ການນໍາແຂວງຈໍາປາສັກຕ້ອນຮັບຄະນະຜູ້ແທນສະມາຄົມມິດຕະພາບແຂວງເລີມດົງ ສສ ຫວຽດນາມ

15:52 2019/07/25

ສອງວັນທີ່ຜ່ານມາ, ຢູ່ຫ້ອງຮັບແຂກ ສະໂມສອນຫຼັກ 4, ນະຄອນປາກເຊ, ແຂວງຈຳປາສັກ, ການນໍາແຂວງຈໍາປາສັກນໍາໂດຍ ສະຫາຍ ເມກສະຫວັນ ພົມພິທັກ, ຮອງເລຂາອົງຄະນະພັກແຂວງ, ປະທານສະພາປະຊາຊົນແຂວງ ແລະ ປະທານສະມາຄົມມິດຕະພາບລາວ-ຫວຽດນາມ ແຂວງຈໍາປາສັກ, ໄດ້ຕ້ອນຮັບການເຂົ້າຢ້ຽມຢາມຂອງ ສະຫາຍຫງຽວນກວາງຢຽນ, ປະທານຄະນະກວດກາພັກ-ລັດເມືອງລາກເຢືອງ, ແລະ ກຳມະການຄະນະບໍລິຫານງານສະມາຄົມມິດຕະພາບຫວຽດນາມ-ລາວ ແຂວງເລິມດົງ ແຫ່ງ ສສ ຫວຽດນາມ ພ້ອມດ້ວຍຄະນະ.

ການນໍາແຂວງຈໍາປາສັກຕ້ອນຮັບຄະນະຜູ້ແທນສະມາຄົມມິດຕະພາບແຂວງເລີມດົງ ສສ ຫວຽດນາມ
ບັນຍາກາດການພົບປະສອງຝ່າຍ.

ສະຫາຍ ບົວລິນ ວົງພະຈັນ, ກຳມະການຄະນະປະຈໍາພັກແຂວງ ແລະ ຮອງເຈົ້າແຂວງຈໍາປາສັກ ພ້ອມດ້ວຍ ພະນັກງານການນຳປະຈຳອົງການປົກຄອງແຂວງຈຳປາສັກ ກໍ່ໄດ້ເຂົ້າຮ່ວມພິທີດັ່ງກ່າວນີ້ ເຊັ່ນກັນ.

ໃນໂອກາດການພົບປະຢ້ຽມຢາມແຂວງຈໍາປາສັກ ຂອງຄະນະຜູ້ແທນສະມາຄົມມິດຕະພາບຫວຽດນາມ - ລາວ ແຂວງເລິມດົງ ສສ ຫວຽດນາມ ໃນຄັ້ງນີ້, ຄະນະຜູ້ແທນທັງສອງຝ່າຍ ໄດ້ລາຍງານສະພາບການພັດທະນາເສດຖະກິດ -ສັງຄົມ,ການຮ່ວມມືຮອບດ້ານຈໍາປາສັກ -ເລິມດົງ ໃນໄລຍະທີ່ຜ່ານມາ ນັບທັງບັນຫາອື່ນໆທີ່ຕ່າງຝ່າຍຕ່າງກໍ່ສົນໃຈ ແລະ ມີຜົນປະໂຫຍດຮ່ວມກັນ.

ຈາກນີ້, ທັງສອງຝ່າຍກໍ່ໄດ້ຕີລາຄາສູງວ່າ: ການມາຢ້ຽມຢາມພົບປະເຊິ່ງກັນ ແລະ ກັນໃນຄັ້ງນີ້ແມ່ນເພື່ອສືບຕໍ່ຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ-ຫວຽດນາມ,ຫວຽດນາມ - ລາວ ໂດຍສະເພາະ ແຂວງຈໍາປາສັກ – ເລິມດົງທີ່ມີມາແຕ່ດົນນານໃຫ້ເກີດດອກອອກຜົນຂຶ້ນໄປເລື້ອຍໆ. ໃນໄລຍະຜ່ານມາ, ແຂວງເລິມດົງ ສສ ຫວຽດນາມ ໄດ້ຮ່ວມມື ແລະ ຊ່ວຍເຫຼືອແຂວງ ຈໍາປາສັກໃນຫຼາຍໂຄງການ,ໃນນີ້ ດ້ານການສຶກສາ ແມ່ນໄດ້ຊ່ວຍກໍ່ສ້າງໂຮງຮຽນມັດທະຍົມສົມບູນພອນສະຫວັນ ຢູ່ນະຄອນປາກເຊ, ໂຄງການລ້ຽງປາຄາເວຍ ຢູ່ເມືອງປາກຊ່ອງ ແລະ ອື່ນໆ ອີກ. 

ໃນໂອກາດມາຢ້ຽມຢາມແຂວງຈໍາປາສັກໃນຄັ້ງນີ້, ຄະນະຜູ້ແທນສະມາຄົມມິດຕະພາບຫວຽດນາມ-ລາວ ແຂວງເລິມດົງ ຍັງໄດ້ມອບເຄື່ອງອຸປະໂພກບໍລິໂພກ ແລະ ອຸປະກອນການຮຽນຈໍານວນໜຶ່ງໃຫ້ແຂວງຈໍາປາສັກ ເພື່ອສືບຕໍ່ນໍາໄປຊ່ວຍເຫຼືອນັກຮຽນຊົນເຜົ່າ, ຂາດເຂີນ ໃນເຂດກ່າງໄກສອກຫຼີກ ອີກດ້ວຍ.

(来源: ເກດສະໜາ ແກ້ວສຸວັນນະແສງ/ສວຈ)
;

同类别新闻