ຮອງປະທານປະເທດຫວຽດນາມ ດັ້ງທິຫງອກທິ້ງ ພົບປະກັບປະທານສະພາແຫ່ງຊາດລາວ

10:50 2018/06/21

ຍ​ສ​ໝ - ວັນທີ 20 ມິຖຸນາ, ໃນ​ການ​ຢ້ຽມ​ຢາມ ສ​ປ​ປ ລາວ ຮອງປະທານປະເທດຫວຽດນາມ ທ່ານນາງ ດັ້ງທິຫງອກທິ້ງ ໄດ້ມີການພົບປະກັບປະທານສະພາແຫ່ງຊາດລາວ ທ່ານນາງ ປານີ ຢາທໍ່ຕູ້.

ຮອງປະທານປະເທດຫວຽດນາມ ດັ້ງທິຫງອກທິ້ງ ພົບປະກັບປະທານສະພາແຫ່ງຊາດລາວ

​ ຮອງ​ປະ​ທານ​ປະ​ເທດ​ ທ່ານນາງດັ້ງ​ທິ​ຫງ໋ອກ​ຖິ້ງ ແລະ ​ປະ​ທານ​ສະ​ພາ​ແຫ່ງ​ຊາດລາວ ທ່ານນາງ ປາ​ນີ ຢາ​ທໍ​ຕູ້.

ທີ່​ກາ​ນ​ພົບ​ປະ ສອງ​ຝ່າຍ​ໄດ້​ສະ​ແດງ​ຄວາມ​ຍິ​ນ​ດີ ຊົມ​ເຊີຍ​ຕໍ່​ການ​ພັດ​ທະ​ນາ ອັນ​ດີງາມ​ຂອງມູນ​ເຊື້ອ​ແຫ່ງ​ສາ​ຍ​ພົວ​ພັນ​ມິດ​ຕະ​ພາບ, ສາ​ມັກ​ຄີພິ​ເສດ ແລະ ຮ່ວມ​ມື​ຮອບ​ດ້ານ ຫວຽດ​ນາມ-ລາວ, ໃນ​ນັ້ນ​ການ​ຮ່ວມ​ມື​ຮັດ​ແໜ້ນ​ຂອງ​ສອງ​ສະ​ພາ​ແຫ່ງ​ຊາດ.

ສອງຝ່າຍຕີ​ລາ​ຄາ​ສູງ​ການ​ເຄື່ອນ​ໄຫວການແລກປ່ຽນຂໍ້ມູນ​ຂ່າວ​ສານ, ປະສົບການ ແລະ ວິ​ຊາ​ສະ​ເພາະ ລະຫວ່າງ ສອງສະພາແຫ່ງຊາດ ກໍ່​ຄືການປະສານງານຢ່າງມີປະສິດທິຜົນໃນການ​ເຄື່ອນ​ໄຫວດ້ານການຕ່າງປະເທດຂອງສະພາແຫ່ງຊາດ, ພິ​ເສດ​ແມ່ນ​ບົນ​ເວ​ທີກອງປະຊຸມສຸດຍອດ​ຂອງ​ພູມ​ມິ​ພາກ ແລະ ສາ​ກົນ​ຄື: ສະ​ຫ​ະ​ພັນ ສະ​ພາ​ແຫ່ງ​ຊາດ ອາຊຽນ (AIPA), ສະຫະພັນ ສະພາແຫ່ງ​ຊາດ​ສາ​ກົນ (IPU).

ເພື່ອ​ເປັນ​ການ​ຊຸກ​ຍູ້​ການ​ຮ່ວມ​ມື​ລະ​ຫວ່າງ ສອງ​ສະ​ພາ​ແຫ່ງ​ຊາດ ໃຫ້​ເລິກ​ເຊິ່ງ, ຮອງປະ​ທານ​ປະ​ເທດ ດັ້ງ​ທິ​ຫງ໋ອກ​ຖິ້ງ ​ສະ​ເໜີ​ໃຫ້​ທັງສອງຝ່າຍເພີ່ມທະວີການແລກປ່ຽນ, ການຮ່ວມມືໃນການກໍ່​ສ້າງ ແລະ ປັບປຸງລະບົບກົດຫມາຍຂອງແຕ່ລະປະເທດໃຫ້​ສົມ​ບູນ ກໍ່​ຄື​ການ​ກວດ​ສອບ ການ​ຈັດ​ຕັ້ງ​ປະ​ຕິ​ບັດ​ກົດ​ໝາຍ, ມີ​ການ​ປ່ຽນ​ແປງ, ປັບ​ປຸງກົນໄກ, ນະໂຍບາຍ ແລະ ກົດຫມາຍໃຫ້​ເຂົ້າ​ກັບ​ສະ​ພາບ​ຕົວ​ຈິງ ເພື່ອຊຸກ​ຍູ້ການຮ່ວມມືກ່ຽວ​ກັບ ການ​ຄ້າ, ການ​ລົງ​ທຶນລະຫວ່າງສອງປະເທດ.

ປະທານສະ​ພາ​ແຫ່ງ​ຊາດ ທ່ານ​ນາງ ປາ​ນີ ຢາ​ທໍ​ຕູ້  ໄດ້ເນັ້ນຫນັກວ່າ ໃນສະພາບການທີ່ໂລກ ແລະ ພາກ​ພື້ນ​ມີ​ຄວາມສັບສົນ, ພັກ-ລັດ, ສະພາແຫ່ງຊາດ ແລະ ປະຊາຊົນຂອງສອງປະເທດ ຕ້ອງ​ໄດ້​​ຮ່ວມ​ກັນພະ​ຍາ​ຍາມຮັກສາ ແລະ ພັດທະນາ ມູນ​ເຊື້ອ​ແຫ່ງການພົວພັນອັນ​ຍາວ​ນານ, ນ້ຳ​ໃຈ​ສາ​ມັກ​ຄີ​ພິ​ເສດ ແລະ ຮ່ວມ​ມື​ຮອບ​ດ້ານ ໃນ​ທຸກ​ຂ​ະ​ແໜງ​ການ-ການ​ເມືອງ, ການທູດ, ຄວາມສະ​ຫງົບ, ການປ້ອງກັນຊາດ, ເສດຖະກິດ, ການຄ້າ, ການລົງທຶນ, ການສຶກສາວັດທະນະທໍາ ແລະ ການແລກປ່ຽນຂອງປະຊາຊົນ.

ສະ​ຫາຍ ປາ​ນີ ຢາ​ທໍ​ຕູ້  ຢືນຢັນວ່າ​ໂຄ​ງານກໍ່​ສ້າງອາ​ຄານສະພາແຫ່ງຊາດໃຫມ່ຂອງລາວ ໄດ້​ມີ​ການ​ກະ​ກຽມ​ກໍ່​ສ້າງແມ່ນເປັນຂອງຂວັນທີ່ມີຄວາມຫມາຍທີ່ສຸດຂອງພັກ, ລັດ, ສະພາແຫ່ງຊາດ ແລະ ປະຊາຊົນຫວຽດນາມ ເຊິ່ງເປັນສັນຍາລັກ ແລະ ມໍລະດົກອັນລ້ໍາຄ່າຂອງ ຄວາມສາມັກຄີພິເສດ ລະຫວ່າງ ຫວຽດນາມ-ລາວ ໃຫ້​ແກ່​ຄົນ​ລຸ້​ນ​ຫຼັງ. ທ່ານຮອງປະ​ທານ​ປະ​ເທດ ດັ້ງ​ທິ​ຫງ໋ອກ​ຖິ້ງ ແລະ ປ​ະ​ທານສະ​ພາ​ແຫ່ງ​ຊາດ ປາ​ນີ ຢາ​ທໍ​ຕູ້ ເຫັນ​ດີ​ເປັນ​ເອກ​ກະ​ພາບ ທີ່​ທັງ​ສອງ​ຝ່າຍ​ຮ່ວມ​ກັນ​ຊຸກ​ຍູ້, ອຳ​ນວຍ​ຄວາມ​ສະ​ດວກ ໃຫ້​ໂຄງ​ການ​ດັ່ງ​ກ່າວ ຮັບ​ການ​ຈັດ​ຕັ້ງ​ປະ​ຕິ​ບັດ​ຢ່າງ​ສະ​ດວກ​ສະ​ບາຍ, ຮັບ​ປະ​ກັນ​ຄຸນ​ນະ​ພາບ ແລະ ສະ​ເລັດ​ຕາມ​ແຜນ​ການ.

* ໃນມື້ດຽວກັນ, ໃນການ​ຕ້ອ​ນ​ຮັບ ປະ​ທານ ສູນ​ກາງ​ສະ​ຫະ​ພັນ​ແມ່​ຍິງ ລາວ ອິນ​ລະ​ວັນ ແກ້ວ​ບຸນ​ພັນ, ຮອງປະທານ​ປະ​ເທດ ດັ້ງ​ທິ​ຫງ໋ອກ​ຖິ້ງ ສະແດງຄວາມຮູ້​ບຸນ​ຄຸນ ແລະ ຄວາມຊື່ນຊົມ ຕໍ່​ການປະກອບສ່ວນທີ່ຍິ່ງໃຫຍ່ຂອງ ແມ່​ຍິງທັງສອງປະເທດ ເຂົ້າ​ໃນ​ການພັດທະນາ ສາຍພົວພັນມິດຕະພາບພິເສດ ຫວຽດນາມ - ລາວ ກໍ່​ຄື​ນ້ຳ​ໃຈສາມັກຄີ, ຮັດ​ແໜ້ນລະຫວ່າງແມ່ຍິງຂອງທັງສອງປະເທດ, ທັງເປັນ ສະ​ຫາຍ, ທັງ​ເປັນເອື້ອຍນ້ອງທີ່​ໄກ້​ສິດ. ຮອງປະທານປະ​ເທດ ຕີ​ລາ​ຄາ​ສູງ ສາຍ​ພົວ​ພັນ ຮ່ວມມື ລະຫວ່າງ ສູ​ນ​ກາງ ສະ​ຫະ​ພັນ​ແມ່​ຍິງ​ລາວ ແລະ ສະ​ຫະ​ພັນ​ແມ່​ຍິງ ຫວຽ​ດ​ນາມ ໃນ​ພາ​ລະ​ກິດ ພັດທະນາຄວາມສະເຫມີພາບບົດບາດຍິງ-ຊາຍ, ການປົດປ່ອຍແມ່ຍິງ, ການດູແລສຸຂະພາບ ແມ່ແລະເດັກ , ພິ​ເສດ​ແມ່ນໃນການສຶກສາອົບຮົມຊາວຫນຸ່ມ​ລຸ້ນ​ຫຼັງເພື່ອຮັກສາ ແລະ ສົ່ງເສີມມູນ​ເຊື້ອຄວາມສາມັກຄີ​ພິ​ເສດ ລະຫວ່າງ ຫວຽດນາມ-ລາວ.

ໂອກາດນີ້, ທ່ານຮອງປະທານປະ​ເທດ ສະແດງຄວາມຍິນກັບ ສະ​ຫາຍປະທານສູນກາງ ສະ​ຫະ​ພັນແມ່ຍິງລາວ ອິນ​ລະ​ວັນ ແກ້ວ​ບຸນ​ພັນ ທີ່​ຫາກໍ່​ໄດ້​ຮັບ ຫຼຽນ​ໄຊ ເອກ​ກະ​ລາດ ຊັ້ນ​ສອງ ຂອງ​ຫວຽດ​ນາມ ຍ້ອນ​ການ​ປະ​ກອບ​ສ່ວນ​ໃນ​ການ​ເຊື່ອມ​ສາ​ຍ​ສຳ​ພັນ​ມິດ​ຕະ​ພາບ ຂອງ​ສອງ​ປະ​ເທດ.

* ໃນຕອນເຊົ້າຂອງວັນທີ 20 ມິຖຸນາ, ຮອງປະທານປະເທດ ດັ້ງ​ທິ​ຫງ໋ອກ​ຖິ້ງ ນຳຄະນະຜູ້ແທນຂັ້ນສູງຂອງລັດຖະບານ ຫວຽດນາມ ໄປ​ໄຫວ້ອາ​ໄລ ທີ່​ອະ​ນຸ​ສອນ ນັກ​ຮົບ​ນິ​ລະ​ນາມ​ຂອງ​ລາວ ທີ່​ນະ​ຄອນ​ຫຼວງວຽງ​ຈັນ, ຢ້ຽມ​ຊົມ​ພະ​ທາດ​ຫຼວງວຽງ​ຈັນ, ເອກ​ກະ​ລັກ​ອັນ​ສັກ​ສິດ​ຂອງ ປະ​ຊາ​ຊົນ​ລາວ . ທ່ານ​ປະ​ທານ​ປ​ະ​ເທດຍັງ​ໄດ້​ໄປ​ຢ້ຽມ​ຢາມ ແລະ ໂອ້​ລົມ ທີ່​ໂຮງ​ຮຽນ​ພອນ​ສະ​ຫວັນ ​ແລະ ຊົນ​ເຜົ່າ ທີ່​ຂື້ນ​ກັບ ມະ​ຫາ​ວິ​ທະ​ຍາ​ໄລ ແຫ່ງ​ຊາດ ລາວ, ມອບ​ເຄື່ອງ​ຄອມ​ພິວ​ເຕິ້ ຈຳ​ນວນ 5 ເຄື່ອງ ຮັບ​ໃຊ້​ເຂົ້າ​ໃນ​ການ​ສິດ​ສອນ​ຂອງ​ໂຮງ​ຮຽນ. ໂຮງ​ຮຽນ​ກິນນອນ ພອນ​ສ​ະ​ຫວັນ ແລະ ​ຊົນ​ເຜົ່າ ເປັນ​ບ່ອນ​ສຶກ​ສາ​ອົບ​ຮົມ ບັນ​ດານ​ນັກ​ຮຽນ​ພອນ​ສະ​ຫວັນ​ຂອງ​ປະ​ເທດ​ລາວ. ໂຮງ​ຮຽນ​ໄດ້​ສ້າ​ງ​ຂື້ນ​ໃນ​ປີ 2006 ຈາກ​ທືນ​ຊ່​ວຍ​ເຫຼືອ​ລ້າ​ຂອງ ລັດ​ຖະ​ບານ​ຫວຽດ​ນາມກ

ໃນ​ຕອນ​ແລງມື້ດຽວກັນ, ຮອງປະທານປະເທດ ດັ້ງ​ທິ​ຫງ໋ອກ​ຖິ້ງ ໄດ້​ໄປ​ຢ້ຽມ​ຢາມ ສຳ​ນັກ​ງານ ບໍ​ລິ​ສັດ ສື່​ສານ Star Telecom ຮ່ວມ​ທຸ​ລະ​ກິດ ສະ​ຫ​ະ​ບໍ​ລິ​ສັດ ສື່​ສານ ທະ​ຫານ(Viettel) ຜູ່​ສະ​ໜອງ​ການ​ບໍ​ລິ​ການ  internet 4G ຄຸນ​ນະ​ພາບ​ສູງ ແລະ ທັນ​ສະ​ໄໝ ຢູ່​ລາວ ທີ່​ມີ ປະ​ມານ 3 ລ້ານ​ເບີ​ໂທ​ລະ​ສັບ​ມື​ຖື, ກວມ​ປະ​ມານ 52% ຕະ​ຫຼາດ​ລາວ.

* ໃນ​ຕອນ​ແລງມື້ດຽວກັນ, ຮອງປະທານປະເທດ ດັ້ງ​ທິ​ຫງ໋ອກ​ຖິ້ງ ໄດ້ພົບ​ປະ​ກັບ​ນັກ​ທຸ​ລະ​ກິດ ຫວຽດ​ນາມ ທີ່​ດີ​ເດັ່ນ, ເຄື່ອນ​ໄຫວ​ມີ​ປະ​ສິດ​ຕິ​ພາບ ຢູ່​ລາວ ຂົງ​ເຂດນ້ຳ​ມັນ​ເຊື້ອ​ໄຟ, ທະ​ນາ​ຄານ, ປະ​ກັນ​ໄພ, ການ​ຢາ, ຂຸດ​ຄົ້​ນ​ບໍ່​ແຮ່, ກໍ່​ສ້າງ ແລະ ໂຮງ​ແຮມ. ທ່ານ​ຮອງ​ປະ​ທານ​ປະ​ເທດ ຮຽກ​ຮ້ອງ​ມາ​ຍັງບັນ​ດາ​ນັກ​ທຸ​ລະ​ກິດ ຫວຽດ​ນາມ ຜັນ​ຂະ​ຫຍາຍ ໂຄງ​ການ​ຕາມ​ທິດ​ທາງ​ມີ​ປະ​ສິດ​ທິ​ພາບ, ຊຸກ​ຍູ້​ການກໍ່​ສ້າງ​ເພື່ອ​ເປີດ​ໃຊ້​ໂດຍ​ໄວ. ທ່ານ​ຮອງ​ປະ​ທານ​ປ​ະ​ເທດ ອວຍ​ພອນ​ໃຫ້​ນັກ​ທຸ​ລະ​ກິດປະ​ສົບ​ຜົນ​ສຳ​ເລັດ​ໃນ​ການ​ລົງ​ທືນ ແລະ ການ​ເຮັດ​ທຸ​ລະ​ກິດຢູ່​ລາວ, ພ້ອມ​ກັນ​ນັ້ນ ໃຫ້​ປະ​ຕິ​ບັດ​ຕາມ​ລະ​ບຽບ​ກົດ​ໝາຍ, ປະ​ຕິ​ບັດ​ໜ້າ​ທີ່, ພັນ​ທະ ຕໍ່​ສັງ​ຄົມ​ ລາວ ປະ​ກອບ​ສ່ວນ​ເຂົ້​າ​ໃນ​ການ​ພັດ​ທະ​ນາ ເສດ​ຖະ​ກິດ ສັງ​ຄົມ ລາວ ກໍ່​ຄື​ການ​ພົວ​ພັນ​ມິດ​ຕະ​ພາບ ພິ​ເສດ ຫວຽດ-ລາວ.

ຮອງປະທານປະເທດ ດັ້ງ​ທິ​ຫງ໋ອກ​ຖິ້ງ ໄດ້ໄປຢ້ຽມຢາມ ສະຖານທູດ ຫວຽດນາມ ຢູ່ນະຄອນຫຼວງວຽງຈັນ ແລະ ໄດ້ໂອ້ລົມກັບພະ​ນັກ​ງານສະຖານທູດ, ຜູ້ຕາງສະ​ມາ​ຄົມ​ພໍ່​ແມ່​ພີ່​ນ້ອງ​ຊາວຫວຽດນາມ ແລະ ນັກ​ສືກ​ສາຫວຽດນາມ ທີ່​ກຳ​ລັງ​ສຶກ​ສາ, ເຮັດວຽກ ແລະດຳ​ລົງ​ຊີ​ວິດ ຢູ່ລາວ. ທ່ານຮອງປະທານປະເທດ ໄດ້ແຈ້ງ​ໃຫ້​ຮູ້​ເຖິງ ສະ​ຖາ​ນະ​ການທາງດ້ານການເມືອງ, ເສດຖະກິດ, ສັງຄົມ ແລະ ອື່ນໆທີ່​ເກີດ​ຂື້ນ​ພາຍໃນປະເທດໄລ​ຍະ​ຜ່​ານ​ມາ​ກໍ່​ຄື​ໃນ​ປະ​ຈຸ​ບັນ.

ຮອງປະທານປະເທດ ເນັ້ນ​ໜັກ ພັກ-ລັດ ຍັງ​ເອົາ​ໃຈ​ໃສ່​ເຖິງ​ສິດ​ຜົນ​ປະ​ໂຫຍດ ແລະ ຊີ​ວິດ​ການ​ເປັນ​ຢູ່​ຂອງ ປະ​ຊາ​ຊົນ​ຊາວ​ຫວຽດ​ນາມ ທີ່​ຢູ່​ຕ່າງ​ປະ​ເທດ ເວົ້າ​ລວມ ແລະ ທີ່​ຢູ່​ລາວ​ເວົ້າ​ສະ​ເພາະ, ໄດ້​ນຳ​ສະ​ເໜີ​ຕໍ່​ລັດ​ຖະ​ບານ​​ກໍ່​ຄື​ອຳ​ນາດ​ການ​ປົກ​ຄອງຂອງ​ລາວຢູ່​ເລື່ອຍໆ ວ່າ​ໃຫ້​ອຳ​ນວຍ​ຄວາມ​ສະ​ດວກ​ໃຫ້​ຊາວ​ຫວຽດ​ນາມ ແລະ ຄົນ​​ທີ່​ມີ​ສັນ​ຊາດຫວຽດ​ນາມ ຢູ່​ລາວ ໄດ້​ດຳ​ລົງ​ຊີ​ວິດ, ດຳ​ເນີນ​ທຸ​ລະ​ກິດ ຢ່າງ​ມີ​ສະ​ຖຽນ​ລະ​ພາບ​ ແລະ ມີ​ຄວາມ​ສະ​ດວກ.

ທ່ານຮອງປະທານປະເທດຍັງໄດ້ຮຽກຮ້ອງໃຫ້ປະຊາຊົນຮັກສາມູນ​ເຊື້ອຄວາມສາມັກຄີ, ປົກປັກເຊິ່ງກັນແລະກັນ, ຮັກສາມູນ​ເຊື້ອປະ​ຊາ​ຊົນ​ບັນ​ດາ​ເຜົ່າ, ເຄົາລົບນັບຖື ແລະ ຢູ່​ພາຍ​ໃຕ້ກົດຫມາຍ, ຮີດ​ຄອງ​ປະ​ເພ​ນີ​ຂອງ​ລາວ, ປະ​ກອບ​ສ່ວນ​ຮັດ​ແໜ້ນ ແລະເພີ່ມທະວີມິດຕະພາບ ລະຫວ່າງຫວຽດນາມ-ລາວ. ໃນໂອກາດນີ້, ຮອງປະທານປະເທດ ດັ້ງ​ທິ​ຫງ໋ອກ​ຖິ້ງ ໄດ້ມອບ​ລາງວັນ ຈຳ​ນວນ  80 ລາງວັນ ໃຫ້ກອງທຶນ ຊ່ວຍ​ເຫຼຶອ​ເດັກ​ນ້ອຍ ຫວຽດນາມ ໃຫ້ແກ່ນັກຮຽນ ສັນ​ຊາດ ຫວຽດນາມ ທີ່​ດີ​ເດັ່ນ ທົ່ວປະເທດລາວ.

ຫັດ​ທະ​ບູນ
;

同类别新闻