ້າໃນວຽກງານການທູດປະຊາຊົນລະຫວ່າງສອງຊາດ ກໍ່ຄືການສ້າງສາຍພົວພັນທີ່ດີລະຫວ່າງປະຊາຊົນສອງຊາດ ລາວ-ຫວຽດນາມ ແລະ ຝາກຄຳອວຍພອນໄປຍັງການນຳພັກ-ລັດ, ປະຊາຊົນຫວຽດນາມໃນທົ່ວປະເທດເວົ້າລວມ, ເວົ້າສະເພາະແມ່ນຄະນະພັກ, ສະພາປະຊາຊົນຂັ້ນແຂວງແທັງຮ່ວາ – ເຊິນລາອ້າຍນ້ອງຈົ່ງມີຄວາມພະລາໄມສົມບູນ, ມີຄວາມຈະເລີນຮຸ່ງເຮືອງ ແລະ ປະເທດຊາດນັບມື້ພັດທະນາຢ່າງບໍ່ຢຸດຢັ້ງ.

(ແຫຼ່ງ​ຂໍ້​ມູນ​: ໄອແກ້ວ/houaphannews.wordpress.com)
;

ຜູ່ອ່ານອາດຈະສົນໃຈ

ຄຳເຫັນຂອງຜູ້ອ່ານ
ຊື່ ແລະ ນາມສະກຸນ:
ອີເມວ :
ເນື້ອໃນ :
   
 
 
 
 
   
Mobile
TieuDe
ລະຫັດລັບ :  
ສົ່ງ
  Hiển thị    kết quả / trang
Không tìm thấy bản ghi nào
ບົດ​ຄວາມ​ຫລ້າ​ສຸດ
Scroll